ئینکارکرنا “نه‌ته‌و-ده‌وله‌ت”بوونا کوردان، دژده‌رکه‌تنا سه‌رخوه‌بوونا کوردستانێ، پاراستنا یه‌کده‌وله‌تبوون و یه‌کپارچەییا ترکیێ وه‌ک رێیا قه‌ده‌رێ دانینه به‌ر کوردان و کوردان ب ڤان ده‌ک و دۆلابان دخاپینن، کوردان ژ خه‌تا نه‌ته‌وی ب دوور دخن. که‌مالیزمێ وه‌ک ئیدیۆلۆژییه‌ک هه‌ڤبه‌ش د مه‌ژییێ کوردان دا دکۆلن.
ب ڤی ئاوایی دخوازن کوردان ژ خه‌تا نه‌ته‌وی و نه‌ته‌وپه‌روه‌رییێ سار بکن و چاڤره‌شی بکن.
کوردێن کو ل نه‌ته‌وا خوه و سه‌رخوه‌بوونا وه‌لاتێ خوه خوه‌دی ده‌ردکه‌ڤن ژی ب تۆهمه‌تێن وه‌ک “نه‌ته‌وپه‌روه‌رێن پاشڤه‌روو” ب ناڤ دکن. ئه‌ڤ تۆهمه‌تێن سڤک و دووری ئاقلان ژی هه‌لبه‌ت ژ سه‌رێ کانییێ، ئانگۆ ژ ده‌لهیزا ده‌وله‌تا ترک دپژقن و په‌شکان ل کوردان دخن.
ئۆجەلان د هه‌ڤدیتنا هه‌ری داوین دا هەدەپە فراند به‌ر په‌رێ ئه‌زمانان و کوردێن کو ل دژ ده‌ردکه‌ڤن ژی دیسا مۆهرا “نه‌ته‌وپه‌روه‌رێن پاشڤه‌روو” ل وان خست. د ڤر دا گۆتنێن ئۆجەلان و هه‌ڤالبه‌ندێ وی هه‌ڤدو ته‌مام دکن. یانی، هەدەپە و پارتیێ تفاقدارێن وێ ب راستی ژی ژ بۆنا کو نه‌ته‌وپه‌روه‌رییا کورد بێ ئاسته‌نگکرن هاتنه ئاڤاکرن.
مله‌تێ کورد د دیرۆکا خوه دا هه‌ر فه‌داکاری کریه. ب مال و جانێ خوه ڤه پشتگری دایه دۆزا خوه، دۆزا کورد و کوردستانێ. لێ چ هاتبه سه‌رێ ڤی مله‌تێ مەزلووم، هه‌ر ب ده‌ستێ هندەک سه‌رۆک و رێڤه‌برێن خوه‌فرۆش؛ یێن کو فەرمانێن خوە ژ داگیرکەران وه‌ردگرن، هاتیه سه‌ری.
که‌سێن کو سه‌رۆکاتی و رێڤه‌برییا ڤی مله‌تێ فه‌داکار کرنه، فه‌داکاری و دلسۆزییا مله‌تێ کورد یان ژ بۆ به‌رژه‌وه‌ندییێن خوه و یان ژی ژ بۆ به‌رژه‌وه‌ندییێن ده‌وله‌تێن داگیرکه‌ر ب کار ئانینه.
ژ به‌ر کو روحێ نه‌ته‌وی، ئه‌ڤین و ئه‌ڤیندارییا کورد و کوردستانێ ب وان را نەبوو و نینە، ژ وان را هه‌ر رێ مەشروعە. ژ به‌ر ڤێ، کورمێ دارێ ژ دارێ ده‌ردکه‌ڤه.
که‌سێ کو ئه‌ڤیندارێ تشته‌کی نه‌به نکاره خوه د به‌ر وێ ئه‌ڤینێ دا فه‌دا بکه. ژ به‌ر ڤێ ژی، پر ب هێسانی کارن که‌د، خوهدان، خوین و ده‌رفه‌تێن کو ب خوینا شه‌هیدان هاتنه بده‌ستخستن، فه‌دا بکن و دکن ژی.
ئیرۆ خوین و خوهدانا شه‌هیدێن کوردستانێ ژ بۆ پەکەکێ و یێن پێڤه گرێدایی هاتنه فه‌داکرن.
ژ بۆ ده‌مۆکراتیک جمهوورییه‌تا ترکۆ، ژ بۆ یه‌کپارچە و یه‌کرێزییا ده‌وله‌تا ترکۆ هاتنه فه‌داکرن.
هه‌لبه‌ت کورد ژی نه کوردێن به‌رێ نه. ب هه‌زاران کوردپه‌روه‌ر و نه‌ته‌وپه‌روه‌ر د ناڤ ره‌ف و بنگه‌ها پەکەکە، دبەپە دا هه‌نه.
ئه‌و کوردێن کو ب مال و جانێ خوه، هه‌ر تشتێن خوه ژ کوردستانه‌ک سه‌ربخوه را فه‌دا کرنه، وێ ل که‌د و خوهدانا خوه ژی خوه‌دی ده‌رکه‌ڤن و وێ بێده‌نگ نه‌مینن.
وێ بێده‌نگ نه‌مینن کو پارتییێن چه‌قلماست وه‌ک پەکەکە و هەدەپە ل سه‌ر خوینا زارۆکێن وان بچەرن. وێ بێده‌نگ نه‌مینن و رازی نه‌بن کو دژبه‌رێن نه‌ته‌و-ده‌وله‌ت ولۆ ب هێسانی خوینا زارۆکێن وان د تاسا زێرین دا پێشکێشی که‌مالیستێن ترک بکن.
وێ بێده‌نگ نه‌مینن کو هنده‌ک تاجرێن سیاسی ل سه‌ر پشتا که‌چ و خۆرتێن وان بازرگانییا خوینێ بکن.
نێزیک لێ نه دوور، هه‌لبه‌ت وێ ل دژ ڤێ کامباخیا وه ده‌نگ ژ کوردێن فه‌داکار و خوه‌دی خیره‌ت ده‌رکه‌ڤه.
ب کورت و کورمانجی؛ هه‌ڤال ده‌نگ ژ خوه ڤه‌ده!
