هەڤپەیڤینەک بارزانی دگەل رۆژنامەیەکا ترکی سالا ١٩٧٠
ناڤ و که‌ساتیا بارزانی ل گه‌ل دیرۆکا ته‌کۆشینا نه‌ته‌وه‌یێ کورد ڤه تێ ڕۆژه‌ڤێ
بارزانی خوه‌دی فه‌لسه‌فه‌ک یا ژیانێ گه‌له‌ک تایبه‌تی بوو.
“مرن هه‌یه لێ ته‌سلیم بوون نینە”
ڕۆژنه‌مه‌ڤانه‌ک ترک د سالا ۱۹۷۰ ێ دا، دگه‌ل بارزانی هه‌ڤپه‌یڤێنه‌ک کریه. بارزانی د به‌شه‌ک ژ ڤێ هه‌ڤپه‌یڤینێ دها دبێژه:
“ته‌مه‌نێ من ۱۰-۱۲ سال بوو. من نزانیبوو گۆتنێن ئازادی و عه‌داله‌تێ تێن چ واته‌یێ. من ل کۆلانان وه‌ک سترانه‌کێ گۆهێ خوه ددا گۆتنا ئازادی، عه‌داله‌ت، وه‌کهه‌ڤی و براتیێ. مه ته‌نێ پره‌نسیبێن ڤان گۆتنان یێن دهاتن گۆهێن مه مه ژ به‌ر کربوون. مه وه‌سا دزانی کو، ئه‌ڤ گۆتنێن هه‌نێ یێن سترانه‌کێ نه. ژ به‌ر ڤێ یه‌کێ ژی، مه ئه‌ڤ گۆتن ل کۆلانان وه‌ک سترانه‌کێ دگۆتن. لێ د وان ده‌مان دا ژی، د بن ناڤێ ئازادیێ دا ئازادیا خه‌لکێ ژ وان دهاته ستاندن. ب ناڤێ عه‌داله‌تێ ئینسان بێ سه‌ده‌م ژ خوه‌ره مه‌ره دهاتن دارڤه‌کرن. د بن ناڤێ وه‌کهه‌ڤیێ دا قسمه‌ک ئینسان دهاتن پاراستن و قسمه‌ک ژی د زیندانان دا ژ حال دکه‌تن. ژ خوه ب ناڤێ براتیێ برا برا دکوشت. ئه‌ڤه بوو ئه‌و وارێ کو ئه‌ز تێده دژیام. د قۆناغه‌ک هالێ دا من چاڤێن خوه ل دنیایێ ڤه‌کرن. د ڤی واری دا من شیرێ دیا خوه د زیندانان دا مێهت (ڤه‌خوار). د ڤی واری دا من ل ده‌ریێ موسلێ، جه‌سه‌دێ برایێ خوه یێ مه‌زن دارڤه‌کرنا وی ته‌ماشه کر.”
بارزانی د به‌رده‌وامیا هه‌ڤپه‌یڤینا خوه دا دبێژه: “… ئه‌ز ل سه‌ر پشتا هێستره‌کی سواربووم. هزرا من هه‌می ل سه‌ر برایێ من بوو. ئه‌و جه‌سه‌دێ وی یێ دارڤه‌کری چو جاران ژ به‌ر چاڤێن من نه دچوو. من ب وی ئاقلێ خوه یێ کچک ژ خوه را دگۆت: “شوونا مرۆڤ ب نه‌حه‌قی بهێتە دارڤه‌کرن، بلا مرۆڤ ل چۆل و چیا ببه خوارنا گوران” د ڤێ گاڤێ دا من سۆز دا کو، ئه‌ز ئێدی چو ئاوایی و چو جاران نه‌که‌ڤم زیندانان. ئه‌ز بێم کوشتن ، بێم پارچه‌کرن ئه‌ز ناکه‌ڤم زیندانان و د بن ده‌ستێ والیه‌کێ زالم دا ئه‌ز ڕه نادم (نامرم). من ب ڤێ فه‌لسه‌فێ ده‌ست ب ژیانێ کر. مرن هه‌یه لێ ته‌سلیم بوون نینە. ڤێجا چاره‌سه‌ریه‌ک ب تنێ یا ڤان هه‌موو تشتان هه‌بو. ماینا سه‌رێ چیان…”
ڕۆژناما ترکی ته‌رجومان..هه‌ڤپه‌یڤین ل گه‌ل بارزانی، ١٩٧٠/٤/١٨
