ده‌وله‌تێن مه‌زن پلان و پرۆژه‌یێن 50-100 سالی ئاماده دکن و پاشه‌رۆژا ده‌وله‌تا خوه ل گۆر وان پلان و پرۆژه‌یان ساز دکن. پشتی سالا 1965ێ، ب دامه‌زراندنا پەدەکە/تركیێ و پارتییێن دن و ب باندۆرا شۆره‌شا ’ستەفا بارزانی، هه‌ست و ڕامانێن نه‌ته‌وی و کوردستانی ل باکور خورت بوون، کوردێن باکور ژ خه‌وا گران شیار بوون. شیاربوون و پێشکه‌تنا هه‌ستێن نه‌ته‌وی ترس و لەرز خستە دلێ ڕایه‌دارێن ده‌وله‌تا ترک. ژ ئالییێ دن ڤە، ژ تێکچوونا په‌یمانا لۆزانێ ڕا ژی 50-60 ساله‌ک مابوو. ئه‌ڤ ژی دهات واته‌یا گوهه‌رتنا نه‌خشه‌یا ڕۆژهلاتا ناڤین و دامه‌زراندنا کوردستانه‌ک سه‌ربخوه. ئه‌ڤان هه‌ردو بوویه‌ران ده‌وله‌تا ترک مه‌جبووری پلان و پرۆژه‌یێن نوو کر و پەکەکە د ئه‌نجاما ڤان پلان و پرۆژه‌یان دا هات ئاڤاکرن. ئۆجەلان بیلاسه‌به‌ب نابێژه “من پەکەکە ب پاره و چه‌کێن میتێ ئاڤا کر”.
پەکەکە ب کوژتنا کوردان ده‌ست ب شۆره‌شا خوه کر و د ناڤا 40 سالان دا زێده‌یی 100 هه‌زار کورد كوشتن یان دان کوژتن. پەکەکە گوند و باژارێن کوردستانێ ژ کوردان خالی و ڤالا کر، مڵه‌تێ کورد مه‌جبووری کۆچ و په‌نابه‌رییێ کر، هه‌ستێن نه‌ته‌وی د گیانێ کوردان دا نه‌هشت و بوو سه‌به‌بێ پشافتنا زمانێ کوردی. پووچکرنا هه‌ستێن نه‌ته‌وی، ڤالاکرنا کوردستانێ و تێکبرنا کوردێن باکور ئارمانجا وێ یا سه‌ره‌کی بوو. پەکەکە ل سه‌ر ڤێ بنگه‌هێ هات دامه‌زراندن و د شۆره‌شا خوه یا باکور دا ب سه‌رکه‌ت و گها ئارمانجا خوه (!). پەکەکە دخوازه هه‌مان شۆره‌شا وێرانکرن و ونداکرنا کورد و کوردستانێ ل باشوور، ڕۆژاڤا و ڕۆژهلات ژی پێک بینه. ژ خوه سه‌ده‌ما کو ل باشوور، ڕۆژاڤا و ڕۆژهلات ب جیھ بوویه ژی ئه‌ڤه.
پەکەکە ئاشکه‌را شه‌رێ کورد و کوردستانێ دکه. د ڤێ هه‌لوه‌ستا خوه دا دروست و ڤه‌کری یه. پارتییا کو دژمناتییا کوردستانه‌ک سه‌ربخوه بکه و پاراستنا سینۆرێن ده‌وله‌تێن داگیرکه‌ر ژ خوه ڕا بکه ئارمانج، بێگومان دێ ئێریشی پێشمه‌رگه‌یان ژی بکه، دێ وان بره‌ڤینه ژی، وان بکوژه ژی. ما پەکەکە نه ژ بۆ ڤێ ئارمانجێ ده‌رکه‌تیه هۆلێ؟ به‌لێ.
ئه‌ساس ل ڤر پارتییا کو دڤێ بھێتە ڕه‌خنه‌کرن و هه‌تتا ڕه‌خنه‌یێن پر توند ژی لێ بێن کرن، پەدەکە و بارزانی نه. پەدەکێ یا کو د 1983ێ دا ب پەکەکێ ڕا پرۆتۆکۆل چێکر، ب هه‌ر شێوه‌یی ئالیکارییا وان کر، ئه‌و ل باشوور ب جھ کر و کر به‌لا سه‌رێ هه‌موو کوردان، چما نکاره ل دژی پەکەکێ هه‌لوه‌سته‌ک ئاشکه‌ره، وێره‌ک و توند بستینه؟
چه‌ند پرس و پێشنیاز.
وه‌ک میناک؛
1- پەکەکە یا کو د قادا ناڤنه‌ته‌وی دا د لیسته‌یا ته‌رۆرێ دا یه و وه‌ک ڕێخستنه‌ک ته‌رۆریست تێ ناسکرن، چما ژ ئالیێ پەدەکێ ڤه ب قوربان و حه‌یران تێ پاراستن؟
2- ب قاسی کو پەدەکێ ئالیکارییا پەکەکێ کریه و ئه‌و پاراستیه، ئالیکارییا دۆست و هه‌ڤالبه‌ندێن خوه نه‌کریه. هه‌که ل شوونا پەکەکێ ئالیکارییا دۆست و هه‌ڤالبه‌ندێن خوه یێن ل باکور و ڕۆژاڤا بکرا یان ژی خوا ل باکور و ڕۆژاڤا بهوونا، نها وێ ڕه‌وشا باکور، باشوور و ڕۆژاڤا پر جودا بوویا. وێ پەکەکە نکاریبا وه‌ک ئیرۆ زیانێ بدایا هه‌موو کوردان.
3- هوون دخوازن 24 کاتژمێران پەکەکێ وه‌ک پارتییه‌ک کورد بناسن، وێ وه‌ک ته‌رۆریست نه‌بینن و بێژن “ئه‌م شه‌رێ براکوژی ناخوازن”، پەکەکە چوجاری نه‌بوویه و نابه پارتییه‌ک کوردستانی و هوون بخوازن یان نه‌خوازن دێ پەکەکە شه‌رێ وه بکه. یان دڤێ هوون نه‌ته‌و-ده‌وله‌ت و کوردستانه‌ک سه‌ربخوه نه‌خوازن و وه‌ک پەکەکێ یه‌کرێزییا سینۆرێن داگیرکه‌ران بپارێزن، یان دێ پەکەکە شه‌رێ وه بکه و هه‌ر ڕۆژ پێشمه‌رگه‌یان بره‌ڤینه و بکوژه.
4- پەکەکە چوجاری ژ به‌رلێگه‌رین و قوربان و حه‌یرانێ فێهم ناکه. یان دڤێ هوون ده‌ڤ ژ چیرۆکا “شه‌رێ براکوژیێ” به‌ردن و ب زمان و هه‌لوه‌ستا پەکەکێ به‌رسڤا پەکەکێ بدن، یان ژی د چاڤێ کوردان و ئاورا گه‌له‌مپه‌ری دا هوونێ بچووک بکه‌ڤن و دێ چو ڕێز و پایه ژ وه ڕا نه‌مینه. هه‌گه‌ر هوون دخوازن براستی ژ گه‌ف و خه‌زه‌با پەکەکێ خلاس ببن، دڤێ هوون دوورشما “زۆر گیزه‌رێ ڕادکه ” ژ خوه ڕا بکن ڕێباز.
5- هه‌گه‌ر براستی هوون دخوازن ژ گه‌ف و خه‌زه‌با پەکەکێ و ده‌وله‌تێن داگیرکه‌ر خلاس ببن، دڤێ هوون خوه ژ سیاسه‌تا “ته‌نگ و هندک و ڕندک” ئازاد بکن، ژ بۆ چوار پارچه‌یێن کوردستانێ سیاسه‌ته‌ک نه‌ته‌وی بمه‌شینن، ب هه‌ر ئاوا و ده‌رفه‌تێ ئالیکارییا پارتییێن دۆست بکن و هه‌ڤالبه‌ندێن خوه خورتتر بکن.
و ب ده‌هان پرس و پێشنیازێن دن….
ب کورد و کورمانجی؛ پەکەکە ب ڕه‌ڤاندن، کوشتن، تێکدان و ده‌ستتێوه‌ردانان ئه‌رک و کار و خزمه‌تا خوه دکه.
باشه، ل هه‌مبه‌ر کریارێن پەکەکێ، پەدەکە چ کریه، چ دکه و دێ چ بکه؟
2021.09.17
