هەرێما کوردستانێ د ستێرکا گروپێن تیرورستی دا یە:
د ناڤا ئەڤ سالە دا، هەرێما کوردستانێ پتر ژ جارەکێ کەتیە بەر هێرشێن تیرۆرستی ژ لایێ پتر ژ گروپەکێ ڤە و پتر ل جهەکی و پتر ب ئامرازەکی؟!
پسیار چما هەمی گروپێن تیرۆرستی نها مژولی لێدان و دژاتیکرنا هەرێما کوردستانێ نە؟ چ ڤان گروپێن ئایدیۆلۆژی و تائیفی و رادیکالی د ئێک سەنگەر دا ل هەمبەری هەرێما کوردستانێ کوم دکەت؟ هەرێما کوردستانێ دێ شێت بەرهنگاریا ڤان هەمی گروپا بیتن؟
ئەگەر ئارمانجا پەکەکێ ژ هێرشکرنا ل سەر هەرێمی یا جودا بیتن ژ یا گروپێن تائیفی یێن شیعە مەزهەب ب کاتیوشا و درونا ژ یا داعش ب ئارمانجگرتنا خەلکێ سڤێل و هێزێن پێشمەرگەی، بەلێ هەمی د دەمەکی دا نە کو ئیراق یا د سەردەمەکی دا دەرباز د بیت کو دەولەت ژ هەر دەمەکی لاوازترە هەمبەری گروپێن خوە د سەر دەولەتێ را د بینن و ژ دەولەتێ هێز و شەرءیەتێ وەردگرن.
د دەولەتەکێ دا هێز د دەستێ میلیشاتا دا بیتن هەلبەت دێ رەواج بوو گروپێن سەربەردایی بیتن و دێ بنە ئامرازێن جێبەجێکرنا سیاسەت و ئایدۆلۆژیا ژناڤبرنا ئەوێن نەکەڤنە د بازنێ وان دا.
هەرێما کوردستانێ هەتا نها وەک کەلهەکێ بەرامبەر ڤان گروپا مایە ئاسێ، ل تخوبێن کوردستانێ و ل سەر دەستێ پێشمەرگەی ئەڤ گروپە هاتینە شکاندن و پاشڤەبرن.
لەوما ئەوا ڤان گروپان پێکڤە گرێددەت ئەوە، هەبونا ژینگەها بهێزە یا پشتەڤانیێ ژ پتر ژ ژێدەرەکی و بۆ پتر ژ ئارمانجەکێ، دگەل گوهرینا بنەرەتی یا سپونسەرێن ڤان گروپان د ڤێت ئیراق بەرەف پێشڤە بچیت هەرێما کوردستانێ ئاستەنگ و خالا لاوازا بەرنامێ وانە چونکە هەرێم تشتەکێ جودایە ژ وان و خوە ل سەر ئەردی وەک ئەزمونەکا باش و سەرکەفتی خوە دایە نیاسین.
ئەڤ گروپە تنێ ئامرازن تێن ب کارئینان بۆ لێدانا هەرێما کوردستانێ چونکە هەرێم شیایە ژ لایێ سیاسی و پەیوەندی و یاسایی ڤە وەک کیانەکێ ئاڤاکەر و ئارام و هاریکەر بۆ پێشدابرنا دەڤەرێ و شیایە پارسەنگا پەیوەندیێن خوە یێن هەرێمی و ناڤدەولەتی راگریت، لەوما تنێ دەرفەت وان هەیە ل پشت ڤان گروپان خوە ڤەشێرن و ئەجندایێن خوە یێن هوڤانە و دکتاتۆری و پاشڤەمایی ب رێکا ڤان گروپان و کرێگرتیێن خوە کو رەوشا هەرێمی پێ تێکبدەن و ڤشارێ ل سەر هەرێمی دروست بکەن.
هەرێما کوردستانێ هەتا نها شیایە خوە ل ڤان هەمی پیلان و هێرشان بگریت، و ل داهاتی ژی د شیان دایە خوە ل بەر بگریت، و ئەڤ هێرشە دەرفەتەکا باشە ژ بۆ هندێ کو هێزێن پێشمەرگەی باشتر بهێنە رێکخستن و ئێکگرتن چونکە ئەرکێ هەمیان پاراستنا هەرێما کوردستانێ یە و ل داهاتی پێشبینی دکەم دێ هێرش بەردەوام بن و بەرفرەهتر لێ بهێن، چونکە وان دڤێت هەرێما کوردستانێ ب ڤان شەرا ڤە مژیل بکەن و پێ دەم و هێزا هەرێمێ ب مەزێخن و ژ ئارمانجێن ستراتیجی دوور بێخن.
گرنگە هەرێم خوە دگەل ئیراقێ ئێک لا بکەت ژ لایێ هەماهەنگیێ و هەفکاریێ ڤە و راستەوخوە ژ هێزێن هەڤپەیمانێن دژی داعش و تیرۆرێ هەفکاریێ و هەماهەنگیێ بخازیت و ل سەر ئاستێ ناڤخوە پروسا ئێکگرتنا هێز و سەرکردایەتیا پێشمەرگەی ل بن سیبەرا حکومەتا هەرێما کوردستانێ لەزێ لێ بکەت
ئەگەر ئەف هێرشە ب ئازارن و قوربانیێن جەرگ بر لێ دکەڤن، هاندەرن بۆ پتر رێکخستنا ناڤمالا خوە و ل سەر هەمی هێزێن سیاسی دکەڤیت پتر ل سەر بابەتێن نیشتمانی و مروڤاتی و دیموکراسیێ لێکنێزیک ببن و ئەڤان هێرشان ب جدی وەرگرن و نەکەنە بابەتەکێ مزایداتێن سیاسی و خوە ڤەدزین ژ بەرپرسیارەتێن خوە بەرامبەر خەلکێ کوردستانێ و چارەنڤیسێ وان.
خالد ئەحمەد ئەحمەد
