شاندەیەکا هەدەپێ ل گرتیگه‌هێ ده سه‌ردانا هه‌ڤسه‌رۆکێ به‌رێ یێ هەدەپێ سه‌لاحەدین ده‌مرتاش کر و ژێ را پێشنیار کرن کو، ببه به‌ربژێرێ هەدەپێ یێ سه‌رۆککۆماریا ترکیێ.
ل گۆر داخویانیا هەدەپێ، سه‌لاحەدن ده‌میرتاش سپاسیا شاندەیێ کریه و دیار کریه کو ره‌وشا وی یا حقووقی ژ بۆ به‌ربژێریا سه‌رۆککۆماریێ ده‌ستناده.
ده‌میرتاش ئاشکه‌ره کریه، ئه‌و دێ پشتگریێ بده نامزه‌تێ کو تفاقا که‌د و ئازادیێ وه‌ک نامزه‌تێ هه‌ڤپار ژ بۆ سه‌رۆکۆماریێ دیار بکه.
هەدەپێ هه‌تا وه‌ک ڤێ گاڤێ دده خوویاکرن کو، ئه‌و دێ به‌ربژێرێ پارتیتا خوه ژ بۆ سه‌رۆککۆماریێ ده‌ستنیشان بکه. هه‌تا هەدەپێ دا خوویاکرن کو، ئه‌ڤه ده‌مه‌که ئه‌و د ناڤا خوه دا ژ بۆ ده‌ستنیشانکرنا به‌ربژێرێ سه‌رۆککۆماریێ راپرسینێ چێدکن و هه‌ری داوی ل سه‌ر دو ناڤان سه‌کنینه. ل گۆرا هەدەپێ یه‌ک ژ وان ده‌مرتاشه و ده‌مرتاش ژی ژبەر کو ره‌وشا وی ده‌ست ناده قه‌بوول نه‌کریه. باشه به‌ربژێرێ دی کیه؟ دڤێ هەدەپە ڤێ یه‌کێ ئاشکه‌ره بکه.
لێ هەدەپە یاریەکا دن دکە و ئەو ب هه‌موو ئاوایی هه‌ولدده کو، دگه‌ل جەهەپێ ب ئاوایه‌ک ئاشکه‌ره بکه‌ڤه د ناڤا هه‌ڤکاریه‌کێ دا. ژ به‌ر کو هەدەپە ناخوازە وه‌ک هلبژارتنێن بەرێ یا شه‌ره‌داریان ب ڤه‌شارتی پشتگریا جەهەپێ بکه. تێزانین کو ئاوایێ تفاقا نه‌هێنی د ناڤبه‌را هەدەپێ و جەهەپێ دا ببوو سه‌ده‌ما گه‌له‌ک گۆتوبێژان و هه‌ردو ئالیان هه‌ڤ تاوانبار دکر و د ڤێ ده‌ربارێ دا هه‌لوه‌ستا هەدەپێ گه‌له‌ک هاتبوو ره‌خنه‌کرن.
خاله‌ک گه‌له‌ک ڤه‌کری هه‌یه کو، ئه‌گه‌ر هەدەپە به‌ربژێرێ خوه یان ژی به‌ربژێره‌ک هه‌ڤبه‌ش ل گه‌ل تفاقا کو سه‌رکێشیا وێ دکه یا (که‌د و ئازادی)ێ ده‌ستنیشان بکه، ئه‌ڤ ڤه‌کری تێ واته‌یا هاریکاریا ئه‌ردۆگان. نا ئه‌گه‌ر تو به‌ربژێرا ده‌ستنیشان نه‌که و پشتگریا کلچدارۆگلو بکه، یان ژی بێژه ئه‌م هلبژارتنا سه‌رۆککۆماریێ بۆیکۆت دکن، ئه‌ڤ یه‌ک ژی تێ واته‌یا کو هەدەپێ ل گه‌ل جەهەپێ وه‌ک هلبژارتنا شه‌ره‌داریان ل هه‌ڤهاتنه‌ک نه‌هێنی کریه.
ژ ئالیه‌ک دن پرسا هه‌ری گرینگ ئه‌وه کو، بریارا هەدەپێ ژ کوو ده‌ردکه‌ڤه. گه‌لۆ قه‌ندیل بریارێ دده یان ده‌ستهلاتا هەدەپێ خوه‌دییێ بریارێیه د ڤێ ده‌ربارێ دا؟
که‌سایه‌تێن وه‌ک ئەحمه‌د تورک ڤه‌کری دبێژن ئه‌م دێ پشتگریا سه‌رۆکێ جەهەپێ کلچدارۆگلو بکن. مه‌یلا قه‌ندیل ژی ل سه‌ر کلچدارۆگلو یه. لێ پێنگاڤا داویێ چ دبه پیچه‌کی مژودومان ل سه‌ر هه‌یه.
٢٠٢٣/١/٢٨
نێرین / شرۆڤه
