هلبژارتن و رۆلا هەدەپە و هودا پار
هلبژارتنێن ترکیێ یێن ژ بۆ سه‌رۆککۆمار و ئەندامێن پەرلەمەنتۆیێ د ۱٤ێ گولانێ دا تێن ئەنجام دان. ئاشکەرایە کو ئه‌ڤ هلبژارتن دێ قه‌ده‌را ترکیێ و قه‌ده‌را کوردان ژی دەستنیشان بکه. هه‌ر چقاسی ژ بۆ مه کوردان داخواز و خوه‌سته‌کێن ل گۆر دلێ مه نه‌یێن بده‌ستخستن ژی، ب کێمانی ژ بۆ پێکهاتنا ده‌مۆکراسییه‌ک به‌رفره‌ه و سازکرنا په‌رگالا هه‌ق و حقووکێ وێ گاڤه‌ک ئه‌رێنی به.
به‌ربه‌ری و په‌ڤچوونێن کو ژ بۆ هلبژارتنێ د ناڤبه‌را تفاقا کۆماری (ئه‌ردۆگان) و تفاقا مله‌ت (کلچدارۆگلو) دا گه‌رم و خورت بوویه، ب خوه را هه‌ڤدیتن و تفاقێن نوو ژی تینه. هه‌ردو پارتییێن کو ل سه‌ر بنگه‌ه و ب ده‌نگ و رایێن کوردان هاتنه سازکرن، هەدەپە و هودا پار، ل گۆر فکر و ئیدیۆلۆژییێن خوه ژ خوه را د ناڤا ڤان هه‌ردو تفاقان دا ل جهه‌کی دگه‌رن و جهێ خوه دیتنە ژی. هەدەپە ل گۆر ئیدیۆلۆژییا براتییا گه‌لان و چه‌پیتییێ خوه نێزیکی تفاقا مکه‌ت، و هودا پار ژی ل گۆر ئیدیۆلۆژییا ئوممه‌تێ جهێ خوه د ناڤا تفاقا کۆماری، ئانگۆ ب ئه‌ردۆگان را دبینه. هه‌ر چقاسی هێشتا هه‌ڤدیتنێن هەدەپێ و تفاقا مله‌ت ، ئانگۆ کلچدارۆگلو، پێک نه‌هاتبه و بازار نه‌هاتبە کرن ژی، ئاشکەرایە کو وێ هەدەپە ل دژی ئه‌ردۆگان و ده‌ستهلاتدارییا وی پشتگرییێ بده کلچدارۆگلو. هودا پارێ هه‌لوه‌ستا خوه ئاشکه‌ره کر و که‌ت ناڤ تفاقا کۆماری یا ئه‌ردۆگان. هه‌ردو تفاق ژی هه‌سابێ خوه ل سه‌ر ده‌نگ و رایێن کوردان دکن و بێیی ده‌نگێن کوردان نکارن بسه‌رکه‌ڤن. ئه‌ڤ راستییه‌که.
به‌ری نها سه‌رۆکا ئی پارتییێ مه‌رال ئاکشه‌نه‌ر ماسا ٦ قۆلی هێلا و رۆژه‌ڤا هلبژارتنێ سه‌رووبنێ هه‌ڤ کربوو. پاشی ئاکشه‌نه‌ر تفا خوه ئالاست، یان ژی پێ دان ئالاستن و دیسا ڤه‌گه‌رییا، ڤه‌گه‌راندن ماسا ٦ قۆلی. هه‌لبه‌ت ئه‌ڤ یه‌ک ب زانایی، ب شێور و مشێورا ده‌وله‌تێ هات کرن. ئاکشه‌نه‌ر وه‌ک سیپۆپا ده‌وله‌تێ د ماسا ٦ قۆلی دا جهگرت. ترسا ده‌وله‌تێ ئه‌و بوو کو هه‌گه‌ر هەدەپە پشتگرییا تفاقا مله‌ت بکه و ل سه‌ر ماسێ هنده‌ک داخوازێن کوردان بێن قه‌بوولکرن، مه‌رال ئاکشه‌نه‌ر کاربه وان داخوازان پاشده ڤه‌گه‌رینە و نه‌هێله کو داخوازێن کوردان بێن قه‌بوولکرن. یانی، ئاکشه‌نه‌ر وه‌ک گارانتۆرا ده‌وله‌تێ ڤه‌گه‌رییا ناڤ تفاقا مله‌ت. ژ ئالییێ دن، داخوازا کو مه‌رال ئاکشه‌نه‌ر ژ سه‌رۆکێ شاره‌دارییا سته‌نبۆلێ، ئه‌کره‌م ئیمامۆگلو و سه‌رۆکێ شاره‌دارییا ئه‌نقه‌رێ مانسور یاڤاش کر، کو ببن بەربژێرێن سه‌رۆککۆمارییێ، و پشتی ڤه‌گه‌را سه‌ر ماسێ ئه‌و وه‌ک جێگرێن سه‌رۆککۆمار دان قه‌بوولکرن، جاردن هامله و پرۆژه‌یا ده‌وله‌تێ ب خوه یه. که‌مال کلچدارۆگلو هه‌م کورده، هه‌م عەلەوی یه. ژ به‌ر ڤێ یه‌کێ ده‌وله‌ت باوه‌رییا خوه پێ ناینه و نزانه کا وێ کلچدارۆگلو د پاشه‌رۆژێ دا چ بده کوردان و چ ژ وان را بکه. ژ به‌ر ڤێ، ئیمامۆگلو و یاڤاش کرن جێگرێن وی ژ بۆ ئه‌ڤ هه‌ردو زلامێن ده‌وله‌تێ وه‌ک قه‌یووم ل سه‌ر سه‌رێ کلچدارۆگلو بن و رێ نه‌دن وی کو خه‌تێن سۆر یێن ده‌وله‌تێ ده‌رباس بکه.
هەدەپە ژ ده‌مۆکراسی و ده‌مۆکراتیزه‌کرنا ترکیێ پێڤه تشته‌کی دن ناخوازه و ڤێ جارێ ژی ئاشکه‌ره کرن کو ئه‌وێ تشته‌کی دن نه‌خوازن و ل سه‌ر نه‌ئاخڤن. ده‌مۆکراسی و ده‌مۆکراستیزه‌کرنا ترکیێ ژ وان را ئه‌ساسه و د وێ باوەریێ دانە کو دێ هه‌ر تشت ب ده‌مۆکراتیزه‌کرنا ترکیێ و هاتنا ده‌مۆکراسییه‌ک به‌رفره‌ه سافی ببن. هه‌لبه‌ت ده‌مۆکراسی و ده‌مۆکراتیزه‌کرنا ترکیێ خه‌ون و خه‌یاله‌ک باشه، ده‌مۆکراتیزه‌کرن و ده‌مۆکراسییا کو ده‌وله‌تا ترک ژێ فێهم دکه وه‌ک ده‌مۆکراسییا „رۆڤی و سووک”ێ یه. رۆڤی چقاسی ل سووکێ ده‌مۆکراسییێ پێک بینه، وێ هەدەپە ژی کاربه ئه‌وقاسی ده‌مۆکراسییێ بینه ده‌وله‌ته‌ک وه‌ک ده‌وله‌تا ترک. سووک چقاسی رێ بدن رۆڤی، وێ ده‌وله‌ت ژی ئه‌وقاسی رێ بدن هەدەپێ و ده‌مۆکراسییا کو ئه‌و دخوازه. دڤێ نه‌یێ ژبیرکرن کو ترکیه وه‌لاته‌کی رۆژهلاتا ناڤینه و نه وه‌لاته‌کی ئه‌ورۆپی یه کو ده‌مۆکراسی، ده‌مۆکراتیزه‌کرن و حه‌ق و حقووقێ کوردان زوو ب زوو قه‌بوول بکه. قه‌بوولکرنا حه‌ق و حقووقێ کوردان تێ واته‌یا مرنا ده‌وله‌تێ و وێ عه‌ردهه‌ژه‌ک ژ عه‌ردهه‌ژا باکورێ کوردستانێ خرابتر بینه سه‌رێ ده‌وله‌تێ. ئه‌ڤێ راستییێ هه‌م پارتییێن ده‌وله‌تێ و هه‌م ژی ده‌وله‌ت ب خوه دزانن. ژ به‌ر ڤێ، ل شوونا کو هەدەپە بده دووڤ خه‌ون و خه‌یالێن ده‌مۆکراسی و ده‌مۆکراتیزه‌کرنا ده‌وله‌تێ، ب گاڤێن پچووک، ب داخوازێن بچووک نێزیکی حه‌ق و حقووقێ مله‌تێ کورد ببه به‌لکی پتر ماقوول به. وه‌ک داخواز و قه‌بوولکرنا زمانێ کوردی، ناسنامه و تشتێن دن.
د مه‌سه‌لا کورد و کوردستانێ دا به‌رنامەیە هودا پارێ ژ به‌رنامەیا هەدەپێ پر پێشداتره. هودا پار د به‌رنامه و پرۆگرامەیا خوه دا ژ هەدەپێ زێده‌تر داخوازێن کوردیتییێ دکه، به‌حسا فه‌ده‌راسیۆن و سه‌رخوه‌بوونێ دکه و زێده‌تر نه‌یارتییا ترکایه‌تییێ دکه. ب سه‌ر ڤی قاسی ژی تفاقا کۆماری هودا پار بۆ ناڤ تفاقا خوه قەبوول کر و هودا پار بوو پارچه‌یه‌ک ژ تفاقا ئه‌ردۆگان. هه‌لبه‌ت ئه‌ڤ یه‌ک نه گونه‌ه و نه ژی قبهه‌ته. حه‌گه‌ر هودا پار ب داخوازێن ماقوول بازار ب ئەردۆگان را کربە و کاربه ژ بۆ کوردان هنده‌ک داخوازان ب ده‌ست بخه، گاڤه‌ک ئه‌رێنی یه. هه‌روه‌ها هەدەپە ژی کاربه ل سه‌ر ئه‌ساسێ بده‌ستخستنا هنده‌ک داخوازێن ده‌مۆکراتیک ب کلچدارۆگلو را روونە، وێ ئه‌رێنی به. ئه‌گه‌ر ئه‌ڤ هه‌ر دو پارتی دخوازن ژ بۆ کوردان هنده‌ک داخوازان ب ده‌ست بخن، دکارن د هه‌ردو تفاقان دا رۆلا خوه بلیزن و داخوازێن خوه ل سه‌ر وان فه‌رز بکن. ماده‌م سه‌رکه‌تنا پارتی یان تفاقه‌کێ ب داخواز و بازاران دبه، دڤێ ئه‌ڤ هه‌ردو پارتی ژی ل سه‌ر حه‌سابێ کوردان ده‌ستڤالا بازاران نه‌کن. فه‌ده‌راسیۆن ژی تێ دا، دڤێ ب وان تفاقان را ل سه‌ر په‌روه‌رده و فه‌رمییه‌تا زمانێ کوردی، ناسناما کوردی و گه‌له‌ک داخوازێن دن یێن ده‌مۆکراتیک و ئینسانی بسه‌کنن، نیقاش و بازارێ بکن. نه ته‌نێ ل پشت په‌رده‌یان، ب عەلەنی، ل قاد و مه‌یدانان ژی ئێدی ئاشکه‌ره دۆزا مافێ مله‌تێ کورد بکن.
ل ڤر دڤێ ب گه‌له‌مپه‌ری کورد و ب تایبه‌تی ژی ئه‌ندام و ئالیگرێن هەدەپێ و هودا پارێ زختێ ل پارتی و رێڤه‌برێن خوه بکن کو ب وێره‌کی، ب جه‌ساره‌ت داخوازێن حه‌ق و حقووقێ مله‌تێ کورد بکن و بێده‌نگ نه‌مینن. دڤێ ئه‌م زانبن کو بێده‌نگی مرن، بێهه‌لوه‌ستی ژی کوشتنا مله‌تێ کورده.هلبژارتن و رۆلا هەدەپە و هودا پار
Nûrî Çelîk
