پارتیا كو ھەموو بوھایێن مرۆڤاتیێ دپەرچقینە

سیاسه‌تا پەكەكێ ل ڕۆژاڤایێ کوردستانێ ب ئاوایه‌کێ گەلەك خراب به‌رده‌وامه‌. سیاسه‌تا پەكەكێ ل ڕۆژاڤایێ کوردستانێ ژ ئالیێ ناوه‌نده‌کا تایبه‌ت ڤه‌ تێ ڕێڤه‌برن. تایبه‌تی هه‌تا وه‌ک ڤێ گاڤێ رژێما سوریێ‌ هه‌رتشتا دخوازه‌ ل دژی کوردا ل ڕۆژاڤایێ کوردستانێ ب رێیا قه‌ندیل دده‌ کرن. ده‌مه‌کی ب چاڤده‌ریا ئەمریكایێ و هه‌ولدانێن سه‌رۆکێ هه‌رێما کوردستانێ نێچیرڤان بارزانی به‌هسا یه‌کرێزیه‌کێ د ناڤبه‌را ئه‌نەکەسێ و پەیەدێ دا‌ هاته‌ کرن. هه‌ردو ئالیان  بچاڤده‌ریا ئەمریكایێ  گه‌له‌ک جڤین ل دارخستن. لێ چو ئه‌نجام ژێ ده‌رنه‌که‌ت.

تێ زانین کو د بن چاڤده‌ریا سه‌رۆک مەسعود بارزانێ دا 3 جارا ئه‌نەکەسێ و پەیەدێ په‌یمان ئیمزا کرنه‌. هه‌ولێر 1،هه‌ولێر 2 و دهۆک. لێ چو جاران ناڤەرۆكا ڤان رێكەفتنان  ل سه‌ر ڕوویێ ئه‌ردی نەكەتیە د وارێ پراكتیكێ دا و نه‌که‌تیه‌ ژیانێ. نها ژی ئا‌شکه‌ره‌ دبه‌ کو هه‌ر گاڤا کو پەیەدە د بن باندۆرا قه‌ندیل دا‌ تاڤێژه‌ ته‌کتکیه‌ و خاپاندنا وان ئالیێن خێخوازه‌ یێن کو دخوازن یه‌کرێزیه‌ک ل ڕۆژاڤایێ کوردستانێ پێکبھێت.

لێ ئه‌ڤ هه‌لوه‌ستا ئالیێن خێرخواز دێ هه‌تا کووده‌رێ به‌رده‌وام به‌؟ ئه‌گه‌ر ڤه‌کری تێ دتن کو قه‌ندیل ڕێ نادا‌ یه‌کرێزیه‌ك ل ڕۆژاڤایێ کوردستانێ بێ ئاڤاکرن و د ڤێ ده‌ربارێ دا‌ ئاسته‌نگا په‌یدا دکه‌، پێدڤیە ڤێجا ئه‌ڤ ئنیه‌تا پەكەكێ یا قرێز بێ دیتن و ژ بۆ ڕۆژاڤایێ کوردستانێ ستراته‌ژیه‌ک دن بێ ئاڤاکرن. ئه‌رکا پەكەكێ ئه‌وه‌ کو ب هه‌موو ئاوایی ڕێ ل ده‌ستکه‌فتیێن نه‌ته‌وی بگره‌. ئه‌رکا پەكەكێ ڕێگریا ده‌وله‌تبوونا کوردا یه‌.

ل پێشیا کوردێن ڕۆژاڤایێ کوردستانێ یێن کو د ڕێیا پەكەكێ دا و د بن ئالا پەكەكێ دا‌ به‌هسا کورد‌یتیێ دکن ڕێیه‌ک هه‌یه‌ کو ڕاستیا خوه‌ ببینن، ده‌ست ژ سیاسه‌تا پەكەكێ به‌ردن و ژ بۆ وه‌لاتێ خوه‌ ژ بۆ ده‌ستکه‌فتیێن نه‌ته‌وی ده‌ستبدن هه‌ڤ و ته‌ڤبگه‌رن.

باش بالا خوه‌ بدنێ، پەكەكە ل ڕۆژاڤایێ کوردستانێ چ دکه‌؟ ل ڕۆژهلاتێ کوردستانێ، ل باشوورێ کوردستانێ چ دکه‌؟ هه‌روه‌ها ژ هه‌موویێ گرنگتر ئه‌ڤه‌ 30 سالن ل باکورێ کوردستانێ چ کریه‌. ئه‌نجاما خه‌باتا وان یا 30 سالی یا کو بوویی سه‌ده‌ما رژینا خوینا ب هه‌زاران جوانێن کورد چیه‌؟ گه‌لۆ هه‌تا وه‌ک ڤێ گاڤێ ل باکورێ کوردستانێ گونده‌ک ئازاد کرنه‌؟ گه‌لۆ ده‌ستکه‌فتیه‌ک نه‌ته‌وی ده‌ستڤه‌ ئانینه‌؟ تشته‌ک نینە. سیاسه‌تا پەكەكێ ل باکور بوویه‌ ئەگەرێ تێكدانا جڤاکا کورد و وندابوونا نرخێن مرۆڤاتیێ، بارکرنا 7 ملیۆن کوردان ژ کوردستانێ و وێرانکرنا کوردستانێ.

سبه‌هی شه‌رێ ل دژێ داعیشێ ب داوی دبە، ھینگێ دێ هه‌لوه‌ستا ئەمریكایێ ل سوریه‌ و ڕۆژاڤایێ کوردستانێ چبه‌؟ ئەمریكا هه‌ر گاڤێ دکاره‌ ژ سوریێ‌ ده‌رکه‌ڤه‌. هینگێ چه‌کدارێن پەكەكێ به‌ر ب رژێما سوریی ‌ڤه‌ دچن و دبن ملیسێن رژێما سوریێ‌.

 گه‌لۆ ژ بۆ چ پەكەكە ناڤێ کوردستانێ گوهه‌ریه‌ و ب ئاوایه‌ک فه‌رمی کریه‌ باکورێ ڕۆژهلاتێ سوریێ‌. گه‌لۆ ژ بۆ چ ئالا کوردستانێ ل ڕۆژاڤا قه‌ده‌خه‌یه‌. هه‌تا کو کورد ڤان تشتان هه‌موویان به‌رچاڤ نه‌گرن و نه‌بن خوه‌دی هه‌لوه‌ست، دێ هه‌ر کۆله‌یێن سیاسه‌تا قرێژ یا پەكەكێ بن .

ڤان ڕۆژان ئه‌نەکەسێ ل ڕۆژاڤایێ کوردستانێ هنده‌ک خوه‌پێشاندان ل دارخستن. ملیسێن پەكەكێ ب توندی ئێریشێ وان کرن، ئالا کوردستانێ بنپێکرن، ژنێن کورد بریندار کرن و ئه‌و کۆلانان دا‌ خراندن. گه‌له‌ک ڤه‌کری تشتا كو پۆلیسێن ترک ل  ‌ باکورێ کوردستانێ ل ھەمەبەر  وەلاتێن كورد دکن چو جارا وه‌ک یا کو ملیسێن پەكەكێ ل قامشلۆ کرین نه‌خرابتره‌.

مژارەك  دن ئه‌وه‌ کو، گه‌له‌ک ئالیێن کورد، ده‌ما بوویه‌ره‌ک دقەومە د جھ دا‌ داخوویانیا ده‌رتێخن و بوویه‌را شه‌رمه‌زار دکن. گه‌لۆ چه‌ند پارتییێن سیاسی، یان ژی ده‌زگه‌هێن سڤیل، ده‌زگه‌هێن مافێ مرۆڤان ئێریشا چه‌کدارێن پەكەكێ ل ڕۆژاڤایێ کوردستانێ شه‌رمه‌زارکرن؟ ڕاست مرۆڤ مه‌ره‌قا ڤان ناڤا دکه‌. د ده‌رحه‌قێ سیاسەتا پەكەكێ دا گه‌له‌ک تشت تێن گۆتن، لێ دیارە خه‌لکه‌ک ژ بۆ به‌رژه‌وه‌ندیێن خوه‌ یێن که‌سا‌تی و ڕۆژانه‌ ناخوازه‌ ڕاستیا هه‌یی ببینه‌. ژ بیر نه‌کن کو دێ ئه‌ڤ سیاسه‌ت ئه‌ولی سه‌رێ خوه‌دانێ خوه‌ و دووڤرا ژی سه‌رێ هه‌ڤکارێن خوه‌ و یێ ل دووڤ وان دچن بخوه‌