وەزیرا دەرڤە یا سوێدێ: ئەم تەسلیمی ئەردۆگان نەبوونە
ئان لیند وەزیرا دەرڤە یا سوێدێ د هەڤپەیڤینەکا خوە دا، دگەل رۆژنامەیا سوێدی ئەفتۆنبلادەت، دبێژە کو ئەو تەسلیمی ترکیێ نەبوونە و کەسێن ب بەلگە ب تەرۆرێ ناهاتبنە ئیسپات کرن ئەم تەسلیمی ترکیێ ناکن “ئەم کەسێن کو ب تەرۆرێ نەهاتبنە تاونابار کرن دەرسینۆر ناکن”.
د بەرسڤا پرسەکا رۆژنامەیێ دا کو سوێد خوە تەسلیمی ترکییێ کر و کا دانوستاندن ب ئەردۆگان را زەهەمەت بوون، ئان لید دبێژە: ” ئەز دخوازم بێژم کو دانوستاندنێن مە ئاڤاکەر بوون. ئالیێ ترکییێ گوهداریا مە کر و بەلگەنامەیێن دیتن. مە ژی گوهداریا وان کر و بەلگەنامەیێن وان دیتن. هندەک تشتێن وان هەبوون مە نەکاری قەبوول بکن و هندەک تشتێن مە هەبوون وان ژی نەکاری قەبوول بکن. دانوستاندن دان و ستاندنە و ئەم گشتن لهەڤتێگهشتنێ.”
وەزیرا دەرڤە یا سوێدێ دبێژە کو، پشتی شەرێ روسیا و ئوکراینایێ، مە سیاسەتا خوە یا ئەولەهیێ نرخاند و ئەم گەهشتن وێ باوەرێێ کو سیاسەتا مە یا د وارێ ئەمنیەتێ دا تێرا ناکە و لاوازە، پشتی ئێریشێن رووسیایێ پێویستیا مە ب گارانتی و ئەولەهیا ئەندامەتیا ناتۆیێ هەیە. دەمانکو مە ئەڤ نرخاندن کر ئێدی پێویست بو کو ئەم رابگەهینن کو ئەم دخوازن بکەڤن د باسکێ ناتۆیێ دا و مە داخوازا ئەندامەتیێ کر. هەلبەت ئەز دا گەلەک کەیفخوەشتر بم ئەگەر ترکیێ چو شەرت ل پێشیا ئەمدامبوویینا مە نەدانابان، لێ وان شەرتێن خوە بەرچاڤ کرن و مەژی شەرتێن ترکیێ ب گرنگی وەرگرتن.
رێکەفتنا دگەل ترکیێ بەندەک ژێ بەهسا تەسلێمکران وان کەسان دکە یێن کو ترکیێ وان وەکە تەرۆریست ب ناڤ دکە؟
ئەم کەسێ تەسلیمی ترکیێ ناکن ئەگەر بەلگەنامەیێن پشتراستکران چالاکیێن تەرۆریستی بەر دەست نەبن. بلا کەس خوە نەترسینە و خەمگین نەبە. و چو حێجەت و سەبەب نین کو کورد باوەر بکن کو مافێن وان یێن مرۆڤی و مافێن وان یێن دەمۆکراتیک دێ بهێن کێمکرن و تخووبدار کرن.
ما هوون نە د وێ باوریێ دا نە کو سوێد و ترکیێ دەربارێ کا کی تەرۆرستە خوەدی نێرینێن خودانە؟
مە ماوەریا خوە نەگوهارتیە. مە پەکەکە وەکە تەرۆریست ب ناڤ کریە. دەربارێ پەیەدێ، یەپەگێ و یێن کو ترکیێ ژێ را دبێژە فەتۆ (تەڤگەرا گولەن) دێ ب ڤێ ئاوایی بە، ئەم ئالیکاریا وان ناکن ئەگەر ئەو ئالیکاریا مە یا ژ بۆ وان ببە گەف ل سەر ئەولەهیا ترکیێ وەک چەک، دراڤ ….هتد. ئەم ئیرۆ ژی وسا ناکن، نها ب زەلالی د رێکەفتنێ دا هاتیە چاپکرن.
هوون دکارن ب پەیەدێ را هەڤکاریێ بکن؟
تشتی مە د رێکەفتنێ دا نڤیسی ئەوە کو ئەم سۆز ددن کو پشتگریا نەدن پەیەدێ، یەپەگێ و فەتۆ. ئەم ب چو ئاوایی وان وەک تەرۆریست نابینن، هەرتشتێ د پەیمانێ دا هاتی نڤیسیبن دڤێ سوێد پێ پابەند بە.
ئان لید دبێژە کو نها پرسگرێکێن ب ترکیێ را هاتنە چارەسەر کرن، لێ دبە کو پرسگرێکین نوو دەرکەڤن پێش مە. ئەگەر ترکیێ چو ئاستەنگان دەرنەخە پێشیا مە د ناڤا سالەکێ دا ئەم دبن ئەندامێ ناتۆیێ.
