هەموو ئاخافتنا نێچیرڤان بارزانی د کۆنگرەیا ١٤ ێ دا
ئاخافتنا برێز نێچیرڤان بارزانی جیگرێ یه‌که‌م یێ سه‌رۆکێ پارتیا ده‌مۆکراتا کوردستانێ (پدک) ل ۱٤ئه‌مین کۆنگره‌یا پارتی ل دوهۆکێ.
جەنابێ سه‌رۆک مه‌سعود بارزانی
هه‌ڤالێن هێژا
ئەندام و جەماوەێ پارتیا ده‌مۆکراتا کوردستانێ
رۆژ باش
د ڤێ رۆژێ دا ژ جه‌نابێ سه‌رۆک، ژ وه هه‌موویان و کۆنگره‌یا پارتیا مه را سه‌رکه‌فتنێ دخوازم. سه‌رکه‌تنا کۆنگره‌یا ۱٤مین یا پەدەکێ وێ ببه سه‌رکه‌فتنا ته‌ڤاهیا پەدەکێ و دێ هه‌موو گه‌لێ کوردستانێ خورت بکه.
ئه‌ز سپاسیا سه‌رۆک مه‌سعود بارزانی دکم کو وه‌ک جیگرێ سه‌رۆکێ پەدەکێ باوه‌ری دا من. باوه‌ری و په‌ژراندنا وی ژ بۆ من هێزا هه‌ری مه‌زن و گرینگه ژ هه‌ر ئالیان ڤه. برێز سه‌رۆک، سۆزا مه هه‌ر تم ئه‌و بوو کو ئه‌م ب بیر، باوه‌ری و ئارمانجێن وە را دلسۆز بن. هه‌موو خه‌بات و ئارمانجێن وه تێکۆشینا ئاشتی، ئازادی و پێشکه‌تنا کوردستانێ بوویه.
برێز سه‌رۆک، هوون سه‌مبۆلا تێکۆشین و به‌رخوه‌دانا گه‌لێ کوردستانێ نه. ده‌ما سه‌رۆک بارزانی رێڤەبەریێ دکە، هه‌موو گه‌لێ کوردستانێ خوه ب هێز دبینە دکه. گەلێ کوردستانێ ب باوه‌ره کو ئه‌وێ دێ مافێن وان یێن نه‌ته‌وی و نشتمانی بپارێزه.
گه‌لێ کوردستانێ گه‌له‌ک ده‌ستکه‌فتیێن دیرۆکی ب ده‌ست خستنه. سه‌رۆک بارزانی رۆله‌که مه‌زن د بده‌ستخستنا ڤان هه‌موو ده‌ستکه‌فتێن گه‌لێ کوردستانێ دا لیستیه. ژ بۆ پاراستنا ڤان هه‌موو ده‌ستکه‌فتیان هه‌ر تم خه‌بتیه. ده‌ما فه‌رمانداریا شه‌رێ ل دژی داعشێ دکر، ل سه‌ر ناڤێ هه‌موو جیهانێ نرخێن ئازادی، ژیانا هه‌ڤبه‌ش و لێبۆردەیی د پاراست.
دڤێ ئه‌م هه‌موو ئالیکاریا جه‌نابێ سه‌رۆک بکن ژح بۆنا یەکرێزیا ناڤخوەیی و هەموو پارتی و ئایێن کوردستانی، ژ به‌ر کو ئارمانجا جەنابێ وی هه‌رتم ئه‌وه کو گه‌لێ کوردستانێ د ناڤا ئارامی و ئازادیێ دا بژی و کو ئه‌ڤ ژی یه‌کانه رێیا پێشکه‌تنا کوردستانێ یه.
یه‌کێتیا ناڤخوه‌یی یا پەدەکێ ژێده‌رێ هێزا سه‌ره‌کیه ژ بۆ ئه‌ندام و جه‌ماوه‌رێ پارتییا مه کو هه‌ر تم باوه‌ریه‌کا مه‌زن ب به‌رده‌وامیا سه‌رکه‌فتنا پەدەکێ هه‌یه. ژ به‌ر ڤێ یه‌کێ هوون دبینن کو پەدەکە هه‌ر تم ب سه‌ر دکه‌ڤه. دڤێ ئه‌م وێ یه‌کێتیێ، ب هه‌ر بوهایه‌کی به، بپارێزن.
د کۆنگره‌یا داوی دا من گۆت دڤێ پەدەکە ببه پارتیا پرانیا کوردستانێ و ب هیمه‌تا هه‌موو ئالیان مه کاری و مه ئەو کر. ئه‌م دێ به‌رده‌وام بن ل سه‌ر خه‌بات و به‌رفره‌هکرنا خزمه‌تگوزاریان، باشترکرنا ژیانا گه‌لێ کوردستانێ و بهێزکرنا یه‌کرێزیا هه‌رێما کوردستانێ، ژ بۆ کو دا ئه‌م ببن پارتیه‌کا خوەدی پرانیەکا تمام ل کوردستانێ.
جهێ کێفخوه‌شیەکا مەزنە کو به‌شداریا ژنان د کۆنگره‌یا ۱٤ێ یێ پارتیا مه دا به‌رفره‌ه بوویه، لێ دڤێ ئه‌ڤ به‌رفره‌هبوون د خه‌باتا پارتیێ دا ژی ده‌رکه‌ڤه هۆلێ. دڤێ پەدەکە زێده‌تر ده‌رفه‌تان ژ ژنان را ڤه‌که کو به‌شداری حکوومه‌تێ ببن. ژنێن کوردستانی ژیر و ژێهاتی نه، ژنێن پەدەکێ د وان قادێن کو کار و به‌رپرسیاری لێوه‌رگرتنه دا ئه‌رکێن خوه باش ب جهئانینه.
دڤێ ئه‌م ده‌نگ و رۆلا ژنان د پەدەکێ دا مه‌زن بکن. ژ بۆ دابینکرنا مافێن ژنان مه گه‌له‌ک گوهه‌رتن و چاکسازییێن یاسایی کرنه و دڤێ ئه‌م زێده‌تر ژی بکن. دڤێ ئه‌م رۆلا ژنێ د جڤاکا کوردستانێ دا خورت بکن. ئازادیخواز به‌ریا هه‌موویان دڤێ ژنێ ئازاد بکن. ئازادیا ژنێ ل کوردستانێ وێ وه‌لاتێ مه و جڤاکا کوردستانێ گه‌له‌ک بهێزتر و به‌رهه‌مدارتر بکه.
هه‌ڤالێن هێژا
د ده‌ما ئاماده‌کاریێن کۆنگره‌یێ دا من جۆشێ و گه‌رماتیه‌ک گه‌له‌ک مه‌زن د ناڤا پەدەکییان دا دیت. ژ بۆ هه‌موو ئۆرگانێن پەدەکێ به‌رده‌وامکرنا ڤێ جۆشێ گه‌له‌کی گرینگه. دڤێ ئه‌م رێ ل به‌ر دەستپێشخەریا جوانێن پەدەکێ ژی ڤه‌کن. نفشێ نوو د ناڤا پەدەکێ دا خوه‌دی فکر و رامانێن نوو یه، ئه‌ڤ رامانێن نوو ڤ پسپۆریا خه‌باتکەرێن پەدەکێ تێلەکبوون و دکاره پەدەکێ پر ب هێزتر بکه.
له‌وما دڤێ ئه‌م د هه‌موو ئۆرگانێن پەدەکێ دا رێ ل به‌ر دەستپێشخەریا جوانێن پەدەکێ ڤه‌کن. ئه‌م ژ هه‌موو کور و که‌جێن پەدەکێ را دبێژن بلا نه‌سه‌کنن و کارێن نوو و نووژه‌نیێ بکن، پەدەکە دێ د هه‌ر ئاستێ دا ئالیکاریا وه بکه. جوانێن پەدەکێ هێزه‌که نوو و نووژه‌ن یا پەدەکێ نه و گه‌له‌ک هێڤێبەخشن.
نه‌مر بارزانی دیرۆکه‌ک ئه‌فسانه‌یی ئافراند ژ به‌ر کو باوه‌ریا وی ب هێزا جوانێن کوردستانێ هه‌بوو. نه‌مر بارزانی ب هێزا خۆرتێن بارزانی ده‌ست ب ته‌ڤگه‌را خوه کر، پاشێ ژی ب هێزا جوانێن هه‌موو کوردستانێ ده‌ست ب شۆره‌شا سه‌رتاسه‌ری کوردستانێ کر و به‌رده‌وام بوو.
باوه‌ریا نه‌مر بارزانی و دیرۆکا تێکۆشینا وی هێزه‌که مه‌زن و به‌رده‌وامه ژ بۆ مه هه‌موویان. بارزانی باوه‌ریه‌کا مه‌زن ب پشته‌ڤانیا خوه‌دێ ژ بۆ بنده‌ستان هه‌بوو و ب هێز و شیانا گه‌لێ کوردستانێ ب باوه‌ر بوو. بارزانی ئه‌ڤ باوه‌ری و شیانا خوه کر ته‌ڤگه‌ره‌کا شۆره‌شگه‌ری یا مه‌زن کو ته‌ڤاهیا گه‌لێ کوردستانێ خست ناڤا ته‌ڤگه‌رێ دا. ب سایا تێکۆشینا بارزانیێ نه‌مر و پەدەکێ، د دیرۆکا هەڤچەرخ یا گه‌لێ کوردستانێ دا، ده‌وله‌تا ئیراقێ د ده‌ستوورا پشتی شۆره‌شا ۱٤ێ تیرمه‌ها ۱۹٥۸ێ دا، د ده‌ستوورا بنگه‌هین ئا ئیراقێ دا، ژ بۆ یه‌که‌مین جار ده‌وله‌تا ئیراقێ کورد و عه‌ره‌ب ل ئیراقێ کرن شریک. هه‌روه‌سا رێکه‌فتنا ۱۱ێ ئادارێ سالا ۱۹۷۰ێ مه‌زنترین به‌لگه‌نامەیه کو ده‌وله‌تا ئیراقێ ب ئاوایه‌کی فه‌رمی ئیعتراف ب مافێن گه‌لێ کوردستانێ کر. دڤێ ئه‌م د هه‌موو سه‌رکه‌فتنێن خوه دا تێکۆشین و قوربانیدانا نه‌مر بارزانی ب بیر بینن. ئه‌م سلاڤا ل گیانێ نه‌مر بارزانی و کاک ئیدریس و هه‌موو شه‌هیدێن پەدەکێ و کوردستانێ دکن.
بێگومان د ڤێ کۆنگره‌یێ دا چاڤێ مه هه‌موویان ل جهێ وان قاره‌مان و خه‌باتکه‌رێن دێرینه، نفشێ زێرینێ پەدەکێ، کو د کۆنگره‌یا به‌رێ ب مه را بوون و نوها د ژیانێ دا نه‌مانه. سلاڤ ل گیانێ وان یێ پاک بن.
هه‌ڤالێن هێژا
پارتیا ده‌مۆکرات یا کوردستانێ (پەدەکە) هێزه‌کا سه‌ره‌که‌یه ل کوردستانا ئیراقێ، یه‌ک ژ هێزێن سیاسی و جه‌ماوه‌ری یێن هه‌ری بباندۆر و مه‌زنە ل ئیراقێ و هێڤیا هه‌موو گه‌لێ کوردستانێ یه. له‌وما سه‌رکه‌فتنا کۆنگره‌یا ۱٤مین یا پارتیا ده‌مۆکراتا کوردستانێ سه‌رکه‌فتنه‌که مه‌زنه ژ بۆ ته‌ڤاهیا کوردستان و ئیراقێ.
ئه‌م ته‌که‌ز دکن کو پارتیا ده‌مۆکراتا کوردستانێ پشتی ڤێ کۆنگره‌یێ دێ ب گه‌رماتیه‌ک نوو ڤه به‌ر ب چاره‌سه‌رکرنا پرسگرێکان ڤه بچه. پەدەکە هه‌موو هه‌ولێن خوه دده ژ بۆ بهێزکرنا سازیێن هه‌رێما کوردستانێ و ده‌ستپێکرنا دیالۆگه‌ک ڤه‌کری ژ بۆ باشترکرنا ره‌وشا رێڤه‌به‌ری و سیاسی ل هه‌رێما کوردستانێ. ئه‌م دێ ل گه‌ل ئالیێن کوردستانی ب تایبه‌تی ل گه‌ل هه‌ڤکارێن خوه یەنەکێ و ئالیێن دن ده‌ست ب دیالۆگه‌ک ڤه‌کری بکن و دڤێ پرسگرێکێن د ناڤبه‌را هه‌ر دو ئالیان دا بێن چاره‌سه‌رکرن. چاره‌سه‌رکرنا ڤان پرسگرێکان ژ بۆ بهێزبوونا هه‌رێما کوردستانێ پێویسته.
دڤێ پارتیا ده‌مۆکراتا کوردستانێ ژ هه‌موو پارتیێن کوردستانی را ڤه‌کری به. پارتیێن دن د گه‌له‌ک قۆناغان دا ژ پەدەکێ دلره‌حه‌ت بوون . دڤێ ئه‌م ب به‌رده‌وامی وێ دلنه‌رمی و گارانتیێ نوو بکن. دڤێ فراکسیۆنێن پەدەکێ یێن د ئه‌نجوومه‌نێن پارێزگه‌هان دا، د پەرلەمه‌نتۆیا کوردستانێ و ئیراقێ دا، ب فراکسیۆنێن دن را پر ڤه‌کری بن.
پرسگرێکا گه‌لێ کوردستانێ پرسگرێکا هه‌ری مه‌زن یا رۆژهلاتا ناڤینه. پەدەکە ژی وه‌که هه‌ر جارێ د پره‌نسیبا خوه یا نه‌گوهه‌ربار یا چاره‌سه‌ریا ئاشتیانه دا ئیسرار دکه و ژ بۆ ڤێ ژی وێ هه‌موو هه‌ولدانان بده. گه‌لێ کوردستانێ دکاره ژ پێشکه‌تنێن ڤێ سه‌رده‌مێ دا سوود وه‌ربگره و پرسگرێکا خوه ب رێیێن ئاشتیانه و بێ توندیێ چاره‌سه‌ر بکه، ئه‌ڤ ژی رێیا هه‌ری باش و گونجایه.
هه‌ڤالێن هێژا
پەدەکە ژ ده‌ستپێکا دامه‌زراندنا خوه ڤه د ناڤ ته‌ڤگه‌را سیاسی و ده‌مۆکراتیک یا ئراقێ دا هێزه‌ک سه‌ره‌کیه. بهێزبوونا پەدەکێ د به‌رژه‌وه‌ندیا هه‌موو ئیراقیان دا بوویه. نها پشتی کۆنگره‌یێ ئه‌م دێ ب هه‌موو ئالیێن ئیراقی ب هێزه‌کا نوو به‌شدار ببن و ژ بۆ به‌رژه‌وه‌ندیێن هه‌موو ئیراقیان کار بکن و جوداهیێ نه‌خن ناڤبه‌را نه‌ته‌وه و پێکهاته‌یێن ئیراقێ.
ئه‌م بانگ ل حکوومه‌تا نوو یا ئیراقێ دکن کو ده‌رفه‌تێن کاری و خزمه‌تگوزاریێن زێده‌تر و باشتر ژ ناڤچه‌یێن باشوور و ناڤه‌ندی یێن ئیراقێ را بکه و پشته‌ڤانیا سه‌کتۆرا تایبه‌ت بکه. ناڤچه‌یێن وێرانبوویی یێن سوننه‌یان ژ نووڤه ئاڤا بکن، ره‌وشا که‌رکووک، شنگال، خانه‌قین و مه‌خموورێ ئاسایی بکن، ماده‌یا ۱٤۰ یا ده‌ستوورێ وه‌ک خوه ب جهبینن و رێ ل بنپێکرنا ماف و ده‌ستهلاتێن هه‌رێما کوردستانێ بگرن.
ئه‌گه‌ر ئه‌م دخوازن ره‌وشا ئیراقێ چاره‌سه‌ر بکن، نابه مافێ چو پێکهاته‌یه‌کا ئیراقی بهێتە بنپێکرن. دڤێ چو هێزه‌کا جه‌ماوه‌ری یا ئیراقی نه‌یێ دوورخستن. ژ به‌ر وێ ژی دڤێ حکوومه‌تا ئیراقێ و هه‌موو هێزێن ئیراقێ دانووستاندنێن نوو لگه‌ل ته‌ڤگه‌را سه‌در بکن، ژ به‌ر کو سه‌دری هێزه‌کا سه‌ره‌که یا سیاسی و جه‌ماوه‌ری یه ل ئیراقێ. ب ئاڤاکرنا ئیراقێ وه‌ک ده‌وله‌تا هه‌موو پێکهاته و هێزان، ب جیبجیکرنا ده‌ستوور و سیسته‌ما فه‌ده‌رالی، دکاره ئارامی و سه‌روه‌ریا ئیراقێ بێ پاراستن کو ئه‌ڤ یه‌ک د به‌رژه‌وه‌ندیا گه‌لێ کوردستانێ و هه‌موو پێکهاته‌یان دایه.
هه‌ڤالێن هێژا
ئه‌ندامێن کۆنگره‌یا ۱٤ یا پارتیا ده‌مۆکراتا کوردستانێ. ل ڤر ئه‌ز دخوازم که‌سه‌ک برێز ژ بۆ پۆسته‌ک نوو یێ پەدەکێ به‌ربژێر بکم. ئه‌و ژی کاک مه‌سرووره ژ بۆ پۆستێ جیگرێ دویه‌م یێ سه‌رۆکێ پارتیا ده‌مۆکراتا کوردستانێ . کاک مه‌سروور په‌روه‌رده‌یێ جه‌نابێ سه‌رۆک مه‌سعود بارزانی یه و ل جه‌م باڤێ من برێز ئیدریس که‌سه‌کی گه‌له‌کی حه‌زکری بوو.
ئه‌و که‌سه‌ک ژێهاتی یه. ئه‌ندامێن پۆلیتبورۆ و رێڤه‌به‌ریا پەدەکێ به‌ریا هه‌ر تشتی شاهدێ هێزا وی نه. خزمه‌ته‌ک مه‌زن ژ بۆ ئارامی و ئاشتیا کوردستانێ کریه، نها وه‌ک سه‌رۆکوه‌زیر کاره‌کی پر گران ل سه‌ر ملێ وی یه، دڤێ ئه‌م هه‌موو ئالیکاریا وی بکن کو د ڤی کارێ گران دا ب سه‌ربکه‌ڤه.
ل پێشیا پەدەکێ گه‌له‌ک ئه‌رک و خه‌بات هه‌نه، بێگومان ئه‌ز و کاک مه‌سروور ب شەرعیەتا وه ئه‌م ب هه‌ڤ را زێده‌تر ئالیکاریا جه‌نابێ سه‌رۆک دکن. ئه‌ز ژ وه داخواز دکم کو هوون پێشنیارا من قه‌بوول بکن.
سه‌رکه‌فتن ژ بۆ پەدەکێ، ئه‌و پارتیا کو ئالا شۆره‌شێ هلدایه.
بژی کوردستان
ب هه‌ڤ را ل ژێر سه‌رپه‌رشتیا سه‌رۆکێ مه یێ نه‌ته‌وی سه‌رۆک بارزانی ژ بۆ سه‌رکه‌فتنێن مه‌زنتر ل ڤی وه‌لاتی.
گه‌له‌ک سپاس
