سیاسی

پارتی دخوازە ب بەشداریا گۆرانێ دفنبلندیا ینك بشكێنە

پدک و گۆران ب دزی دجڤن

گاڤێن پێک ئانینا کابینه‌یا نوو یا حکومه‌تا باشوورێ کوردستانێ ده‌ست پێ کرنه‌ و هه‌تا نها چه‌ند جڤین ب ئاوایه‌کی نه‌راگه‌هاندی د ناڤبه‌ر چه‌ند ئالیێن سیاسیێن باشوورێ کوردستانێ ده‌ چێبوونه‌.

ل گۆر وان زانیاریێن گه‌هشتینه‌ مالپه‌را مه‌ (به‌رگه‌ھ)، پارتیا ده‌مۆکراتا کوردستانێ (پدک) و ته‌ڤگه‌را گۆرانێ ژ جاره‌کێ زێده‌تر جڤیانه‌ و ئه‌و جڤین دووری زۆم و چاڤکێن کامه‌ران بوونه‌، ئانکۆ ب دزی و ژ ڕاگه‌هاندن و مه‌دیایێ ڕه‌ نه‌هاتینه‌ ڤه‌کرن.

پدک دخوازه‌ ته‌ڤگه‌را گۆران به‌شداری کابینه‌یا نوو یا حکومه‌تێ بکه‌ و ته‌ڤگه‌را گۆران ژی دخوازه‌ ببه‌ به‌شه‌ک ژ کابینه‌یا حکومەتا نوو، کابینه‌یا نۆیه‌م، لێ هه‌ر دو ئالی، پدک و گۆران، گه‌له‌ک ب حه‌ساسی و هشیاری نێزیکی هه‌ڤ دبن. پارتی دزانه‌ گۆران شکه‌ستیه‌ و د ڕه‌وشه‌ک ئالۆز ده‌ ده‌رباس دبه‌، لاوازه‌ و ناکۆکیێن وێ یێن ناڤخویی ڕۆژ ب ڕۆژ کوور دبن، ئه‌گه‌ر گۆران دڤێ ڕه‌وشا ئه‌و تێ ده‌یه‌ به‌شداریێ د حکومه‌تا نوو ده‌ بکه‌ دێ ناکۆکیێن وێ یێن ناڤخوه‌یێ گه‌له‌ک کوورتر و به‌رفره‌هتر ببن. ئه‌گه‌ر گۆران دڤێ ڕه‌وشا خوه‌ یا شکه‌ستی د هلبژارتنان ده‌ و د ڕه‌وشا خو ئه‌یا ئالۆز ده‌ به‌شداری حکومه‌تێ ببه‌ نکاره‌ چ شه‌رتان ب سه‌ر پارتی ده‌ فه‌رز بکه‌.

پارتی دخوازە د ڤێ قۆناخێ ده‌، گۆران د حکومه‌تێ ده‌ به‌شدار به‌ دا ل ده‌ڤه‌را سلێمانیێ بالانسا سیاسی و ئیداری ڕابگره‌ و گۆران و یەكێتیا نشتمانیا كوردستانێ (ینك) بخه‌ د ته‌رازوویه‌كا هه‌ڤسه‌نگ ده‌ و بڤی ئاوایی دفنبلندیا ینک ل سلێمانیێ بشکینه‌. ینک ژی ڤێ یەكێ باش دئزانە و ئەڤ ھاوكێشە باش فھێم كریە، ژبەرھندێ ب هشک و دژواری دژه‌ کو گۆران به‌شداریێ د حکومه‌تا نوو ده‌ بکه‌ و چه‌ند جاران ژ پارتی ڕه‌ گۆتیه‌ کو ئه‌و قه‌بوول ناکن گۆران ببه‌ به‌شه‌ک ژ کابینه‌یا نوو. لێ پارتی وه‌که‌ هێزا یه‌که‌م ئه‌و بریار دده‌ كا کی به‌شداربه‌ و کی به‌شدار نه‌به‌ د حکومه‌تێ ده‌. ڕۆژێن بێن ئه‌ڤ تابلۆیه‌ دی زێده‌تر زه‌لال ببه‌.

نووچە/ئانالیز
NH

Back to top button