نڤیسار

نە پارتی لێ هەست و هەلوەست گرنگن

کوردستان ٤-٥ پارچه‌ یه‌، بێ ئیراده‌ و خوه‌سته‌کا مه‌ دابه‌ش بوویه‌. پارچه‌بوونا کوردستانێ ب خوه‌ را شه‌رت و شرووتێن تایبه‌ت ژی ئافراندنه‌، هه‌ر پارچه‌ مه‌جبووره‌ ل گۆر وه‌لاتێ کو پێڤه‌ گرێدایی یه‌ ره‌وشا خوه‌ بنرخینه‌ و ل گۆر وان شه‌رت و شرووتان سیاسه‌ت و رێ و رێبازا خوه‌ ب رێڤه‌ ببه‌. هه‌لبه‌ت دل دخوه‌ست کو کوردستان یه‌ک پارچه‌ و وه‌لاته‌کی سه‌ربخوه‌ به‌. لێ هه‌ر چقاسی راستییه‌ک ته‌حل به‌ ژی، راستی و واقعێ مه‌ ئه‌ڤه‌. کورد و کوردستان بنده‌ست و پارچه‌کری یه‌، ئه‌م مه‌جبوورن راستییا خوه‌ قه‌بوول بکن و ل گۆر راستییا کو ئه‌م تێ دا نه‌ داخواز و گاڤان باڤێژن.
شه‌رت و شرووتێن سالێن ٥۰، ٦۰ و ۷۰یی و شه‌رتێن ئیرۆ ژ هه‌ڤ جودا نه‌، دووری هه‌ڤن. کۆنژۆنکتورا جیهانا وێ ده‌مێ و یا ئیرۆ ژ هه‌ڤ جودا یه‌. وێ ده‌مێ ب تفنگه‌ک خه‌رابه‌ و که‌لاشنیکۆفه‌ک رزیایی ژی شه‌ر و ته‌کۆشین دهات کرن. ته‌کۆنۆلۆژییا چه‌کێن به‌ژایی و هه‌وایی زێده‌ ب پێش نه‌که‌تبوون. ژ به‌ر ڤێ، ڤیه‌تنامی، کوبایی و مله‌تێن دن دکاریبوون شه‌رێ سه‌رخوه‌بوون و ئازادییێ بدن و زۆرا دژمنێن خوه‌ ببن. لێ هه‌م کۆنژۆنکتورا ئیرۆ و هه‌م ژی ب ته‌کنۆلۆژییا ئیرۆ سه‌رکه‌تنا شه‌رێ چه‌کداری جهێ پرس و گومانێ یه‌. هه‌ر چقاسی سه‌رخوه‌بوون مافه‌کی ره‌وا به‌ ژی، ئیرۆ کۆنژۆنکتورا جیهانێ بێیی بده‌ستخستنا مافان، تێکۆشینا رزگارییا نه‌ته‌وی ژی د ناڤ دا، پارتی و ته‌ڤگه‌رێن ب رێبازێن چه‌کداری سووجدار دکه‌. د ڤی واری دا پەکەکە و شه‌رێ پەکەکێ ده‌لیله‌ک ساخله‌مه‌.
وه‌ک من ل ژۆر ژی گۆت، کوردستان بێ خوه‌سته‌ک و ئیرادا مه‌ هاتیه‌ پارچه‌کرن و شه‌رت و شێوه‌یێن ته‌کۆشینا هه‌ر پارچه‌یی جودا و تایبه‌ته‌. ئه‌ڤ پارچه‌بوونا کو ل دژی ئیراده‌یا مه‌ کوردان پێک هاتیه‌، دڤێ ل گۆری شه‌رت و مه‌رجێن کۆنکره‌ت یێن هه‌ر پارچه‌یه‌کی بێن خوه‌ستن. یانی ل پارچه‌یه‌کی فه‌ده‌راسیۆن و سه‌رخوه‌بوون تێ خوه‌ستن، ل ئالییێ دن ژی ب ئۆتۆنۆمی یان ژی ستاتویه‌ک دن تێ بناڤکرن. راستی و واقع چ به‌، دڤێ ئه‌م ژی ل گۆر وێ خوه‌ بلڤینن و د وێ چارچۆڤه‌یێ دا داخوازان بکن.
ئاشکه‌ره‌ یه‌ کو رێبازێن قانوونی یان ئاشکه‌ره‌ یێن بێئیته‌ئاتییا سیاسی ل به‌ر ده‌ستن. ئه‌ڤ راستیه‌که‌ کو ب به‌رچاڤگرتنا پره‌نسیپا شه‌فافییا پەرله‌مه‌نتۆیان، داخوازێن ماقوول تێن خوه‌ستن و چاره‌سه‌رییێن راستتر تێن پێکانین. د ڤێ چارچۆڤه‌یێ دا د تێکۆشینا شه‌فاف یا حوقوقی یا ل کوردستان و ترکیێ دا جهێ کو تێکۆشینا کورد و کوردستانێ ل سه‌ر ئه‌ساسێ ماف، حقووق و عه‌داله‌تێ ل به‌ر خوه‌ دده‌، دڤێ فاکتۆرا دیارکه‌ر به‌، نه‌ پارتییێن سیاسی یێن کادرۆیێن پێشه‌نگ. ب گۆتنه‌ک دن، د هلبژارتنێن داهاتوو یێن ترکییێ دا، هه‌لوه‌ستا کو هه‌موو نامزه‌دێن پەرله‌مه‌نتۆیێ، ب تایبه‌ت نامزه‌دێن سه‌رۆککۆمارییێ، نیشان بدن ئه‌ندامه‌تییا تفاق و پارتییا خوه‌ بن، د وارێ بده‌ستخستنا ماف و حقووقێ کورد و کوردستانێ دا دڤێ دیارکه‌ر بن.

ئیرۆ هلبژارتنه‌ک ل پێشییا ترکییێ یه‌. ژ به‌ر کو باکورێ کوردستانێ د بن ده‌ستهلاتدارییا ترکییێ دا یه‌ و زێده‌یی ۳۰ ملیۆن کورد ل ترکییێ و باکورێ کوردستانێ دژین، ئه‌ڤ هلبژارتن ژ بۆ پاشه‌رۆژا مه‌ کوردان ژی گرینگه‌. ۲۰ سالن بێهن ل کوردان هاتیه‌ چکاندن و ئه‌م نکارن ب ره‌هه‌تی بێهنا خوه‌ بدن و بستینن. هه‌گه‌ر هات و ئه‌ڤ ده‌ستهلاتداری بێ گوهه‌رتن و دیسا رێ ژ ده‌مۆکراسی و پەرلامه‌نتاریزمێ را بێ ڤه‌کرن، کێم یان زێده‌، ئه‌م دێ کاربن هلمه‌کێ بستینن و به‌لکی بێهنا مه‌ بێ به‌ر مه‌ کو ئه‌م کاربن ده‌رفه‌تێن کار و خه‌باتا نه‌ته‌وی به‌رفره‌هتر بکن. ل گۆر کۆنژۆنکتورا ئیرۆ یا جیهانێ، خه‌باتا له‌گال و سیاسی، خه‌باتا پەرلەمه‌نتاریزمێ خه‌باته‌ک ماقووله‌ و تێ خوه‌ستن کو نه‌ ب رێیا شه‌ر لێ ب رێیا سیاسی چاره‌سه‌ری ژ پرس و پرسگرێکان را بێن دیتن. جهێ ڤێ یه‌کێ ژی هه‌لبه‌ت پەرلەمه‌نتۆ یه‌ تێ قه‌بوولکرن.
دڤێ ئه‌م ژ بیر نه‌کن، د هلبژارتن و تفاقان دا، د نامزه‌تی و وه‌کیلبوونێ دا، ژ بۆ مه‌ کوردان یا گرینگ نه‌ کیژان پارتی یان وه‌کیلتییا کیژان پارتییێ یه‌، سه‌کن، هه‌ست و هه‌لوه‌سته‌. هوون د کیژان پارتییێ دا سیاسه‌تێ دکن بکن، هه‌که‌ هوون نکاربن سه‌کن، هه‌ست و هه‌لوه‌سته‌ک کورده‌واری نیشان بدن، ب ئاشکه‌ره‌یی حه‌ق و حقووقێ مله‌تێ کورد نه‌پارێزن، دۆزا زمان و ناسنامه‌یا کوردی نه‌کن و ته‌نێ وه‌ک پووته‌کی/پووته‌کێ د پەرلەمه‌نتۆیێ دا بێده‌نگ بن، نه‌ هوونێ ب کێری خوه‌ و پارتییا خوه‌ بێن، نه‌ ژی هوونێ ب کێری کورد و کوردستانێ بێن. نامزه‌د یان وه‌کیلێن کو پچه‌کی هه‌ستێن کوردی و نه‌ته‌وپارێزی پێ را هه‌بن، دڤێ نه‌ ل کورسی و مه‌قامێن خوه‌، لێ ل ماف، حه‌ق و حقووقێ مله‌تێ خوه‌ بگه‌رن. نه‌ به‌رژه‌وه‌ندییێن پارتییێن خوه‌، لێ به‌رژه‌وه‌ندییێن مله‌تێ خوه‌ بدن پێش. ئا هه‌ری گرینگ ژ بۆ مه‌ ئه‌ڤه‌ و دڤێ ئه‌ڤ به‌.
ب کورت و کورمانجی؛ دڤێ پەرلەمه‌نتۆ، کورسی، مه‌قام و پارتییێن ئا، ب، ج ژ بۆ مه‌ نه‌ ئارمانج، لێ حاجه‌ت و هنجه‌ت بن. ئه‌م دێ د وان مه‌قامان دا چاوا کاربن ماف و حه‌ق و حقووقێ کوردان بپارێزن، ئه‌ڤ گرینگه‌.

Nûrî Çelîk

Back to top button