به‌ریا هلبژارتنێن ۷ئێ حزیرانا ۲۰۱٥ئێ ل ترکیێ، جه‌میل بایک و کۆنسه‌یا سه‌رۆکاتیا په‌که‌کێ ڕاگه‌هاندبوون: “ئه‌گه‌ر هه‌ده‌په د هلبژارتنان دا ب سه‌ر بکه‌ڤه و ل ترکیێ ۱۰% ده‌نگان ب ده‌ست بخه، وێ کورد ل هه‌ر چار پارچه‌یێن کوردستانێ ب سه‌ر بکه‌ڤن.” د وان هلبژارنان دا هه‌ده‌پێ زێده‌تر ژ ۱۳% ده‌نگ ب ده‌ست خستن و ۸۰ ئه‌ندام ژ بۆ په‌رله‌مه‌نتۆیا ترکیێ ده‌ستنیشان کرن و ب ڤێ یه‌کێ ژی کوردێن باکور دکاری ب ئاکه‌پێ ڕا حکومه‌تێ پێکبینن و چه‌ند یاسایان د به‌رژه‌وه‌ندیا کوردێن یێن ل ترکیێ دا بگوهه‌رینن و ئه‌ڤ ژی ده‌ستکه‌فته‌ک مه‌زن بوو ژ بۆ باکورێ کوردستانێ.
کورد یێن هه‌ر چار پارچه‌یێن کوردستانێ ب ڤێ بوویه‌رێ کێفخوه‌ش بوون، لێ هه‌ڤسه‌رۆکێ هه‌ده‌پێ سه‌لاحه‌دین ده‌میرتاش د بن فشار و زه‌ختێن جه‌میل باییک و په‌که‌کێ دا ڕاگه‌ناد: “ئه‌م ب پارتییا داد و گه‌شه‌پێدانێ (ئاکه‌پ) ڕا تفاقێ ناکن و ئه‌م دێ پشتا ئه‌ردۆگان بشکێنن. ”
ته‌شویقکرن و ده‌ستوه‌ردانا په‌که‌کێ د کار و خه‌باتێن هه‌ده‌پێ دا، پشتی هلبژارتنێ، ده‌میرتاش و ئه‌ندامێن ڕێڤه‌به‌ریا وێ ڕێخستنێ خاپاندن. وان کو ل سه‌ر ناڤێ گه‌لێن ترکیێ به‌شداری هلبژارتنان کر بوو، پشتا خوه دان گه‌لێن ترکیێ، ب تایبه‌تی گه‌لێ کورد و یه‌کرێزیا گه‌لێن کورد و ترک تێکدان.
ڕۆژا دوشه‌مێ ٢٠١٥/٧/٢٠ئێ، ل باژارێ په‌رسووسێ یێ پارێزگه‌ها ڕوحا یا باکورێ کوردستانێ د ئه‌نجاما ته‌قینه‌کێ د جڤینا جوانێن سۆسیالیست دا هه‌ری کێم ۳۱ که‌س مرن و ۱۰۱ که‌س ژی بریندار بوون. شه‌ڤه‌ک پشتی وێ ته‌قینێ گه‌ریلایێن په‌که‌کێ چوون مالا ۲ پۆلیسان و د خه‌و دا ئه‌و کوشتن، ڕۆژا دن ژی باسکێ له‌شکه‌ری یێ په‌که‌کێ به‌رپرساتیا کوشتنا وان هه‌ر دو پۆلیسان ڕاگه‌هاند. ب ڤێ کریارێ ژ هه‌ڤسه‌رۆکێ گشتی یێ هدپێ سه‌لاحه‌دین ده‌میرتاش، ۸۰ په‌رله‌مه‌نته‌رێن هه‌ده‌پێ و ڕێخستنا وان ڕا پرسگرێکه‌ک مه‌زن چێکر.
ئارتێشا ترکیێ، د بن ناڤێ تێکۆشینا ل دژی ته‌رۆرێ دا، ل دژی په‌که‌کێ شه‌ر ڕاگه‌هاند و ب گومانا هه‌بوونا گه‌ریلایێن په‌ئه‌ککێ، ب تۆپ و فرۆکه‌یان، ئێریشی ده‌ڤه‌رێن باشوورێ کوردستانێ کر و د ئه‌نجامێ دا زیانێن مه‌زن یێن جانی و ئابۆری گه‌هاندن گه‌لێ باکور و باشوورێ کوردستانێ.
ڕۆژا پێنجشه‌مێ ٢٠١٥/٧/٢٣ئێ گه‌ریلایێن په‌ئه‌ککێ ل ئامه‌دێ پۆلیسه‌ک کوشتن و یه‌ک ژی بریندار کرن. ڕۆژا ۲٤ئێ تیرمه‌ها ۲۰۱٥ئێ پۆلیسێن ترکیێ ۲٥۰ که‌س ل سته‌نبۆلێ و ل ۲۲ باژارێن دن ب تۆمه‌تا هه‌ڤکاریکرنا داعشێ و په‌ئه‌ککێ ده‌سته‌سه‌ر کرن و د هه‌مان ده‌مێ دا باره‌گه‌هێن دارعشێ ل ڕۆژاڤایێ کوردستانێ و باره‌گه‌هێن په‌که‌کێ ل باشوورێ کوردستانێ ب تۆپ و فرۆکه‌یان بۆمبه‌باران کرن و هژمارا گرتیان ل ترکیێ و باکورێ کوردستانێ ژ ۲۰۰۰ که‌سان ده‌رباس کر کو، د ناڤ وان دا چه‌ند سه‌رۆکشاره‌دارێن هه‌ده‌پێ ژی هه‌بوون.
ڕۆژا چارشه‌مێ ٢٠١٥/٧/٢٩ئێ، گه‌ریلایان بۆریا په‌ترۆلێ یا باشوورێ کوردستانێ بۆ ترکیێ ل پارێزگه‌ها شرنه‌خێ ته‌قاند، ڕۆژا ٢٠١٥/٧/٣٠ئێ، باسکێ له‌شکه‌ری یێ په‌که‌کێ به‌رپرساتیا وێ ته‌قینێ ڕاگه‌هاند. ئه‌ڤ د ده‌مه‌کێ دا بوو کو، کۆنسه‌یا سه‌رۆکاتیا په‌که‌کێ دزانی کو بوودجه و مووچه‌یێن خه‌لکێ کوردستانێ ب ڕێیا هنارتنا په‌ترۆلێ تێ دابینکرن و حکومه‌تا ناڤه‌ندی یا ئیراقێ ژی ئه‌و ۱۸ هه‌یڤ بوون بوودجه‌یا کوردستانێ بری بوو.
ل گۆر ڕاپۆرا وه‌زاره‌تا سامانێن خوه‌زایی یا هه‌رێما کوردستانێ، په‌که‌کێ ب وێ کریارا خوه، نێزیکی ۲٥۰ ملیۆن دۆلار زیان ب هه‌رێما کوردستانێ گه‌هاند کو ب قاسی مووچه‌یا مه‌هه‌کێ یا هێزێن ئه‌وله‌هیێ، وه‌زاره‌تا ناڤخوه و پێشمه‌رگه یێن قه‌هره‌مان یێن کوردستانێ بوو.
حامد گەوهەری
٢٠٢٣/١١/١٣
