ئیرۆ باشوورێ کوردستانێ، که‌ڤرێن داوی یێ نه‌ته‌وده‌وله‌تا سه‌ربخوه داتینه؛ هیمێن پێشه‌رۆژا سه‌رخوه‌بوونا کوردستانێ ل وی به‌شی تێ ئاڤێتن. دڤێ ئه‌ڤ مه‌شا مقەده‌س، سه‌ربلندی و کاما دلێ هه‌ر کورده‌کی به؛ هه‌ر کورده‌ک ده‌ستێ ئالیکاری و پشتگریێ درێژی ڤی به‌شی بکه دا کو ڕۆژه‌ک به‌ری ڕۆژه‌کێ کورد چاره‌نووسا خوه ب ده‌ستێ خوه بنڤیسن. د ده‌مه‌ک وه‌ک ئیرۆ دا، کو داگیرکه‌رێن کوردستانێ ب هه‌ر شێوه‌یی ئێریشی باشوور دکن و دخوازن ده‌ستکه‌فتنێن هه‌یی ژ هۆلێ ڕاکن، مافێ چ کورده‌کی نینە کو ڤێ ئارامی و ئاهه‌نگییا هه‌یی ژ بۆ به‌رژه‌وه‌ندییێن ئۆل ئان هه‌رێما خوه تێكبده. دڤێ ته‌مامێ پارتی و ده‌زگه‌هێن کوردستانێ ژی ل گۆر هه‌قیقه‌ت و به‌رژه‌وه‌ندییێن کوردستانێ خزمه‌تێ بکن.
د ئاڤابوونا هه‌ر ده‌وله‌ت و ده‌زگه‌هه‌کێ دا خه‌له‌تی و کێماسی چێدبن. سازکرن و برێکووپێکبوونا وێ ده‌وله‌تێ هه‌وجه‌یی ب زه‌مانه‌کی دوور و درێژ هه‌یه. هه‌لبه‌ت دڤێ ئه‌و خه‌له‌تی یان کێماسییێن کو تێن دیتن ب زمانه‌کی برایه‌تی و دۆستانی بێن ڕه‌خنه کرن. لێ گاڤا ڕه‌خنه ژ ڕه‌خنه‌بوونا خوه ده‌رکه‌ت و بوو چه‌کا پاراستنا به‌رژه‌وه‌ندییێن هه‌رێمی، ئان ژی پارتیتی وێ ده‌مێ سینۆرێن ڕه‌خنه‌کرنێ ژ هۆلێ تێن ڕاکرن و دژمناتی ده‌ستپێدکه. ئه‌ڤ ژی خزمه‌تا دژمن و خێرنه‌خوازێن کورد و کوردستانێ یه. ئه‌ز باوه‌ر ناکم (ژ بلی سه‌رۆک و هن ڕایه‌دارێن پەکەکێ) کورده‌ک ڕابه بێژه:”ئه‌ز کوردستانه‌کا سه‌ربخوه یان ژی فه‌ده‌ره‌ل ناخوازم”. د دلێ هه‌ر کوردی دا خه‌ون و خه‌یالا کوردستانا مه‌زن و یه‌کگرتی هه‌یه. لێ شه‌رتان وسا کریه کو ئه‌م بخوازن و نه‌خوازن، کوردستان چار پارچه یه، کورد د وه‌لاتێن خوه دا ژ هه‌ڤ هاتنه تاروومار کرن. ٤ هه‌ره‌مێن جودا و هه‌ر یه‌ک ژ وان دخوازه ب سه‌رێ خوه ببه هه‌رێما سه‌ره‌که. گاڤا ئه‌م هه‌ژمارا کوردان بدن سه‌ر هه‌ڤ، باکورێ کوردستانێ به‌شێ هه‌ری مه‌زنه.
گاڤا ئه‌م ل گۆرا هه‌ژمارێ بلڤن، هنده‌ک کارن بێژن دڤێ باکوری سه‌رپه‌رشتیا کوردا بکن. لێ ڕه‌ئالیتا هه‌یی مرۆڤان مه‌جبوری ده‌فاكتۆیا هه‌یی دکه کو، ئه‌و ژی ئه‌وه كۆ هه‌رێمه‌ک ژ هه‌رێمێن کوردستانێ ئازادیا خوه بده‌ست خستیه. دڤێ ئه‌م کورد ڤێ ده‌ستکه‌فتنێ د قادا ناڤخوه‌یی و ناڤده‌وله‌تی دا باش ب کار بینن دا کو هه‌رێمێن دن ژی ب کاربن وان ده‌ستکه‌فتنا ب ڕیه‌کا حقوقی بێخن ڕۆژه‌ڤا جیهانێ. کوردێ ل هه‌رێمێن نه ئازاد کری د ڤی واری دا خوه‌دی مافن. لێ وه‌ک مه ل ژۆر ژی به‌حس کر، پارچه‌بوونا کوردستانێ کورد د هه‌ر واری دا تاروومار کرنه. ژ به‌ر ڤێ ژی، دڤێ په‌نجه‌را ڕۆناهیا باشوورێ کوردستانێ وه‌ک ڕۆناهیا چاڤان بێ پاراستن. و دڤێ ئه‌م چ فه‌رقیێ نه‌خن ناڤبه‌را نه‌تاوا خوه. دڤێ ئیرۆ ته‌مامێ کوردستانییان د بن ئال و ڕێبه‌ریا سەرۆکێ کوردستانێ دا، ل دژی ده‌وله‌ت و پارتیێن ته‌رۆریست ده‌ست بدن هه‌ڤ و د ئاڤاکرنا کوردستانا ئازاد دا ببن خوه پار.
چاوا کو سه‌رۆک مسته‌فا بارزانی د ده‌ما خوه ده گۆتبوو:” چ که‌سێ کو ڕوحێ نه‌ته‌وه‌پارێزی پێ ڕه چێنه‌بووبه، وێ ڕۆژه‌ک ژ ڕۆژان ئیخانه‌تێ ب گه‌لێ خوه ڕه بکه” ئه‌ڤ گۆتن ژ بۆ ئیرۆ و ژ بۆ هه‌ر ده‌مێ ژی ده‌رباس دبه. ئیرۆ پرسگرێکا سه‌ره‌که یا د ناڤ کوردا دا، پرسگرێکا پارتیا كاركەرێن كوردستانێ (پەکەکێ) و کوردێ ده‌رڤایی پەکەکێ یه. هه‌ر چقاسی هه‌بوونا پەکەکێ یا ل قه‌ندیل و ده‌ڤه‌رێن دن ژبۆ حکومه‌تا کوردستانێ ژی سه‌رێشاندنه‌کێ ب خوه ڕا بینه ژی، دڤێ ژ باشوورییان زێده‌تر ئه‌م کوردێن باکور سه‌رێ خوه ب ڤێ پرسگرێکێ ڕا بێشینن. د داخویانی و هه‌لوه‌ستێن هنده‌ک ڕایه‌دارێن پەکەکێ دا دیار دبە کو، شه‌رێ ل دژی ده‌وله‌تا ته‌رۆریست، چه‌ته و پارتیێن ته‌رۆریست دا ئالیکاریا ناڤده‌وله‌تی، تێكەلیێن هه‌رێما کوردستان یه ب جیرانا ڕا ئه‌و نه‌ره‌حه‌ت کرنه.
گه‌ر پەکەکە کاربه سه‌به‌بێ نه‌ره‌حه‌تیا خوه ل سه‌ر ئه‌ساسێ کوردایه‌تی ژ ده‌وله‌تا فه‌ده‌رال یا کوردستانێ ڕا بینه سه‌ر زمێن، ئه‌ز باوه‌ردكەم وێ وه‌ک ده‌وله‌ت، هه‌رێما کوردستان ژی بکاربه چاره‌سه‌ریه‌کێ ژ نه‌ره‌حه‌تیا پەکەکێ ڕا ببینه. ژ خوه به‌یانێن سه‌رۆکێ کوردستانێ یێ د وی واری دا پر زه‌لالن. سه‌رۆکێ کوردستانێ د هه‌ر فرسه‌ندێ دا چاره‌سه‌ریێ د ڕیا دیالۆگ و ڕیێن بێچه‌کی بوونێ و ده‌مۆکراتیک دا تینه سه‌ر زمێن. دڤێ ئه‌م باکووری ژ نها دا زانبن کو، هه‌گه‌ر سبێ یان دوسبا باکورێ کوردستانێ ئازاد بوو، وێ ئه‌ڤ پرسگرێکا پەکەکێ کو ئیرۆ ل ڕۆژه‌ڤا و باشوورێ کوردستانێ ب شه‌کله‌کی کرێت خوه ل سه‌ر مله‌تێ کورد فه‌رز کرن وێ ل باکور ژی ده‌ستپێبکه. پرسگرێکا هه‌یی پرسگرێکا ته‌مامێ کوردستانێ ژی به، دڤێ ئه‌م باکوری ژ ئیرۆ دا ب به‌رپرسیاری ته‌ڤ بگه‌رن و خوه‌دی سیاسه‌ته‌ک نه‌ته‌وی بن. ئان نا سبێ ئه‌مێ ژی ببن ماروزێ شیده‌تا پەکەکێ. و وێ گاڤێ ئه‌مێ ژی تێکه‌ڤن ڕه‌وشا کو نها ل باشوور د ناڤبه‌را داگیرکه‌رێن کوردستانێ و هه‌موه‌لاتیێ وه‌ده هه‌یی ده‌ردکه‌ڤه ئۆرتێ. پرسگرێکا چاره‌سه‌ریا پەکەکە و خوه‌دیلێده‌رکه‌تنا وێ، نه ئه‌رکا باشووره.
هه‌گه‌ر ل باشوور پرسگرێکا نەھێلانا پەكەکێ هه‌به، ئه‌رکا پێشین دکه‌ڤه سه‌ر ملێن باکورییان بخوه و دڤێ ئه‌و ل خوه و ل ده‌سکه‌فتیێن خوه خوه‌دی ده‌رکه‌ڤن. دڤێ د سه‌ری دا پەکەکە، ده‌ڤ ژ سیاسه‌تا توندی به‌رده و ب ڕێیێن ده‌مۆکراتیک ل چاره‌سه‌رییا دیالۆگا د ناڤ کوردان دا بگه‌ره. لێ گاڤا پەکەکە وان ده‌ستکه‌فتنێن کوردا بکه قوربانا شه‌خس ئان هه‌رێمه‌کێ (کارتۆن ئان کانتۆنان) دڤێ ئه‌م کوردێن باکور ب ده‌نگه‌ک بلند نه ڕازیبوونا خوه ل هەمبه‌ر هه‌لوستێن پەکەکێ یێ نه د به‌رژه‌وه‌ندیا مڵه‌تێ کورد دە، بقیرن. ئه‌و ڕۆژ ژی ئیرۆ یه…. به‌لا پەکەکێ ژ نوو ڤه ده‌ست ب شه‌رێ ده‌ستکه‌فتنێن کوردستانا ئازاد کریه. پەکەکە بوویه که‌له‌ما چاڤێ کوردان. پەکەکێ ده‌ست و پست دایه داگیرکه‌رێن کوردستانێ و شه‌رێ پارتیا دەمۆكراتا كوردستانێ (پەدەکە) ێ و ڕومه‌تا مله‌تێ کورد مالباتا بارزانیان دکه. پەکەکە شه‌رێ هێژاییێن کوردان دکه. پەکەکە زاروکێن سێ سالی دکووژه. پەکەکە ب ناڤێ هه‌رێمێن خوه‌سه‌ر په‌رچه کرنا کوردستانێ ژ خوه ڕا کریه شیار. ب کوورت کورمانجی؛ پەکەکێ سوندا تار و مار کرنا کوردستانێ خواریه. ژ بەر ھندێ ژی دڤێ ته‌مامێ کوردان ب ده‌نگه‌کی بلن بقیرن و بێن ئێدی به‌سه ژ زلم، و ده‌ک و دۆلابێن پککێ ڕا.
نووری چه‌لیک
2019.08.15
