نە ژ بۆ شەرەکێ گەرم و نەژی ژبۆ ئاشتیەکا سار

گەلێ کورد ھەر ژ سەردەمێ دەولەوتا ماد و ھەتا ئیرۆ ژ دەردێ ململانێ، پرت و بەڵاڤیێ و فرەکویخاتیێ دنالە، د ئەنجام دا باجەک گەلەک مەزن دایە و باجا ژ ھەمیان مەزنتر ژی ژدەستدانا دەرفەتا دامەزراندنا دەولەتەکا کوردی یا نەتەوی بوویە کو ب کێماتی مینا مللەتێن دەردۆر شیابایە پارێزیێ ل ناسنامە، دیرۆک، سامان و مرۆڤێ کورد بکە.

لەوما ژی گەلەك جاران ئەم دبینین كو مللەتێ کورد یێ کەڤنار دبە پێترانکێ نەیار و نەحەزێن خوە، نەخاسمە ژلایێ دیرۆک و کەلتۆر و زمانێ وی ڤە، و شەنگەستێن دیرۆکی و نەتەویێن وی تێتە ئینكار کرن، ژلایەکێ دی رێخوەشکریە ل ھەمبەر داگیرکەرێن ئاخا خوە کو ھەموو جۆرە مەتۆدێن کۆشتن و ژناڤبرنا وی بکاربینن، چ ڕاستەوخۆ ب رێیا ھێزێن خوە یێن لەشکەری و چ ژی ب رێیا “سووارچاکێن” کورد، یێن بدرێژاھیا دیرۆکێ لەشکەرێ پێش دوژمنان بووینە.
ھەرچەندە دەولەتا ماد ئەوا ژ دەرئەنجامێ نەپاکیا (ھارباک)ێ سەرلەشکەرێ دەولەتێ و لاوازیا ئیستیاک پاشای کەتی و سەرەڕای دەرباسبوونا پتر ژ ٢٥٠٠ ساڵان ل سەر ڤێ بویەرا شۆم ئەوا ژ ھەر روودانەکا دی پتر کاریگەریا خوە یا نەرێنی ل سەر مللەتێ کورد ھێلای، لێ مخابن ئەڤ نەپاکی و شەپرزەیی یا گەلێ کورد نە ب تنێ بنبڕ نەبوو، لێ بەلێ بوو کەلتۆر و مینا باوەریەکا ئۆلی ژ دەست بۆ دەستی تێ ڤەگوھاستن.

ئەگەر ھەتا دوھی نەتەبایی و دوبەرەکیا گەلێ کورد، دەرئەنجامێ پاشڤەمانێ ژ شارستانیەتێ و نەخویندەواری و جڤاکێ دائێخستیێ ئۆل و عەشیرەتێ بوو، کو داگیرکەران ب دارێ زۆرێ ل سەر مللەتێ کورد سەپاندبوون، لێ جیھانا ئەڤرۆ یا کورد تێدا دژین مینا ھەموو گەلێن جیھانێ گەلەک یا جودایە و ئەم ھەو دکارین خوە ب سەدەمێن کەڤن بخاپینین، چونکە نە مە باوەری پێمایە و نە ژی خەلکەکێ دی باوەریێ پێ دئینە.

ئەگەر ئەم فۆکوسا خوە بێخینە سەر باشوورێ کوردستانێ کو ئەڤە سەد سالا ڕۆڵێ پێشەنگیێ د سەرکێشیا شۆڕەش و بزاڤێن ڕزگاریخوازێن گەلێ کورد دا دبینە، دێ بۆ مە خویا بە کو ھەتا نھا کەلتۆرێ دوبەرەکیێ، نەپاکیێ، ژێیاتیا دەڤەرێ، زاراڤی، ئۆلی و عەشیرەتیێ یا زالە ل سەر تێگەھ و چاندا تاکێ کورد کو دەرئەنجامدا ڕاستیەک بۆ مە زەڵال دبە کو ئەو ژی ئەوە ژ دەرئەنجامێ ڤان شۆڕەشان ئەگەر ھندەک دەستکەفتێن مەزن و پیرۆز بدەستڤە ئینابن ژی لێ نەشییاینە چ گھۆڕینان دشێوە و ئاوایێ ھزرکرنا تاکێ کوردا بکن، لێ بەرۆڤاژی، ناکۆکی زێدەتر لێکرینە، چونکە ئەگەر تا دوھی ژێیاتی بۆ دەڤەر، میر و باوەریا ئاینی و مەزھەبی بوو، ئیرۆ پروپاگاندا حزب و ئایدیۆلۆژیان ب پێشکەفتیترین ئاڵاڤێن میدیایی ژی ھاتن سەر، و دەرئەنجامدا، جڤاک نە بتنێ پتر پەرت و بەڵاڤ بوو بەلکۆ کەلتورێ ڕق و کینێ ب ئاوایەکێ مەترسیدا زێدەبوو .
سەربۆر دبێژن، کورد دقادا جەنگی دا سووارێن ڕۆژھەلاتینە، لێ ل سەر مێزا دانوستاندێ ھەردەم شکەستخوارینە.

بێگومان ئەگەر ئەم دگەل دوژمێن خوە د دانوستاندنان دا شکەستخواری بین، دڤێت بھەمان ئاوایی دگەل ھەڤدو ژی ب وی ئاوایی بین.
واتە سستی و ئاریشەک د شێوە و سەرەدەری و بێشڤەچوونێن دانوستاندێن کوردان بخوە ژی دا ھەنە و نەشیاینە باوەریێ بۆ ھەڤدو چێبکەن، بەلکۆ ئارمانجێن دانوستاندنێ تەکتیک و کوشتنا دەمی و دەستکەفتیێن دەمکی بوونە نەپتر، چ پڵان و ستراتیژیەتا دوورمەودا ژ بۆ نەبووینە، لەوما ژی ئەگەر ھندەک جارا ڕێکەفتن ژی ژێ دەرکەفتبن، یان مینا ناڤەڕۆکەکا ڤالا نەھاتیە جی بجی کرن یانژی ئاشتیەکا سار کورتمەودا بوونە .

ئەڤا ئیرۆ ل باشوورێ کوردستانێ دقەومە، ڤەڕێژا وان ڕێکەفتنێن لەرزۆک، تەکتیکی، دەمکی و بێ باوەریێ نە، ئەوێن دناڤ بەرا ھێزێن سەردەست دا ھاتینە ئیمزا کرن، سەربۆڕان شکەستنا وان سەلماندیە و دەرفەتا دوبارەکرنا وان ژی نەھێلایە، لەوما پێدڤیە ھەموو ھێز و ل پێشیا وان پارتیا دەمۆكراتا كوردستانێ (پارتی)، یەكێتی نشتمانی كوردستان (یەکێتی) و گۆڕان سەروشنی دگەلێک روونن و ژ بۆنا دەرباسکرنا ڤێ قۆناغا ھەستیار لھەڤھاتنەکا نوو و شەفاف دوور ژ خەفک و تەڵھا دناڤبەرا خوە دا موور بکەن، چونکە مللەتی شیانێن خوەڕاگریێ نەمانە.

گەلەک جاران زاڕاڤایێ “تاقم” د ڕاگەھاندنا ڤێ حزبێ یان حزبا دی دا دھێتە بکارئانین، نەمازە ژئالیێ لایەنگرێن پارتی دژی ھندەک سەرکردێن یەکێتیێ یێن نوو، ئەز بخۆ دژی ڤی زاراڤایێمە، مادەم ئەوێن دکەڤنە د چارچۆڤێ ڤێ “تاقم” ێ دا دەنگێن یەکەم ل کۆنگرا یەکێتیێ بدەستڤە ئیناینە و بووینە سەرۆک و ڕێبەرێن یەکێتیێ، واتە ئەو نوینەرێن ڕاستەقینە یێن وێ نە، بلا ئەو ڕێبازا ل سەر دچن و پەرەی پێددەن ژی دژی ئاوات و ئارمانجێن گەلێ کورد ژی بە.
پرس ل ڤێرە ھەبوونا وانە مینا ھێزەکا چەکدار و کاریگەر کو ھەر وەختێ دوژمنان خواست دکارن بکار بینن، لەوما یا پێدڤیە ب ھەر ئاوای بە ئەو بھێن ڕاگرتن (احتواء) کرن و ژبن کاریگەریا دوژمنان بھێن دەرێخستن و ھەر لھەڤھاتن و ڕێکەفتنامەک ژی بھێت ئەنجامدان دڤێت دگەل وان بە.

دانوستاندن، پەیڤەکا لێکدایە و ڕامانێ وێ ژی خویایە، ژبۆ بدەستڤەئینا ھەر دەستکەفتیەکی پێدڤیە قوربانیدانەک ژ بۆ ھەبە، ب دیتنا من روونشتن بخوە دگەل سەرکردێن نوو یێن یەكێتیێ، دەستکەفتیەکە ژ بۆ وان، سەربۆڕێن دیرۆکێ ژی وێ ڕاستیێ دسەلمینن کو ئەگەرێن سەرەکی یێن نەپاکیێ بەرژەوەندینە، ب دیتنا من پارتی دشێت گەرەنتیا پاراستنا بەرژەوەندیێن وان بکە، چ ژ لایێ دارایی و چ ژی ژ لایێ پلە و پۆستێن سیاسی، لێ ب مەرجێ سەپاندنا دەسھەڵاتا حکومەتا ھەرێما کوردستانێ ل سەرتاسەری کوردستانێ و سەروەریا یاسا و نەھێلانا ھیچ ھێزەکا چەکدار ژدەرڤەیی دەسھەڵاتا حکومەتێ و نەھێلانا شوونوارێن دوبەرەکیا وێ ململانا دیرۆکی کو ئەڤە پترە ژ ٦٠ ساڵان گەلێ کورد پێ دنالە ب رێیا ئاڤاكرنا باوەریێ ل سەر بنەمایەکێ خوڕستی و مکوم ئەمن و ئاسایشا گەلێ کورد بەرقرار بكە.

پرسگرێكا پارتیا كاركەرێن كوردستانێ (پەکەکێ) ژی گرێدایی ڕەوشا پەیوەندیێن سیاسییێن پارتی و یەکێتیێ یە، ھەر دەمێ باوەری و سەقامگیری کەتە دپەیوەندیێن وان دا، ھیچ مەترسیەکا پەکەکێ ل سەر قەوارێ سیاسییێ باشۆرێ کوردستانێ نامینە، بەلکۆ دێ ژ کەلەڕەقیا خوە ژی داکەڤە و دێ خوە ڕادەستی کەتواری بكە، نەزێدەتر.
سەردەمێ زێرینێ پەیوەندیێن پارتی و یەکێتیێ سەردەمێ ڕێکەفتنامەیا ستراتیژی بوو، ب دیتنا من دەمێ زیندیکرنا وێ ڕێکەفتنامەیێ ھاتیە، چونکە ڕەوشا ھەستیار یا ھەرێما کوردستانێ و ئالۆزیێن دەڤەڕێ ڕێ ل ھەمبەر ھەر جۆرە شەڕەکێ گەرم گرتیە و ئاشتیەکا سەرتاسەری ل سەر بنەما و شەنگەستێن مکوم و خوڕستی پێدڤیەک دیرۆکیە.

ئیدریس بەرواری
2020.04.19