وێنەیێی وێ چەکدارا پەکەکێ یا کو ب دێمەکەێ خەمگێن، دگەل ٢٩ هەڤالێن خوە، چەکی خوە کرە د مەجلەکێ دا و شەوتاند د سۆسیالمەدیایێ دا گەلەک دەنگڤەدا و ژ حەقێ وێ زێدەتر ل سەر هاتە گۆتن و نڤیسین.
ئەز تەخمین دکم کو مەدیایا پەکەکێ ب زانین و ب ئارمانج وینەیێ وێ جەکدارێ هاڤێتە د ناڤ رایا گشتی دا داکو رایا گشتی پێڤە مژوول ببە و ئالییێن دن یێن پێڤاژۆیێ ژبیر بکن و شکەستن و تەسلیبوونا خوە پێ ڤەشێرن.
هۆزان ل سەر وی وێنەیی هاتن ڤەهاندن و پەخشان ل سەر هونین. هەر یەکی ب ئاوایەکی هەست و سۆزێن خوە ل هەمبەر خەمگینییا وێ چەکدارا پەکەکێ بەرچاڤ کرن. من زانی کا چما پەکەکلیێن شەرموکە مەدح و پەسنا وێ چەکدارێ دکن و وەک سەمبۆلەکا ئاشتیێ ب ناڤ دکن. لێ ئەز حێبەتی مام دەما من نڤیسێن هندەک ژ هەڤال و هەڤچەپەرێن خوە دیتن و ژ بەر خەمگینییا وێ، نە گری و رۆندکێن وێ، ژ بەر کو ئەو چەکدار ب تنێ وەکە خەمگین دهات بەرچاڤان و ئەو نەدگرییا و نەژی رۆندک د باراندن، پەیڤێن سۆزاداریێ بۆ وێ رێز کربوون.
ئەز ژ کۆژییەک دن ل ڤی وێنەیی دنێرم و شرۆڤە دکم. ڤێ چەکدارا پەکەکێ دگەل هەڤالێن خوە باژار، گوند، چیا و دۆل و نهالێن باکورێ کوردستانێ ل پشت خوە هێلان کو، مەیدانا خەبات و تەکۆشینا وان یا راستینە، ب فەرمانا سەرۆکێ خوە هاتن ل باشوورێ کوردستانێ شەرێ دەستکەفتیێن هەرێما کوردستانێ بکن، شەرێ پەرلەمان و حکومەت و سازیێن فەرمی و هلبژارتییێن باشوورێ کوردستانێ بکن. وێ و هەڤالێن خوە ب سەدان گوندێن مە کاڤل و وێران کرن. کەتنە پێشیا لەشکەری دەولەتا داگیرکەر و کوردستانا ب خوینا پێشمەرگەیی هاتی ئازادکەن داگیر کرن.
وێ چەکدارا پەکەکێ و هەڤالێن خوە، ب بریارا سەرۆکێ خوە و دەولەتا کوور یا ترکیێ و ب هەڤئاهەنگی دگەل دەولەتێن داگیرکەرێن کوردستانێ، باکورێ کوردستانێ ڤالا کرن و خەلکێ وێ هێلان بن رەحما پۆستالێن جەندرمەییێن دەولەتا ترکیێ و هاتن ل باشوور شەرێ پێشمەرگەیێن کوردستانێ بکن. کیژان پێشمەرگەیان؟ وان پێشمەرگەیێن د چەپەرێن شورەشێن کوردستانێ دا سینگا خوە ل پێشییا هێزێن داگیرکەر دکر مەرتال ژ بۆنا پاراستنا کوردستانێ. وێ چەکدارێ و هەڤالێن خوە ب هەزاران کیلۆمەتر برین و هاتن ل باشوور، ل برجینی، ل گارە و مەتین و ل کۆرەژار و ….هتد پێشمەرگە، هەڤال و هەڤچەپەرێن مە، شەهید کرن. گەلۆ هینگێ ژی ئەڤ چەکدارە (چەکدارێن پەکەکێ) د خەمگیمن، پۆسیدە ودامایی بوون یان ژی ب عەشق و ئەڤیینییا سەرۆکێ خوە ژ بۆ مرنێ شەرێ پێشمەرگەیی دکر.
نسرەت حاجی
15-07-2025
