ب نەورۆزا ئیسال گەلەک کەیفخوەش و دلشاد بووم
ئیسال پیرۆزباهییێن نەورۆزێ ل هەر چوار پارچەیێن کوردستانێ ب جوشو خروشەک گەلەک مەزن و بەرفرە هاتن پیرۆز کرن.
ل باکورێ کوردستانێ ژ بەر چەند بوویەرەکان وەک، دەستپێکرنا پێڤاژۆیا ئاشتییێ، پەیاما ئۆجەلان، هەولێن بێدەنگکرنا چەکان و بلندبوونا دەنگێ ئاشتییێ ئاهەنگ و شاهییێن نەورۆزێ ب ئاوایەکی بەرفرەهتر هاتن ل دار خستن. ب تایبەتی ل ئامەدا باکورێ کوردستانێ کو، سەرۆک مەسعود بارزانی و نێچرڤان بارزانی سەرۆکێ هەرێما کەردستانێ پەیامێن خوە ژ بۆ نەورۆزا ئامەدێ هنارتن. سەرۆک بارزانی د پەیاما خوە دا نەورۆزا گەلێ کورد ل باکورێ کوردستانێ پیرۆز کر و داخواز کر کو ب زووترین دەم برێز ئۆجەلان بهێتە ئازداکرن. هەروەسا نێچیرڤان بارزانی ژی د پەیاما خوە دا پشتەڤابیتا خوە ژ بۆ پێڤاژۆیا ئاشتیێ نیشان دا و پێڤاژۆیا ئاشتییێ ب گاڤ و دەرفەتەک دیرۆکی ب ناڤ کر. ڤان هەر دو پەیامان ئاهەنگا پیرۆزکرنا نەورۆزێ زەنگینترو گەشتر کر و مۆرالا ئامادەبوویان بلنتر کر. نەورۆز ل پرانیا باژار و باژارکێن باکورێ کوردستانێ هات پیرۆز کرن و یا کو دلێ مرۆڤی خوەش دکر ئیسال د وان شاهی و گۆڤەندێن نەورۆزێ دا ئالایێ کوردستانێ ژ سالێن بەرێ زێدەتر دهات دتین.
ل رۆژهەلاتێ کوردستانێ و ل ژێر درووشمێ نەورۆزا خاکیپۆشین، هەما بێژە، ل هەموو باژار و باژارکێن رۆژهەلاتێ کوردستانێ ب دە هەزاران کوردستانی داکەتن قادان و ب گۆتنا درووشمێن نەتەوەیی و ب موزیک و سترانێن کوردی ب گرسەیی نەورۆز پیرۆز کرن. ب ڤێ یەکێ ژی سەلامند کو نەتەوەیا کورد ل رۆژهەلاتێ کوردستانێ نەتەوەیەک زیندیە، ئاشتیخوازە و و دلێ وان ژ بۆ ئازادی و سەرخوەبوونا کوردستانێ و دەولەتبوونێ لێددە.
ل رۆژاڤایێ کوردستانێ، ئیسال نەورۆز د دەم و رەوشەک جودا دا هات، ژ بەر هندێ گەلێ مە ل وێ پارچەیا کوردستانێ یەکەمین چار نەورۆز د سووریەیەکا “ئازاد” دا ب ئالایێ کوردستانێ هەم وەکە جەژنا نەتەوەیی و هەم ژی وەک جەژنا نەمانا رژێما دکتاتۆر یا بەشار ئەسەد شاهی و ئاهەنگ ل دار خستن. ژ بلی باژار و باژارکێن رۆژاڤایێ کوردستانێ، کوردستانینان ل دیمەشقێ، پایتەختا سووریەیێ ژی ب بلندکرنا ئالایێ کوردستانێ و ب مۆزیک و ستران و گۆڤەند نەورۆز پیرۆز کرن.
ل باشوورێ کوردستانێ ، پارچەیا ئازاد، وەکی هەر سال نەورۆز ب هەیەجان و ب بەرفرەهی ل سەرتاسەری هەرێما کوردستانێ ب شاهی و گۆڤەندان، ب بلندکرنا ئالایێ کوردستانێ هات پیرۆز کرن. ب تایبەتی ل ئاکرێ، پایتەختا نەورۆزێ، ئاهەنگا پیرۆزکرنا نەورۆز و سەرسالا نوو یا کوردی ب ئامەدەبوونا سەرۆک مەسعود بارزانی ب رێڤە چوو کە ڤێ یەکێ ژی هزەک نوو دا کوردستانییان و مۆرالا وان بلندتر کر.
ئیسال ل دەرڤەیی وەلات، ل ئەورۆپا و جهێن دن ژی کوردستانییان ژ هەرهەموو پارچەیێن کوردستانێ ب هەموو پێکهاتەیان ڤە و ب هەموو بیروبوجونێن جودا ڤە ب هەڤرا نەورۆز پیرۆز کرن. ئەڤ جهێ کەیفخوەشی و دلخوەشییێ یە کو مرۆڤ دبینە گەلێ مە ل هەر دەرێ ژی بۆ بدەستڤەئانینا مافێن خوە یێن رەوا ئامادە یە.
شرۆڤە\نێرین
نسرەت حاجی
2025.03.23
