نڤیسار

هلبژارتنا ل ئیراقێ و کوردستانێ قه‌دیا لێ…

بووبێ ئه‌سه‌ر

ئه‌ڤ ده‌مه‌ک  درێژ بوو کو هه‌می کورد ب هلبژارتنا  ڕۆژا 2021.10.10 ێ كو ل ئیراقێ و کوردستانێ پێک هات، مژوول بوو بوون. هه‌لبه‌ت ئه‌ڤ گرنگ بوو.

گرنگ بوو ژ به‌ر دڤێ کوردان ب ده‌نگێ خوه‌، ب ڕه‌نگێ خوه‌، ب هه‌لوه‌ست و بریارا خوه‌ بدابا ئیسپاتکرنێ کو ئه‌و ئێدی ل سه‌رانسه‌رێ ئیراقێ ژی خوه‌دی ماف و ده‌ستکه‌فتینه‌.

مه‌ ته‌ڤان ب هه‌ڤرا دیت، خاند و گوهداری کر کو ب ئاوایه‌کی گه‌له‌مپه‌ری کورد و ب تایبه‌تی ژی پارتیا دەمۆكراتا كوردستانێ (پەدەكە) ب سه‌ر که‌ت. د چ واری دا‌ دبه‌ بلا ببه‌، سه‌رکه‌تنا کوردان دبه‌ هێز و قوه‌ت ژبۆنا کوردستانه‌کا‌ ئازاد و سه‌ربخوه‌.

ل گۆر من د ڤێ هلبژارتنێ دا‌ دیار بوو کو کورد چ دخوازن. لێ یا گرنگ ژی ئه‌وه‌ کو دڤێ ئەو پەرله‌مه‌نتەرێن کورد د پەرله‌مه‌نتۆیا ئیراقێ دا‌ ل گه‌ل هه‌ڤ بن، ب یه‌ک ده‌نگ و هه‌لوه‌ست بن دا کو بکاربن بریارا سه‌رخوه‌بوونێ د پەرله‌مه‌نتۆیا ئیراقێ دا‌ ژی مسۆگه‌ر بکن.

هوون یا ڕاستی بخوازن من خوه‌ست د ڤێ نڤیسێ دا ته‌نێ بنڤیسینم، گه‌لۆ مه‌ وه‌که‌ کورد د ڤێ هلبژارتنێ دا چ ب ده‌ست خست؟ ئه‌ز ڤێ وه‌که‌ خاله‌کا‌ گرنگ دبینم. ژ به‌ر ڤێ من خوه‌ست ب تەنێ ل سه‌ر ڤێ چه‌ند گۆتنان بێژم دا کو ئه‌م بکاربن ژ بۆنا ڕۆژێن پێش ده‌رسه‌کێ ژێ وەرگرن…

ڤێ هلبژارتنێ چ دا مه‌ کوردان؟

به‌ری هه‌ر تشتی ڕوحیه‌ته‌کا‌ ملی و کورده‌واری دا کوردان دا کو کورد خوه‌ باشتر بناسن و  بدن ناسکرنێ.

د ڤێ هلبژارتنێ دا‌ زه‌لال بوو کو دڤێ ژ بۆنا کورد ببن خوه‌دی ده‌وله‌تا خوه‌، پێویسته‌ ل سه‌ر خه‌تا نه‌ته‌وه‌یی کارێ خوه‌ بکن دا کو بکاربن ببن ده‌وله‌ت. ژ به‌ر کو ژ ڕۆژا مله‌تێ مه‌ پا‌رچه‌ کرنه‌ و هه‌تا نها داگیرکه‌ران ل گۆر بیر و باوه‌ریێن خوه‌، ب ڕێیا ئیدیۆلۆژیان مله‌تێ مه‌ خه‌پاندیه‌، به‌را به‌ر هه‌ڤ دایه‌، سه‌رێ وان ته‌ڤلهه‌ڤ کریه‌ دا کو نکاربن ڕێیا ئازادی و خه‌لاسیا خوه‌ ببینن.

لێ د ڤێ هلبژارتنێ دا‌ هاته‌ دیتن کو ڕێیا ژ بۆنا ئازادی و سه‌رخوه‌بوونا کوردان ته‌نها ڕێ و خه‌تا نه‌ته‌وه‌په‌ره‌ستیێ یه‌. ژ به‌ر ڤێ یه‌ کو ئه‌و خه‌ت ل باشوورێ کوردستانێ ب سه‌رکه‌ت. دڤێ ئێدی پارچێن دن ژی ژ ڤێ ده‌رسه‌کێ وەربگرن دا کو بکاربن خوه‌ ئازاد بکن.

هه‌لبه‌ت د ناڤا هه‌ر گه‌له‌کی دا‌ ئیدیۆلۆژی هه‌نه‌ و دێ هه‌بن، لێ دڤێ ئه‌م به‌رێ ببن خوه‌دی ده‌وله‌تا خوه‌، پاشی‌ کی ژ خوه‌ ڕا‌ چ دپارێزن ئازادن. لێ به‌ری ئازادیێ ئەگەر پێشیێ ئیدیۆلۆژیا ل پێش خوە دەینین، ئەڤ تێ واته‌یا‌ کو ئه‌م دێ نکاربن ببن خوه‌دی ده‌وله‌ت ژ به‌ر ڤێ یه‌ کو دبێژم؛ هه‌گه‌ر نه‌ ئه‌و خه‌تا نه‌ته‌وه‌یی با، کوردێن ئیرۆ ل باشوور کوردستانێ نه‌دبوونە خوه‌دیێ خوه‌ و ڤێ ده‌ستکه‌فتیێ. وێ ل سه‌رانسه‌رێ ئیراقێ نه‌بانا خوه‌دی گۆتن و بریار. وێ نه‌هاتبا ئیسپاتکرنێ کو ئێدی کورد ژی د ئیراقێ دا‌ خوه‌دی گۆتن و په‌یڤن.

خه‌ته‌که‌ دن یا هه‌ری گرنگ کو مه‌ د ڤێ هلبژاراتنێ دا‌ دیت کو ڕێیا خائین و خوه‌فرۆشان نه‌ڕێیه‌کا‌ دوور و درێژه‌. ئه‌و ڕێیا کو به‌رێ کوردان به‌ر ب داگیرکه‌ران دبه‌زاند و دبه‌زینن دێ ڕۆژه‌کێ داوی لێ بێ، مه‌ دیسا دیت کو هه‌ر چوار داگیرکه‌رێن مه‌ ل گه‌ل هه‌ڤ خه‌باتێن ب دزی دکرن دا کو خه‌تا نه‌ته‌وه‌یی ب سه‌ر نه‌که‌ڤه‌. لێ وان و نۆکه‌رێن خوه‌، وان و كرێگرتیێن  خوه‌، وان و خائینێن مه‌ کوردان ب هه‌ڤرا‌ و‌ندا کرن. د و‌نداکرنا وان دا قه‌زه‌نجکرنا خه‌تا نه‌ته‌وه‌یی یا کوردستانێ ب سه‌ر که‌ت.

ئه‌م هه‌می کوردێن وه‌لاتپارێز کو ژ وه‌لاتێ خوه‌ حه‌ز دکن، دڤێ ئه‌م ڤێ ژ بیر نه‌کن کو دڤێ ئه‌م ژی ل سه‌ر خه‌تا نه‌ته‌وه‌یی ل هه‌ڤ بن، ب هه‌ڤرا‌ کار بکن. هه‌تا کو مه‌ کوردستانا خوه‌ ئازاد کر، ئێدی کی چ فکر و نه‌رینێ دپارێزن ئازادن.

دڤێ ئه‌م ژ بیر نه‌کن کو سه‌رکه‌تنا پەدەکێ سه‌رکه‌تنا خه‌تا نه‌ته‌وه‌یی یا کورد و کوردستانێ ل سه‌ران سه‌رێ ئیراقێ و باشوورێ کوردستانێ بوو. ب ڤێ سه‌رکه‌تنێ به‌رسڤا هه‌می خائین و خوه‌فرۆشان ژی هاته‌ دایین.

ڤێ هلبژارتنێ دا زینان کو پشتی سه‌د سالان کورد نها ل خوه‌ های بوون کو دڤێ نه‌ته‌وه‌په‌ره‌ست بن. تێ گهشتن کو ته‌نها نه‌ته‌وه‌په‌ته‌ستی دکاره‌ وان بکه‌ خوه‌دی ده‌وله‌ت و ل سه‌ر ئاخا خوه‌ ئازاد بژین. لۆما باش فێر بوون کو هه‌می ئیدیۆلۆژی پشتی ده‌وله‌تبوونێ دھێت.

یا دن ژی دڤێ ئه‌م ڤێ قه‌ت ژ بیر نه‌کن کو ئه‌و که‌سێن ب ڕوحیه‌تا نه‌ته‌وا خوه‌ نه‌ژین، ب بیر و باوه‌ریا خوه‌ نه‌ نه‌ته‌وه‌یی بن، وێ هه‌ر ده‌م سه‌رده‌ستێ خوه‌ ژ خوه‌ باشتر و مه‌زنترببینن.

گه‌له‌ک تشت هه‌نه‌ کو دڤێ بێنه‌ نڤیسێن، لێ نها ئه‌ڤ به‌سه‌. باوه‌رم هاته‌ فێمکرن کو مه‌به‌ستا ڤێ نڤیسێ چ بوو.

Back to top button