ئەڤە بۆ دەمەکێ درێژە من چ گۆتار و دیدێن خوە ل سەر روودانان بەلاڤ نەکرنە. هەر چەندە روودان دگەرمن و باندۆرا وان روودانان ل سەر کوردستانێ ب زەقی دیارە.
ئەگەرێن بێدەنگیا من، نە بێهەلوێستییە یان من چ هەلوێست بەرامبەری روودانان نینن و وەکو گەلەکا ل بەندا بیڤەکێ بم دا لایەنکێ سیاسی دەستخوەشیێ ل من بەکت، نەخێر بەلکو ل وێ باوەرێمە ئێدی گۆتار و شرۆڤە بەرامبەری روودانان ل جەم خاندەڤانان و ب تایبەت ل دەڤەرا مە بەهدینان دو عانێن سۆرێن سەردەمێ پاشاتیێ نائینن.
ڤەکری دبێژم دەڤەرا مە بەهدینان ژ لایێ پێشکەفتنا جڤاکی و دروستبوونا کەسەکێ ئازاد د قۆناغا چەرخێن ناڤین دایە، هێشتا ژ قۆناغا ئاوێتەیا کۆچەری-دەربەگایەتیێ ب دروستی دەرباز نەبوویە و کولتۆرێ وێ قۆناغا ئاوێتە(کۆچەری-دەربەگایەتی) د هەر بیاڤەکی دا دیارە.
کولتۆرێ ئاوێتە یێ دو قۆناغا (کۆچەری-دەربەگایەتی) نکارت مرۆڤەکێ سەردەمانە و ئازاد بەرهەم بینیت، د پرۆسەسا پێشکەفتنا جڤاکی دا دبیتە سنگرە و گوهۆرینێ د سیستەمێ برێڤەبرنێ دا سنگەپێ دکەت، دگەل هەلگرێن مۆدرەنەتێ و داخازکەرێن ڤەگەراندنا شکۆیێ بۆ تاکە کەسی د هەڤرکیەکا ئالیسەنگ دانە ، ئالێ ترازیێ بۆ کولتۆرێ ئاوێتە (کۆچەری-دەربەگایەتی) دادگێریت.
دروستبوونا جڤاکێ سڤیل و بزاڤێن جڤاکی چ بزاڤێن داخازکرنا ئازادیا ژنێ بن یان ئتنی و جێندەری بن سیمایێ جڤاکێن مۆدەرن و سەردەمیانەنە، بەرهەمێ خەباتا کۆمکێن جڤاکینە و ب ئازادانە خەبات بۆ بهێتە کرن، ژ خوە ئازادیا هەلبژرتنا دینی و دینگوهۆرین ب چ رەنگا ناهێتە پەژراندن، ئەڤە تەڤ ل دەڤەرا بەهدینان ب دووراتیا عەرد و عەسمانان ژ هەڤ دوورن، تەڤ سەکۆیێن راگەهاندنێ چ مزگەفت، خاندگەه، پارتێن سیاسی و تەڤ دەزگەهێن راگەهاندنێ یێن نڤیسکی، رادیۆ، تەلەفزیۆن ، تۆرێن جڤاکی ب ئێک ئاواز ل دژی هەر گوهۆرین و پێشکەفتنەکا جڤاکینە و پاسەوانێن کولتۆرێ ئاوێتە(کۆچەری-دەربەگایەتی) نە.
ب ڤێ زهنیەتا ئەڤرۆ ل دەڤەرا بەهدینان سەردەست. نە هەلبژارتن و نە چ بزاڤێن دخازن ڕەوتێ جڤاکێ کوردستانێ بەرەف پێشکەفتنێ و مۆدەرنەتێ ببەن و زڤرینا شکۆیێ بۆ تاکی و تاک ببیتە بها دێ بیتە ئەگەر بۆ پەیدابوونا گوهۆرینێ.
هەلبژارتن د جڤاکێن پێشکەفتی دا دبیتە ئەگەر بۆ باشترلێکرنا سیستەمێ برێڤەبرنێ و چارسەرکرنا وان ئاریشێن هەینە. بەری هەلبژارتن بهێنە کرن، هەر لایەنەکێ سیاسی پرۆگرامێ خوە بۆ برێڤەبرنا پشتی هەلبژرتنان بەلاڤ دکەن و ل سەر پەیادەکرن و بجهئینانا وی پرۆگرامی دەنگ بۆ دهێتە دنان و هەردەما ئەو پرۆگرام نەهاتە بجهئینان، د هەلبژارتنێن ل پەی دا دهێنە سزادان و کورسیکا دەستهەلاتێ جارەکا دی نابیننڤە.
جڤاکێن هشیار و پێشکەفتی سەرکردێن خوە یێن تەخسیری و گەندەلی کری، سزا ددن و راپێچی دادگەه و زیندانان دکەن، لێ یێن کوردستانێ؟ پەرێ وەکو بەرێ و سەرەڕای ڤان قەیران و سنگەپێیا جڤاکێ کوردستانێ د رێڕەوا پێشکەفتنێ دا و هێشتا ژ شکەفتا (ئەفلاتۆنی) دەرنەکەفتیە!
ژ بەر ڤان ئەگەرێن من ل ژوور بەر چاڤ كرین، من خوە بێدەنگ کر و خوە ژ ململانا زڤرینا ل دۆر بازنا ڤالە ڤەکێشا.
ئەڤ هەبلبژارتنە هیچ گوهۆرینەکێ د گەل خوە نائینیت بەلکو دێ وەکو بەرێ بیت و پارتی و ئێکەتی دێ حوکمەتێ پێک ئینن، حزبێن دی بخازن یان نەخازن دڤێت ببنە ئوپۆزسیۆن، چونکو سیاسەتا بەرخوەریا هەلبژارتنا (استیحقاق ئنتیخابی) حوکمەت شەلەلی و ئیفلیج کربوو.
خودێ کوردستانێ ژ بۆغز و چاڤنەباریا داگیرکەران بپارێزیت.
