پشتی لهه‌ڤهاتنا حكومەتا ئیراقێ و حكومەتا کوردستانێ د ده‌ربارێ شنگالێ دا هیڤیه‌ک په‌یدا ببوو کو، دێ خه‌لکێ شنگالێ ڤه‌گه‌رن ل سه‌ر جھ و وارێن خوه. پەکەکێ دا زانین کو ئه‌و چه‌کدارین خوه ژ شنگالێ ڤەناکشینن و ب توندی ل دژێ ڤێ لهه‌ڤهاتنێ دەركەتن.
ژ ئالیه‌ک دن ڤه پەكەكێ ئێریشێن خوه ل هەمبه‌ر پەدەکێ و باشوورێ كوردستانێ گه‌له‌ک توند کرن و هه‌تا ڕاده‌یه‌کی پەدەکە ب خیانه‌تێ ئیتهام کر، ڕێڤه‌به‌رێن پەكەكێ ڤه‌کری ل دژە پەدەکێ و ھەرێما كوردستانێ شه‌ر ڕاگەهاندن و دان خویاکرن کو شه‌رێ ل دژێ پەدەکێ نه شه‌رێ براكوژیێ یە.
پەکەکێ ئێریشی هێزا پێشمه‌رگه کر و پێشمه‌رگه‌یه‌ک شه‌هید کر. پەکەکێ ئێریشێ بۆرییا په‌ترۆلێ یا کو دفرۆشه بازارێ جیهانێ کر کو داهاتا وێ ڕۆژانه 10 ملیۆن دۆلاره. ئه‌ڤ یه‌ک ژ بۆ داراییا هه‌رێما کوردستانێ ده‌ربه‌ک گه‌له‌ک گرانه.
بێ گومان ل هەمبه‌ر بوویه‌رێن ل ئیراقێ پێکدهاتن تایبه‌تی هه‌ماهه‌نگیا د ناڤبه‌را حكومەتا ئیراقێ و یا هه‌رێما کوردستانێ دا، نه ب دلێ ئیرانێ بوو. ئیران د جھ دا گرۆپێن خوه یێ ل ئیراقێ کر د ناڤا چالاکیان دا. ئالیێن شیعه ل دژی هه‌رێما کوردستانێ ل گه‌ل پارله‌مه‌نته‌رێن سونه ژی ل هه‌ڤکرن و هنده‌ک پارله‌مه‌نته‌رێن کورد د پارله‌مه‌نتۆیا ئیراقێ دا پشتگریا وان کر و ب بریاره‌ک یا پارله‌مه‌نتۆیێ به‌هرا کوردستانێ ژ بودچه‌یا ئیراقێ برین. ئه‌ڤ یه‌ک وه‌ک کو تو خه‌نجه‌ره‌کی ل پشتا گه‌لێ کورد ل باشوورێ کوردستانێ بدی هاته نرخاندن.
نها ئه‌ڤ بریارا پارله‌مه‌نتۆیێ ب جھ دبه یان نابه، لێ پارله‌مه‌نتۆیا ئیراقێ ل گه‌ل هنده‌ک پارله‌مه‌نته‌رێن کورد کو خیانه‌ت ل مله‌تێ خوه کرن نیه‌تا خوه ئا‌شکه‌ره کرن. کوردستان د وارێ دارایی دا ب ڕێیا په‌ترۆلا بفرۆشێ ده‌رڤه دکاره ب ئاوایه‌کی ده‌بارا خه‌لکێ خوه بکه.
چ جیوازی ل ناڤبه‌را ته‌قاندنا بۆریا په‌ترۆلێ ژ ئالیێ پەكەكێ ڤه و بریارا پارله‌مه‌نته‌رێن شۆڤه‌نستێن عه‌ره‌ب نینە. هه‌ردو بوویه‌ر ب هه‌ڤره گرێدایینه و بریار ژ یه‌ک ناوه‌ندی هاتیه وه‌رگرتن. بریارا پارله‌مه‌نتۆیا ئیراقێ به‌رده‌وامیا ته‌قاندنا خه‌تا بۆریا په‌ترۆل ئا کوردستانێ یه.
د پارله‌مه‌نتۆیا ئیراقێ دا ژ بلی چه‌ند پارله‌مه‌نته‌رێن خوه‌فرۆش، پارله‌مه‌نته‌رێن کورد، ب هه‌ڤره بوون خوه‌دی هه‌لوه‌ست و ژ ھۆلا پارلەمنوتۆیێ دەركەتن دەرڤە.
نها ل هەمبه‌ر ڤان بوویه‌ران و هه‌روه‌ها ل گۆرا سیاسه‌تا گه‌له‌مپه‌ری ژی ل باشوورێ کوردستانێ و هه‌تا ڤێ یه‌کێ ڤه گرێدایی ل به‌شێن دن ژی سیاسه‌ت بوویه دو ئالی.
یه‌ک ژ وان سیاسه‌تا پەدەکێ پێشکێشییێ دکه و هه‌ولدده کوردستانێ به‌ر ب ستاتوویه‌ک سه‌ربخوه‌ڤه یانی ده‌وله‌تبوونه ڤه ببه.
یا دن ژی سیاسه‌تا کو پەکەکە پێشکێشییێ دکه و ل گه‌ل هه‌موو جوره‌یێ داگیرکه‌را هه‌ڤکاریائێ دکه، دا کو ڕێ ل ڕێڤه‌چوونا سه‌رخوه‌بوونێ بگره و ناڤێ کوردستانێ وندا بکه.
نها ل هه‌موو کوردستانێ یان دێ مرۆڤ د ناڤا هێزا کوردستانی یا کو کوردستانێ به‌ر ب ده‌وله‌تبوونێ ڤه ببه جھ دگره پشگرییێ دکه، یان ژی مرۆڤ د ناڤ سیاسه‌تا کو پەکەکە سه‌رکێشیێ دکه جھ دگره و ڕێ ل ده‌وله‌تبوونا وه‌لاتا خوه دگره. ڕێیا سێیه‌م نینە. پێڤاژۆ زیزه و هه‌ر کورده‌ک سیاسه‌تێ دکه دڤێ ل ئالیه‌کی خوه‌دی هه‌لوه‌ست به. هێدی کو مرۆڤ هه‌ردو ئالیان ب هه‌ڤره ئیداره بکه نابه. بێ گومان ده‌ما مرۆڤ دبێژه پەکەکە، ئه‌ڤ یه‌ک تێ واته‌یا هه‌موو هێز، ڕێخستن، پارتی و ده‌زگه‌هێن ژ ئالیێ پەكەكێ ڤه هاتین ئاڤاکرن و ئیرۆ پشتگریا پەكەكێ دکن د ناڤا کاتاگۆریا پەكەكێ دا نه.
ده‌ما سیاسه‌تڤانه‌ک پەکەکێ ڕه‌خنه بکه و د ھەمان دەم دا پشتگریا ئالیه‌ک دن کو د بن باندۆرا پەكەكێ دا یه بکه ئه‌ڤ نابه و دبه دورووتیا سیاسی.
گه‌ره‌ک قۆناخا کو ته‌ڤگه‌را کورد تێرا ده‌رباس دبه، باش بێ خوه‌ندن. ده‌سته‌که‌فتیێن کو ئیرۆ هه‌نه لاواز ببن یان ژی ب ئاوایه‌کی تێک هه‌رن ، کورد هه‌تا سه‌دسالان هێدی نکارن خوه سه‌رهه‌ڤه بینن.
نابە سیاسه‌ت ژ بۆ به‌رژه‌وه‌ندیێن که‌سایه‌تی بێ کرن. دڤێ سیاسه‌ت ژ بۆ به‌رژه‌وه‌ندیێن نه‌ته‌وه‌یی بێ کرن. پیڤان به‌رژه‌وه‌ندیێن نه‌ته‌وه‌یی به. وه‌ک دن موومکنه کو هنده‌ک که‌س وه‌ک که‌سایه‌ت سه‌ربکه‌ڤن لێ دێ کوردستان وندا بکه. ئه‌ڤ یه‌ک دبه تاوانه‌که نه‌ته‌وه‌یی.
2020.11.13
دارا بیله‌ک
