نەبن نێچیر ببن نێچیرڤان
سه‌ردانا سه‌رۆکێ کوردستانێ نێچیرڤان بارزانی د ناڤ کوردێن باکور دا پر هات گۆتوبێژكرن. پەكەكێ و مه‌دیا پەكەكێ وه‌ک هه‌ر جارێ د که‌سایه‌تیا نێچیرڤان بارزانی دا ب توندی ئێریشی پەدەكێ و بارزانیان کر و ژه‌هرا دلێ خوه ئاڤێت ده‌ر. لێ یا بالکێش ئه‌ڤه کو ھندەك ئالیێن ژ ده‌رڤه‌یی پەكەكێ ژی د بن په‌ردا وه‌لاتپارێزی و کوردپه‌روه‌ریێ دا د گۆلا پەكەكێ دا بوون ماسی و ئاڤژه‌نی کرن، ژ پەكەكێ را بوون ماشک و وان ژی سه‌ردانا نێچیرڤان بارزانی ره‌خنه کر.
کوردستان د ناڤ چار داگیرکه‌ران دا هاتیه دابه‌شکرن، هه‌ر چار دۆرێن وێ ده‌وله‌تێن دژمن و داگیرکه‌رن. ئه‌ڤ دابه‌شکرن بێ داخواز و ئیراده‌یا کوردان پێک هاتیه. ڤێ ره‌وشا مالکمباخ کورد مه‌جبوور کرنه و دکه کو ب داگیرکه‌رێن خوه ره تێکلدار بن دا کو ل سه‌ر لنگان بمینن و بژین. هه‌ر پارتیه‌ک کورد باش یان خراب، راست یان خه‌له‌ت، مه‌جبوور مایه و دمینه کو ب ده‌وله‌ته‌ک داگیرکه‌ر ره تێکلیان ده‌ینن دا کو کاربه خه‌باته‌ک سیاسی یان چه‌کداری بکه. بێگومان ناکۆکی و پرسگرێکێن هه‌ر چار ده‌وله‌تێن داگیرکه‌ر ژی ب هه‌ڤ ره هه‌یه. چاوا کو ده‌وله‌تێن داگیرکه‌ر ل هه‌مبه‌ر ده‌وله‌تێن دن دخوازن ژ کوردان سوود وه‌رگرن و وان ژ بۆ به‌رژه‌وه‌ندیێن خوه ب کار بینن.
ئه‌م بخوازن یان نه‌خوازن کوردستان 4-5 پارچه یه. به‌لکی د پاشه‌رۆژێ دا کوردستان ببه 4-5 ده‌وله‌تێن سه‌ربخوه ژی. چ که‌س نکاره مسۆگه‌ری و گارانتیا کوردستانه‌ک یه‌کگرتی بده. شه‌رت و شرووتێن هه‌رێمێ و دنیایێ چ پێویست بکن، ده‌وله‌تێن مه‌زن و خوه‌دی گۆتن چ و چاوا بخوازن، کورد ژی مه‌جبوورن پارا خوه ژ وان ده‌رفه‌ت و داخوازان بستینن.
پارتی و رێخستنێن کو دۆزا کوردستانه‌ک یه‌کگرتی و سه‌ربخوه نه‌کن و ناکن، مافێ وان نینە د به‌شه‌ک دن دا ئالۆزیان پێک بینن و دژمناتیا ده‌ستکه‌فتیێن وی به‌شی بکن. پەكەكە ئیرۆ کوردستانه‌ک یه‌کگرتی و سه‌ربخوه ناخوازه، ل دژه، دژمناتیا کوردستانه‌ک یه‌کگرتی و سه‌ربخوه دکه. دۆزا پارازتنا سینۆرێن داگیرکه‌ران دکه و ژ بۆ وێ شه‌ر دکه. ژ به‌ر ڤێ، چ مافێ وێ نینە کو دژمناتیا سه‌ردانا نێچیرڤان بارزانی و تێکلیێن وی یێن ب ده‌وله‌تان را بکه. هه‌که پەكەكێ ئیرۆ دۆزا کوردستانه‌ک یه‌کگرتی و سه‌ربخوه بکرا و خوه‌دی ل حه‌ق و حقووقێ مڵه‌تێ کورد و ل به‌رژه‌وه‌ندیێن هه‌ر چار پارچه‌یان ده‌رکه‌تا، هه‌لبه‌ت وێ مافێ وێ و ره‌خنه‌کرنا نێچیرڤان بارزانی ژی هه‌بوویا، لێ نینە.
باشوورێ کوردستانێ هه‌ر چقاسی به‌شه‌ک ژ ئیراقێ به ژی، وه‌ک فه‌ده‌راسیۆن خوه‌دیێ حکوومه‌ته‌ک فه‌رمی یه و ئه‌ڤ فه‌ده‌راسیۆن د قادا ناڤنه‌ته‌وی دا ب فه‌رمی تێ ناسکرن. هه‌رێما کوردستانێ د ناڤ سینۆرێ ئیراقێ دا هه‌رێمه‌ک سه‌ربخوه یه و سه‌رۆکێ وێ ژی نێچیرڤان بارزانی یه.
بارزانی، وه‌ک سه‌رۆکێ هه‌رێما کوردستانێ خوه‌دی مافه کو ب سه‌رۆکده‌وله‌تان را روونە، سه‌ردانا ده‌وله‌تان بکه، ژ بۆ پاشه‌رۆژا هه‌رێما خوه بازرگانیێ و کارێ دیپلۆماسیێ بکه. د ره‌فه‌راندووما سه‌رخوه‌بوونێ دا نیەت و ئارمانجا پەدەكێ و بارزانیان ب زه‌لالی ئا‌شکه‌ره بوو. ئه‌و ده‌وله‌تخوازن و ئاماده‌کاریا پاشه‌رۆژا کوردستانێ دکن. شک و گومان ژ ڤێ را نینە.
یا بالکێش ئه‌ڤه، رێخستن و پارتیێن کو ده‌وله‌تبوونا کوردستانێ ناخوازن و ده‌رگه‌ڤانیا سینۆرێن داگیرکه‌رێن کوردستانێ دکن، رادبن سه‌ردان و دیپلۆماسیا نێچیرڤان بارزانی ره‌خنه دکن. نه ته‌نێ ره‌خنه، دژمناتیه‌ک خراب ژی دکن. پەكەكە یا کو زارۆکێن کورد ژ بۆ “ ده‌مۆکراتیککرنا ده‌وله‌تا ترک “ و یه‌کرێزیا سینۆرێن وێ دده کوژتن، دژمناتیا نێچیرڤان بارزانی دکه. پەكەكە یا کو به‌رێ کوردان دده ئه‌نقه‌رێ و د مه‌جلیسا وێ دا ژ بۆ پارازتنا سینۆرێن ترکیێ ل سه‌ر نامووس و شه‌ره‌فا خوه سووند دخوه، دژبه‌ریا سه‌ردانا بارزانی دکه.
ماده‌م هوون ئه‌نقه‌ره وه‌ک پایته‌خ و قبله‌یا خوه دبینن و دپارێزن، ماده‌م هوون نه شه‌رێ ده‌وله‌تێ لێ ته‌نێ شه‌رێ ئاکەپ و ئه‌ردۆگان دکن، هوون چ ژ بارزانی و باشووریان دخوازن؟ چما هوون خوه د شکه‌فتێن قه‌ندیلێ دا ڤه‌دشێرن و ناچن ل باکور شه‌رێ ئاکەپ و ئه‌ردۆگان ناکن؟ ما سه‌رۆکێ وه ئۆجەلان نه دگۆت “یێ کو ئاکەپ ل سه‌ر لنگان دهێله ئه‌زم؟”. ما کارایلان نه دگۆت ” كەدا مه د خورتکرنا ئاکەپێ دا هه‌یه؟ “. ما کاراسو و کالکان نابێژن “ئه‌م شه‌رێ ئارتێش و ده‌وله‌تێ ناکن، ئارمانجا پەكەكێ نه پارچه‌کرنا ترکیێ یه؟ ” ماده‌م ئارمانجا وه نه پارچه‌کرنا ترکیێ یه، کی سه‌ردانا ترکیێ دکه یان ناکه، ژ وه را چ؟ یان ژ به‌ر کو که‌سه‌ک وه ناخه شوونا زلامان هوون ژ پەدەكێ و بارزانیان دحه‌سدن و دژمناتیا وان دکن؟
دنیا و ئاله‌م دزانه كا مه‌دیا پەكەكێ د ده‌ستێ کێ دا یه و خزمه‌تا چ و کێ دکه. په‌یایێن ده‌وله‌تا کوور یێن وه‌ک یالچن کووچک و دۆگو په‌رینچه‌ک به‌لاسه‌به‌ب ب سالان خزمه‌ت و پشتگریا پەكەكێ نه‌کرن. یالچن کووچک به‌لاسه‌به‌ب نه‌دگۆت “من کوردێن باکور ژ بارزانیبوونێ دوور خستن. د ده‌ستێ من دا هێزا مه‌دیایێ هه‌یه. ئه‌و شاگرتێن کو من په‌روه‌رده کرن کارن خوه ژ بۆ ده‌مۆکراسیا ترکیێ بدن کوژتن”. ئۆجەلان به‌لاسه‌به‌ب نه‌دگۆت و نابێژه “هه‌تا ئه‌ز ساخ بم ئه‌ز ناهێلم بارزانی ده‌وله‌ته‌ک کوردی دامه‌زرینه”. ئێریشێن پەكەكێ و کاله‌مێرێن شکه‌فتێن قه‌ندیلێ نه پووچ و ڤالا نه، نه ئێریشێن ئه‌رزان و به‌لاشن. ئه‌ڤ ئێریش پارچه‌یه‌ک ژ پلان و پرۆژه‌یێن که‌سێن وه‌ک یالچن کووچک و ده‌وله‌تا ترکن و د بنگه‌ها وێ دا دژمناتیا سه‌رخوه‌بوونا کوردستانێ و خه‌تا سه‌رخوه‌بوونێ یه.
ئیرۆ ل سه‌رانسه‌رێ کوردستانێ دو خه‌ت ئا‌شکه‌ره نه. خه‌تا ئازادی و سه‌رخوه‌بوونخوازیێ و خه‌تا ته‌سلیمیه‌ت و بنده‌ستیێ. پەدەكە و بارزانی رێبه‌ر و سه‌رکێشێن خه‌تا ده‌وله‌تبوون و کوردستانخوازیێ نه، هه‌ول و ئارمانجا وان کوردستانه‌ک سه‌ربخوه یه. ره‌فه‌راندووم نیشانه‌ک پچووکه. پەكەكێ رێبه‌ر و سه‌رکێشێ ته‌سلیمیه‌ت و پارچه‌کرنا کوردستانێ یه. هه‌ول و ئارمانجا وێ پارازتنا سینۆرێن داگیرکه‌رێن کوردستانێ و رێلبه‌رگرتنا کوردستانه‌ک سه‌ربخوه یه. سه‌ده‌ما ئێریشێن پەكەكێ و چیرپکێن وێ یێن 40 سالی ئه‌ڤه، ترسا ده‌وله‌تبوونا کوردستانێ یه. ئێریشێن سه‌ر پەدەكێ و بارزانیان ژ به‌ر ڤێ یه‌کێ یه.
پەكەكە، کەجەکە و هەدەپە یێن کو ب پاره و چه‌کێن میت یا ترکیێ ل ئه‌نقه‌رێ هاتنه دامه‌زراندن (ئۆجەلان ب خوه مکور تێ و دبێژه)، ب ئیده‌ئۆلۆژی و سه‌رۆکاتیا چه‌پێن ترک (کو ئه‌و ب خوه ژی خزمه‌تکارێن پلان و پرۆژه‌یێن ده‌وله‌تا ترکن، هه‌بوونا خوه و سیاسه‌تا خوه ل سه‌ر دژمناتیا پەدەكێ و بارزانیان ئاڤا کرنه و ترسا وان یا هه‌ری مه‌زن ژی ده‌وله‌تبوون و یه‌کیتیا کوردستانا مه‌زن و گوهه‌رتنا سینۆرێن ده‌وله‌تێن داگیرکه‌ره. ئه‌ڤ ئاشکرا یه و نه ڤه‌شارتی یه. لێ دبێژن “ره‌ڤا پشیکێ هه‌تا کادینێ یه”.
پرۆژه‌یا مه‌زن یا رۆژهلاتا ناڤین پێنگاڤ ب پێنگاڤ، لێ هێدی هێدی، دکه‌ڤه ژیانێ و د ڤێ پرۆژه‌یا مه‌زن دا کوردستانا مه‌زن و یه‌کگرتی یه‌ک ژ خالێن سه‌ره‌که یه. باشوور و رۆژاڤا میناک و نیشانێن ڤێ یه‌کێ و ڤێ پێنگاڤێ نه.
سه‌ده‌ما کو پەكەكە ب توندی دژمناتیا ئاکەپ و ئه‌ردۆگان دکه ئه‌ڤه کو ئه‌ردۆگان یه‌ک ژ هه‌ڤسه‌رۆکێن پرۆژه‌یا مه‌زن یا رۆژهلاتا ناڤینه کو دامه‌زراندنا کوردستانێ ژی خاله‌ک ژ ڤێ پرۆژه‌یا مه‌زنه. ئه‌ردۆگان ژ 2015ان و ڤر دا، ژ چاپه‌مه‌نیێ را 34 جاران گۆتیه “ئه‌م یه‌ک ژ هه‌ڤسه‌رۆکێن پرۆژه‌یا مه‌زن یا رۆژهلاتا ناڤینن”. ده‌وله‌تا کوور یا ترک ڤێ یه‌کێ باش زانه و دبینه. ژ به‌ر ڤێ ژی، ب رێیا پەكەكێ و چه‌پێن ترک ئاکەپ و ئه‌ردۆگان ژ خوه را کرنه هه‌ده‌فه‌ک مه‌زن و کوردان ژ ئه‌ردۆگان و بارزانیان را دکن دژمن و نه‌یار.
ب کورت و کورمانجی هه‌که ئه‌ز بێژم؛ دڤێ کورد وه‌ک پەكەكێ نه‌بن نێچیرا ده‌ڤێ خه‌لکێ، دڤێ ببن نێچیرڤان. وه‌ک سه‌رۆکێ هه‌رێما کوردستانێ مافێ نێچیرڤان بارزانی یه کو سه‌ردانا هه‌ر وه‌لاتی، هه‌ر ده‌وله‌تێ بکه و ب رایه‌دارێن وێ ده‌وله‌تێ ره روونە. هه‌رێما کوردستانێ هه‌رێمه‌ک فه‌ده‌راله، خوه‌دیێ ئالا خوه یه و د قادا ناڤنه‌ته‌وی دا فه‌رمی و خوه‌دی رێز و پایه یه. مافێ چ که‌سی نینە کو دژمناتیا سه‌ردان و سه‌یرانا سه‌رۆکێ هه‌رێما کوردستانێ بکه. چ مافێ وان که‌س، هێز و پارتیێن کو باکورێ کوردستانێ وێران و تالان کرنه، که‌ڤر ل سه‌ر که‌ڤر نه‌هشتنه و فرۆتنه، قه‌ت نینە. هه‌لبه‌ت مافێ مه و مافێ هه‌رکه‌سی هه‌یه کو د چارچۆڤه‌یه‌ک مه‌ده‌نی و ئه‌خلاقی دا پەدەكێ و بارزانیان ب دۆستانی ره‌خنه بکه. لێ ئێریشێن دژمنانه، ئێریشێن دووری ئه‌خلاق و نرخێن کوردایه‌تیێ نایێن قه‌بوولکرن و خزمه‌تا نه‌یارێن کورد و کوردستانێ دکن.
