نڤیسار

نەشێنە ترکان دبەزنە کوردێن رەبەن

نەشیا کەری بەزی کورتانی

نه‌یارتی و به‌ربه‌رییا ناڤخوه‌یی وه‌ک په‌نچه‌شێرێ که‌تیه‌ مه‌ژی و به‌ده‌نا هنده‌ک کوردان. په‌نچه‌شێرا بێ ده‌رمان ژی بێتفاقی و نه‌یارتییا ناڤخوه‌یی یه‌. داگیرکه‌رێن مه‌ ڤێ یه‌کێ باش ب کار تینن و ب سه‌د سالانه‌ کوردان ژ هه‌ڤ را دکن دژمن.

دل دخوه‌ست کو نه‌یارتی د ناڤ کوردان دا نەبایە و ب تفاق و یه‌کیتییه‌ک نه‌ته‌وی کورد ژی وه‌ک خه‌لکێ ببن خوه‌دان ده‌وله‌ت و ئازاد بژین. لێ مخابن ده‌ستێ دژمن ژ ناڤ مه‌ ده‌رناکه‌ڤه‌، گه‌ه ب ناڤێ ئیسلامێ و گه‌ه ژی ب ناڤێ چه‌پیتییێ مه‌ ژ هه‌ڤ تار و مار دکن. کوردان جان و مالێ خوه‌، هه‌ر تشتێ خوه‌ د به‌ر پەکەکێ دا فیدا کر.

ژ بۆ ئازادییا مله‌تێ کورد و کوردستانه‌ک سه‌ربخوه‌ چو فیداکاری نه‌ما کو نه‌کر. لێ مخابن ئه‌نجام و فرێزا شه‌رێ ٤۰ سالی ل به‌ر چاڤا یه‌. هوون ده‌ڤ ژ گوند و باژاران به‌ردن، هه‌تا نها کۆخکه‌ک مریشکان ژی نه‌هات ئازاد کرن و ژ بۆ ئیدیۆلۆژییێن بیانی، ژ بۆ خه‌یالێن بێ ئارمانج که‌د و خوینا سه‌د هه‌زار کوردان بێ سەبەب هات رژاندن. ده‌ڤ ژ ئارمانجا کوردستانه‌ک سه‌ربخوه‌ هات به‌ردان، باکورێ کوردستانێ کاڤل و وێران بوو، کورد ده‌ربه‌ده‌ر بوون، ئاسیمیله‌ بوون، ژ هزرا نه‌ته‌وی دوور که‌تن و کەیفا نه‌یاران ب مه‌ هات. هه‌م ژی ب ده‌ستێ که‌مالیستێن ترک و ب که‌د و خوینا کوردێن ره‌به‌ن.

ئیرۆ به‌شه‌ک ژ وه‌لاتێ مه‌ نیڤ ئازاده‌، ئه‌و ژی باشووره‌. نیڤ ئازادییا کوردان ژی بوویه‌ که‌له‌م و ستری و که‌تیه‌ چاڤێ هنده‌ک خێرنه‌خوازان. نه‌یارتییا داگیرکه‌رێن کوردستانێ تێ فێهمکرن. لێ گاڤا به‌شه‌ک ژ کوردان پەدەکێ و بارزانییان بکن هێجەت و دژمناتییا ده‌ستکه‌فتییێن باشوورێ کوردستانێ بکن، ئه‌ڤ نه‌ خێره‌ و نایێ داقورتاندن. هه‌روه‌ها هه‌گه‌ر هنده‌ک رابن و پەیەدێ بکن هێجەت و دژمناتییا ده‌ستکه‌فتییێن رۆژاڤایێ کوردستانێ بکن، ئه‌ڤ ژی نه‌ ل خێرا مه‌ یه‌ و دڤێ نه‌یێ داقورتاندن. پرسگرێک و ناکۆکییێن پارتیتییێ جودا نه‌ و نه‌یارتییا ده‌ستکه‌فتییێن ئازادی و سه‌رخوه‌بوونێ ژی جودا یه‌.

دژمناتی و نه‌یارتییا پەدەکێ و بارزانییان ژ پەکەکێ و ئالیگرێن وێ را بوویه‌ خاله‌ک سه‌ره‌که‌.

حه‌یف! پەکەکە یا کو بنێ وێ کورد و پرانییا سه‌رکێشێن وێ ترکێن عەلەوی و که‌مالیستن، نه‌یارتییا پەدەکێ و بارزانییان کرنه‌ خاله‌ک ژ خالێن خوه‌ و د که‌سایه‌تییا پەدەکێ و بارزانییان دا نه‌یارتییا نه‌ته‌وە-ده‌وله‌تێ و کوردستانه‌ک سه‌ربخوه‌ دکن. بێگومان پەدەکە و بارزانی ژ وان را بەهانە و هێجه‌تن. ئارمانجا بنگه‌هین نه‌یارتییا نه‌ته‌وە-ده‌وله‌تێ و سه‌رخوه‌بوونا کوردستانێ یه‌. ئێریشا سه‌ر پەدەکێ و بارزانییان ئێریشا سه‌ر نرخێن نه‌ته‌وی یه‌. ژ خوه‌ د چاپه‌مه‌نی و داخویانییێن رێڤه‌برێن پەکەکێ دا هه‌ر تشت ب زه‌لالی و ئاشکه‌ره‌ تێن گۆتن و نڤیساندن.

سه‌رۆک و رێڤه‌برێن پەکەکێ هه‌لبه‌ت باش دزانن کا پەدەکە چیه‌ و بارزانی خزمه‌تا چ دکن. باش دزانن کو بارزانییان ژ بۆ کوردستانه‌ک سه‌ربخوه‌ شه‌ر کریه‌ و دکن. سه‌ده‌ما ئێریش و نه‌یارتییا وان ئه‌ڤه‌. ژ بۆ کو راستییا بارزانییان ڤه‌شێرن، ئیجار ب بەهانە و ده‌ک و دۆلابێن دن دخوازن بارزانییان د چاڤێ ئالیگرێن خوه‌ دا ره‌ش بکن. ئه‌و ئالیگرێن کو به‌لکی قه‌ت وه‌شانێن پەدەکێ ناشۆپینن و دیرۆکا بارزانییان نه‌خوه‌ندنه‌ و ناخوینن، ب ده‌ره‌وێن سه‌رۆک و رێڤه‌به‌رێن خوه‌ دخاپن و وه‌ک کۆما په‌زی ددن دووڤ گۆتنێن وان.

ژ خوه‌ ئه‌و که‌سێن کو پانکارتێن ل دژی پەدەکێ و بارزانییان هلدگرن و بارزانییان تۆهمه‌تبار دکن، پرانییا وان کوردێن نه‌خوه‌ندەوارن و یێن خوەندەوار ژی پرانییا وان عەلەوی و که‌مالیستێن چه‌پ ئێن کو ل به‌ر ده‌ستێ یالچن کوچوک مه‌زن بوونه‌. یالچن کوچوک بێ سەبەب نه‌دگۆت “من کوردێن باکور کرن دژمنێ بارزانییان“. وه‌رهاسلی که‌لام، باپیرێن مه‌ قەستا نه‌گۆتنه‌: “فلانکه‌س نەشێتە کەری، دبه‌زه‌ کورتانی “. ئه‌وێن کو باکورێ کوردستانێ وێران کرنه‌ و د ٤۰ سالی دا بهوسته‌ک ئاخ ئازاد نه‌کرنه‌، ره‌ڤیانه‌ باشوور، به‌شه‌ک ژ خاکا باشوورێ کوردستانێ داگیر کرنه‌، ب سه‌رۆکاتی و رێڤه‌به‌رییا که‌مالیستێن ترک و ل سه‌ر پشتا گه‌ریلایێن کورد دژمناتییا ده‌ستکه‌فتییێن باشوورێ کوردستانێ دکن. یانی، مخابن هه‌ڤال-له‌رێن مه‌ نکارنە ده‌وله‌تا ترک، دبه‌زن کوردێن ره‌به‌ن.

نوری چەلیک

Back to top button