نە ژ بۆ سیاسەتا ھەستیشکاندێ بەلێ ژ بۆ زیندیکرنا ڕێکەفتنا ستراتیژی
داخوازا پشکا پتر ژ خەلکێ کوردستانێ، نەخاسمە ڕەوشەنبیر و خامە بدەست كو ھەست ب مەترسیا ناکۆکیێن لایەنێن سیاسی یێن کوردی دکەن، ئەوە کو ھەموو پارتی و رێخستنێن كوردستانێ کێشە و ئاریشەێن خوە بدەن ئالیەکی، دەستکەفتیێن ب خوینا ب دەھان ھزار گەنج و لاوان ب درێژاھیا سەد سالێن خەبات و مالوێرانیێ بدەستڤە ھاتنە ب پارێزن، ستراتیژیەکا یەکگرتی یا نەتەوەیی بگرنە بەر و ب ھەڤڕا ڤێ قۆناغا پڕ مەترسیدار دەرباس بکەن.
لێ مخابن، د ھەمان دەم دا گەلەک کەس چ سەربخۆە و چ ژی پالدایی و ئاراستەکری، سیاسەتا دوژمنکاریێ پەیرەو دکەن و ڕێ و میکانزمێن ھەستیشکاندێ ل ھەمبەر ھەڤدوو بکار تینن، دئەنجامدا چ دەلیڤێن دانوستاندنێ ناھێلن.
ژبۆنا چارەسەرکرنا ڤان ناکۆکیان ھەڤدیتن و جڤینێن سەرۆک و بریاربدەستێن ئالی و پارتیێن سیاسی پێویستیەکا دیرۆکی یە، د ھەمان دەم دا بنگەھێ جەماوەری، ئەندام و کادرێن ڤان پارتیان ژی پێویستی ب دیالۆگێ ھەیە، لێ نەئەڤ دیالۆگا نھا ل سەر تۆڕێن کۆمەلایەتی ل کارە، لێ بەلێ دیالۆگەکا سەردەمیانە و مۆدێرن ل سەر بنەمایێ ڕێزگرتن و ھەڤدو قەبۆلکرنێ پێویستە، ب ئارمانجا كو ھاریکاریا سەکردایەتیێن پارتیێن خوە بكەن، ب ھەڤرا چارەسەریان ژ بۆ پرسگرێکان ببینن و شوونوارێن ڤێ ناکۆکیا کو ئەڤە پتر ژ ٦٠ ساڵانە ژ زیانێ پێڤەتر تشتەکێ دن ژ بۆ گەلێ کورد نەبوویە نەھێلن.
جەماوەرێ ڤان پارتیان پێدڤیە ببنە ڕەقیب و گرۆپێن فشارێ ل سەر پارتیێن خوە ب ئارمانجا پاراستنا ئاشتیا ناڤخۆیی و لانەدانێ ژ پرسێن نەتەوەیی و پاراستنا یەکڕێزیا ناڤ مالا کورد.
نێزیکبوون یان لھەڤھاتنێن دەمکی و تەکتیکی د ناڤبەرا ئالیگرێن دو یان سێ لایەنێن سیاسی دا ل سەر پرسەکێ یان ناکۆکیەکێ، چ دەردان دەرمان ناکە. ئەگەر ڤەکریتر بێژم؛ پارتیا كاركەرێن كوردستانێ (پەکەکە) ل باشوور نەبوویە و نابە بەشەک ژ چارەسەریێ، چونکە بوونا پەکەکێ و رەفتار و سەرەدەریا وێ ل باشوور نەشەرعی و نەڕەوایە، لێ ژ بۆ داگیرکەرێ تورک کو جھێ پیێ خوە ل باشۆر پتر موکم بکە پەكەكە ڕێخۆشکەرە و مەترسیا مەزن ژی ئەڤەیە. مەبەستا من ل ڤێرە نە ئەوە کو چێنابە پەکەکە ل باشوور بە، بەلکۆ ھەبوونا وێ دڤێت دچارچۆڤەکێ یاسایی دا ب ھەڤھاتن دگەل حکومەتا ھەرێما کوردستانێ بھێتە ڕێکخستنکرن و سیاسەتا خۆسەپاندن و قەپخوازیێ ل ھەمبەر حکومەتا ھەرێما کوردستانێ و ھێز و لایەنێن کوردستانی ل باشوور پەیرەو نەکە، مینا وێ سیاسەتا ل ڕۆژئاڤایێ كوردستانێ کریە کەتوار .
بانگا من لڤێرە ژ بۆ لایەنگرێن ھەردو ھێزێن سەرەکی ل باشوورێ کوردستانێ (پارتی و یەکێتی) ئەوە کو پیدڤیە ئێدی ھەردو ئالی گەھشتبن وێ باوەریێ کو:
1- ھەردو ھێز ھەنە و چەکدارن و باندۆرا ھەر ھێزەکێ ل سەر دەڤەرەکا بەرفرەھا کوردستانێ ھەیە، بێی ئێک ژ ھەردو ھێزان کوردستان ناھێتە بڕێڤەبرن.
2-ئەڤە پترە ژ ٦٠ سالانە ھەردو ھێز ھەنە و چ ھێزەک نەشیایە ھێزا دی چ ب مەتود و ئالاڤێن سیاسی و چ ژی ب ڕێ و ڕێکارێن لەشکەری ژناڤ ببە.
3-دووماھیا ھەر ناکۆکی وشەڕەکێ د ناڤبەرا وان دا ڕوودای، ئاشتی و لھەڤھاتن بوویە.
4-سەردەمێ زێڕینێ پەیوەندیێن پارتی و یەکێتی و خۆشگوزەرانیا خەلکێ کوردستانێ سەردەمێ ڕێکافتناما ستراتیژی بوویە، د ھەمان دەم دا نەخۆشترین و مەترسیدارترین دەم ژی سەردەمێ شەڕێ ناڤخۆیی بوویە.
5- گەلێ کوردستانێ ب گشتی و ھەردو ھێز ب تایبەتی بەرگەی چ شەڕێن دی ناگرن، وھەر شەڕەکێ، خودێ نەکەت، د ناڤ بەرا وان دا رووبدەت دێ چام و مالوێرانیەکا نەچاڤەڕێکی ب دووف خوە دا بینە.
واتە ژ بۆ دەرباسکرنا ڤێ رەوش و قۆناغا سەخت و دژوار و ژ بۆ سڤکرنا بارێ ژیارا خەلکی چارەسەری بتنێ ئاشتی، تەبایی، یەکڕێزی، یەکھەڵویستی ل ھەمبەر بەغدا و دەولەتێن دەردوور و بێکڤە کارکرنە.
ل داویێ دبێژم: كا چەوا ڕێکافتناما ستراتیژی دناڤبەرا پارتی و یەکێتی دا بۆ وێ قۆناغا بووری ژ بۆ گەلێ کورد دەستکەفتەکێ دیرۆکی بوو ، ژ بۆ ئیرۆ ژی زیندیکرنا وێ ڕێکەفتنامێ پێتڤیەکا دیرۆکی یە.
ئیدریس تروانشی
2020.05.15
