ده‌قێ په‌یاما سه‌رۆك بارزانى:
جهێ مخابنیه‌كا مه‌زنه كو د چه‌ند رۆژێن بۆرى دا د ناڤ پەرلەمانی ئیراقێ دا بزاڤه‌كا نه‌به‌رپرسیارانه و به‌روڤاژى ده‌ستوورى ژ بۆ كووركرنا پرسگێكان و بنپێكرنا مافێن ره‌وا یێن گه‌لێ كوردستانێ هه‌بوون. هه‌موو ئالی د ئاگه‌هدارن كو ژ به‌رى نوكه دانوستاندن و رێكه‌فتنێن بنیاتكه‌ر د ناڤبه‌را ئالایێن هه‌ڤپه‌یمانیا برێڤه‌برنا ده‌وله‌تێ دا ب ئاراسته‌یێ نه‌هێلانا پرسگرێكان هه‌بوون.
هه‌روه‌سا حكومه‌تا فەدەرالى یا ئیراقێ و حكومه‌تا هه‌رێما كوردستانێ گه‌هشتبوونه ده‌رئه‌نجام و رێكه‌فتنه‌كا گه‌له‌ك باش و ئه‌رێنى دا كو ئاریشە بهێنه چاره‌سه‌ركرن و هه‌مى ئالی خزمه‌تا سه‌قامگیریا وه‌لاتى و ژیان و ژیارا خه‌لكى بكه‌ن، لێ ب مخابنى ڤه هنده‌ك ئالیێن سیاسى ب نه‌فه‌سه‌كا نه‌به‌رپرسیارانه ب رێكا ده‌ستكاریكرنێ د بڕگه‌یێن پرۆژه‌یاسایا بودجه‌ىێ دا خوەستن تشته‌كێ وه‌سا بكه‌ن كو چ رامان بۆ كیانێ هه‌رێما كوردستانێ نه‌مینە، لێ ئه‌و بزاڤا نه‌به‌رپرسیارانه سه‌رنه‌گرت و هاته ژناڤبرن.
بوویەرێن چه‌ند رۆژێن بۆرى یێن پەرلەمانی ئیراقێ په‌رده ل سه‌ر روویێ راسته‌قینه یێ ئالیێن شۆفینى و موزایه‌ده‌چیان و هه‌روه‌سا هه‌مى وان ئالیان راكر یێن كو نه رێزێ ل سۆز و ئیمزایان دگرن و نه رێزێ ل بنه‌مایێن ده‌ستوورى دگرن.
د نوكه ژى دا، ئه‌گه‌ر پرۆژه‌یاسایا بودجه‌ىێ د پەرلەمانێ ئیراقێ دا هاته په‌سه‌ندكرن، هیڤیدارم ب نیازه‌كا پاقژ بهێته بجهئینان.
تەڤێ ڤێ ژی دوپاتیێ ل وێ چه‌ندێ دكه‌ین كو هه‌رێما كوردستانێ مولكێ هه‌مى گه‌لێ كوردستانێ یه و به‌رهه‌مێ خوین و خه‌باتا گه‌لێ كوردستانێ یه، دێ ب دژوارى ل به‌رسینگێ هه‌ر جۆره بزاڤه‌كێ و ده‌ستدرێژیه‌كێ بۆ تێكدان و نه‌هێلانا هه‌رێما كوردستانێ راوه‌ستین، ل ده‌ف مه، هه‌رێما كوردستانێ نه ب تنێ هێلا سۆره به‌لكو هێلا مرنێ یه و یان كوردستان و یا نه‌مانه.
مە‌سعود بارزانى
٢٠٢٣/٦/١١
