هەولێر و تەهران ته‌که‌زی ل سه‌ر پێشخستنا په‌یوه‌ندیان دکن
برێز نێچیرڤان بارزانی سه‌رۆکێ هه‌رێما کوردستانێ، ڕۆژا پێنجشه‌مێ ۱۲.۰۹.۲۰۲٤ێ ل باله‌فرگه‌ها ناڤده‌وله‌تی یا هه‌ولێرێ پێشوازی ل برێز مەسعود پزشکیان سه‌رۆکێ کۆمارا ئیسلامی یا ئیرانێ و شاندا پێ ڕا کر.
پشترا د جڤینه‌کێ دا کو ب ئاماده‌بوونا برێزان؛ مه‌سروور بارزانی سه‌رۆکوه‌زیرێ هه‌رێما کوردستانێ، د. فواد هسێن وه‌زیرێ ده‌رڤه و جیگرێ سه‌رۆکوه‌زیرێ ئراقێ، قوباد تاله‌بانی جیگرێ سه‌رۆکوه‌زیرێ هه‌رێما کوردستانێ و به‌رپرسێن پایه‌بلند یێن هه‌ر دو ئالیان، سه‌رۆک نێچیرڤان بارزانی کێفخوه‌شیا خوه ل هه‌مبه‌ر ڤێ سه‌ردانێ نیشان دا و یه‌که‌م سه‌ردانا سه‌رۆکۆمارێ کۆمارا ئیسلامی یا ئیرانێ بۆ ئیراق و هه‌رێما کوردستانێ وه‌که په‌یامه‌که بهێز یا دۆستانه د ناڤبه‌را هه‌ر دو ئالیان دا وه‌سف کر.
سه‌رۆک نێچیرڤان بارزانی خوه‌سته‌کا هه‌رێما کوردستانێ یا ژ بۆ پێشخستنا په‌یوه‌ندیان و به‌رفره‌هکرنا هه‌ڤکاریێن هه‌ڤپار ب کۆمارا ئیسلامی یا ئیرانێ ڕا د هه‌موو واران دا نیشان دا و بال کشاند سه‌ر وێ یه‌کێ کو گه‌لێ کوردستانێ هه‌رتم ڕێز و حورمه‌تێ ژ پشته‌ڤانی و هه‌ڤکاریێن کۆمارا ئیسلامی یا ئیرانێ د ڕۆژێن دژوار دا دگره.
سه‌رۆک پزشکیان، ژ ئالیێ خوه ڤه، کێفخوه‌شیا خوه ب سه‌ردانا ئیراق و هه‌رێما کوردستانێ نیشان دا و ته‌که‌ز ل سه‌ر وێ یه‌کێ کر کو، کۆمارا ئیسلامی یا ئیرانێ گرنگیێ ب په‌یوه‌ندیێن خوه یێن ب ئیراق و هه‌رێما کوردستانێ ڕا دده و دخوازه د هه‌موو واران دا په‌یوه‌ندیێن خوه دگه‌ل وان باشتر بکه و پرسگرێک و ئاسته‌نگیێن ل پێشیا وان په‌یوه‌ندیان هه‌نه ژ هۆلێ ڕاکن.
هه‌ر دو ئالیان پەیوه‌ندیا دۆستانه و یێن دێرین یێن ئیرانێ دگه‌ل هه‌رێما کوردستانێ د وارێن سیاسی، جڤاکی و چاندی دا بلند نرخاندن. پشترا برێزان؛ سه‌رۆکوه‌زیرێ هه‌رێما کوردستانێ و جیگرێ سه‌رۆکوه‌زیر به‌هسا ئاستا نوها یا تێکه‌لیێن ئابۆری و ته‌ڤگه‌را بازرگانی و چاوانیا به‌رفره‌هکرنا وان و وارێن هه‌ڤکاریێن هه‌ڤبه‌ش د ناڤبه‌را وان دا کرن.
د ڤێ هه‌ڤدیتنێ دا چه‌ندین مژارێن کو د به‌رژه‌وه‌ندیا هه‌ر دو ئالیان دا نه هاتن گۆتووبێژکرن و به‌هسا گرنگیا پاراستنا ئارامی و سه‌قامگریا ناڤچه‌یێ کرن و د ڤێ چارچۆڤه‌یێ دا ته‌کید ل سه‌ر وێ یه‌کێ ژی کرن کو، هه‌رێما کوردستانێ چو جاری نابه چاڤکانیا مه‌ترسیێ ل سه‌ر ئیران و وه‌لاتێن جیران و ب ته‌مامی پابه‌ندی ڕێکه‌فتنا ئه‌وله‌هیێ یا د ناڤبه‌را ئیراق و ئیرانێ دا یه.
پشتی هه‌ڤدیتنێ، سه‌رۆکێ هه‌رێما کوردستانێ، سه‌رۆکێ کۆمارا ئیسلامی یا ئیرانێ و شاندا پێ ڕا دگه‌ل ئالیێن سیاسی، پێکهاته‌یێن ئۆلی و ئه‌تنیکی یێن کوردستانێ جڤینه‌ک پێک ئانین کو، تێدا به‌حسا گرنگیا په‌یوه‌ندیێن ئیراق و هه‌رێما کوردستانێ ب ئیرانێ ڕا، ده‌وله‌مه‌ندیا جڤاکێن پر ئۆلی و پرنه‌ته‌وه‌یی کرن و هه‌ر دو ئالیان ته‌کید ل سه‌ر ئاشتی، پێکڤه‌ژیان، یه‌کرێزی و براتیا ناڤبه‌را گه‌لێن ناڤچه‌یێ و ته‌ڤایا پێکهاته‌یان دا کرن.
