پارتی خوە ل بهایێن سەردەم و بهایێن گەنجان بکەت خوەدان
محمەد عامر دێرشەوی، چاڤدێرێ سیاسی، د هەڤەیڤینەکێ دا دگەل مالپەرێ سبەهی بەرسڤا پرسان ددە و د بەرسڤێن خوە دا گەلەک بابەت، پێشنیار و مژارێ بالکێش ژ بۆ کۆنگرەیێ ١٤ێ یێ پارتییا دەمۆکراتا کوردستانێ بەرچاڤ دکە.
پرسیارێن مالپەرێ سبەهی:
ژ کۆنگرەیێ ١٣ یێ پارتییا دەمۆکراتا کوردستان هەتا نها ١٢ سال دەرباس بوون، د ناڤا ڤان ١٢ سالان دا گەلەک بوویەر قەومین و ل دەڤەرێ گەلەک گوهەرتن چێبوون. د رۆژا مە یا ئیرۆ ژی دا، دەڤەر د ناڤ کەلینێ دایە و بەر ب گوهەرتنێن مەزنتر دچە. ل باشوور ژی خەلک ب ئاوایەکی گشتی ژ رەوشا هەیە نەرازیە و گەلەک گلی و گازندە هەنە. د ناڤ ڤێ رەوشا :ئالۆز و تەژی تەڤلیهەڤی دا دێ پەدەکە کۆنگرەیێ خوە یێ ١٤ێ بکە.
١- وە چ هیڤی ژ کۆنگرەیێ ١٤ێ یێ پەدەکێ هەنە؟
٢- ل سەر ئاستا ناڤدەولەتی و جیهانی پێشنیارێن وە ژ بۆ کۆنگرەێی هەنە؟
٣- ل سەر ئاستا ناڤخوەیی، ب تایبەتی ئیدارە و حکومەتێ وە چ پێشنیار هەنە؟
٤- ژ بۆ گوهەرتنێن ناڤخوەیا پارتی و هەیکەلێ وێ هوون چ پێشنیار دکن؟
بەرسڤێن محەمەد عامر دێرشەوێ:
١- د تەمەنێ درێژێ پارتییا دەمۆکراتا کوردستانێ (پارتی) دا گەلەک پیلانێن لەشکەرى و سیاسى هاتن ل سەر رێکا پارتى، ڤێجا بکەر یێن ڤان پیلانان بکەرێن ناڤخوەیى بن، دەرەکى، یان ژى هەڤبەش بن، پارتى کارى خوە ل بەرامبەرى ڤان پیلانان راگریت و بەلکو هەرجارەکێ ب هێزتر دبوو، ژ بەر کو پارتى ژ ناڤا جەرگێ جڤاکا کوردى هاتییە. پارتى کارى بهایێن خوە بکت بهایێ جڤاکا کوردى و ڤێ جڤاکێ خوە ل پارتى دکر خودان. د ڤان سالێن دوماهیێ دا، ب تایبەت د ناڤا ڤان ١٠ سالێن داوی دا، ژ بۆ ژناڤبرنا بهایێن جڤاکا کوردى و کوردستانى گەلەک کار هاتییە کرن.
پارتى پێویستە د کونگرەیێ خوە یێ ١٤ێ دا ل سەر ڤێ خالێ، ب رژدى راوەستیت. دهەمان دەم دا دڤێت پارتى خوە ل بهایێن سەردەم و بهایێن گەنجان بکەت خودان.
٢- هەرێما کوردستانێ پێگەهێ بکەرەکى ناڤدەولەتى د پرسێن رۆژهەلاتا ناڤەڕاست هەیە و بێژە گەلەک پرسێن جیهانى ژى دبینیت. پارتى ستوونا ئاڤاکرنا هەرێما کوردستانێ یە پاراستنا ڤى پێگەهى ئەرکەکێ گرنگێ پارتىیا دەمۆکراتا کوردستانێ یە.
٣- چاکسازى و خوە نووژەنکرن د ناڤ دامودەزگایێن هەرێما کوردستانێ دا گەلەک یا کوندە. ژ بەر رۆلێ پارتى د ئاڤاکرنا هەرێما کوردستانێ دا، پارتى دکەڤیت ل بن فشارێ و پارتى تێت دیتن وەکو بەرپرس ژ ڤێ کوندیێ. د ڤێت کونگرە دەرفەتەکا دی بیت کو، پارتی ب رژدى ل سەر ڤێ خالێ راوەستیت.
٤- ئەگەر نەبێژم پارتى سەقامگیرترین پارتییا سیاسییە ل سەر ئاستێ دونیایێ و دەڤەرێ، دێ یەک بیت ژ پارتیێن هەرە سەقامگیر. گەلەک هوکار ل پشت ڤێ خالا ئەرێنى دراوەستن، یەک ژێ بنیاتدانانا (هەیکەلیەتا) ئاڤابوونا پارتیێ یە. پێویستە ئەڤ خالا ئەرێنى بێت پاراستن. ل سەر ئاستێ لوکال، باشە پارتى هزرەکێ ل سەر بنیاتدانانەکێ بکەت، کو دائیرە و بازنێن رەسمیێن کۆمۆسیۆنا هەلبژارتنان بێن ل بەرچاڤ وەرگرتن.
