پارتی پێدڤی ب فۆرماتیرکرنێ و نووکرنێ یە
نڤیسکار حسێن تەها هرۆری، دەربارێ کۆنگرەیێ ١٤ێ یێ پارتییا دەمۆکراتا کوردستانێ (پارتی) بەرسڤا پرسێن مالپەرێ سبەهی ددە و د ناڤا بەرسڤێن خوە دا، ب تایبەتی د داوییا بەرسڤێن خوە دا د نڤیسەکێ دا، گەلەک مژارێن گەرم و گرنگ د ئازرینە. ئەڤ ل ژێر پرس و بەرسڤ:
مالپەرێ سبەهی: وە چ هیڤی ژ کۆنگرەیێ ١٤ێ یێ پەدەکێ هەنە؟
حسێن تەها هرۆری: ئەز وەکی لایەنگرەکێ پارتی و ژ بنەمالەکا کوردپەروەر یا کو خوە ب خودانێ پارتی دزانن، بۆ پارتی گەلەک خەمبارم و پارتی گەلەک لاواز دبینم و رۆژ بۆ رۆژێ هیڤی و ئۆمێدێن من ب پارتی سستر دبن، هۆکارێن باوەرییا من ب پارتی دشکێنن گەلەکن، من گەلەک جاران د گۆتار و نڤێسینێن خوە دا ئاماژە دایە وان هۆکاران، لێ ئەز دزانم گلی و گازندە و رەخنەیێن مە ناگەهەنە چو جهان، ئەو خەمخوەرییا ئەم ژ پارتی دخوین و دلسۆزیا مە بۆ وێ هەی سەرکردایەتیا پارتی های ژێ نینە و هەر نزانیت ئەم هەینە یان نە، هەر چو منەت ژی ب مە نینە، ژبەرکو ئەم ب رێزگرتن و رەخنەیەکا ئاڤاکەر و بێی دژایەتیکرن دنڤێسین و دئاخڤین، هەکو مە ژی وەکی هندەکان بێرێزی و دژایەتییا پارتی کربا ئەز باوەردکم دا هەمی گۆتنێن مە گەهەنە جهێن بلند یێن پارتی و دبیت بەرسڤا مە ژی هاتبا دان.
وە ڕاستی بڤێت من گەلەک پەیام بۆ پارتی یێن هەین هندی بنڤێسم تڤاڤ نابن، لێ ئەز دزانم هەر یا ژ خوە یە، پارتی کەسێن ژ هەژی و دلسۆز و تێگەهەشتی نەڤێن، پارتی حەز ژ ڕاستگۆییێ ناکەت، پارتی مەلاق و دز و گەندەل و درەوکەر دڤێن، پارتی فێلباز و کۆرێن ئاغا و سەرۆک جاشان دڤێن، پارتی خوە ب وان ڤە گرێدایە و پشتا خوە دایە کادرێن خوە یێن دڵسۆز، پارتی هێژ گەلەک یا کلاسیکە پشتا پارتی ب سەرۆک عەشیران و مرۆڤێن ئۆلی هێژ یا گەرمە، پارتی هێژ نەشیایە جڤاکەکێ ڕەوشەنبیر و پێشکەفتی ئاڤابکەت کو ب سیستەمەکێ مودێرن سیاسەتێ بکەت و پشتا خوە ب نفشێ نووی ڤە گەرمبکەت، مادەم پێشنیار و رەخنەیێن مە ژ دەرازینکا مالێن مە دەرباس نەبن بۆچی یە بۆ پارتی بێژین و باخڤین لەوما من چو تشت نینن بۆ پارتی بێژم.
مالپەرێ سبەهی: ل سەر ئاستا ناڤدەولەتی و جیهانی پێشنیارێن وە ژ بۆ کۆنگرەێی هەنە؟
حسێن تەها هرۆری: ل سەر ئاستێ ناڤدەولەتی و جیهانی ژی هەر وەسا ئەز پارتی گەلەک لاواز دبینم، ل سەر پرسێن نیشتیمانی و نەتەوەیی پارتی نەشییایە وەکی پێدڤی پەیاما خوە بگەهینیتە ژ دەرڤە پارتی پشتا خوە دایە پرسێن گرنگ و نەتەوەیی، پارتی مایە ب پرسێن ئابۆری و پۆستێن بەغدا ڤە، وەکی دابێنکرنا مووچەیان و بودجێ. جینۆساید، ئەنفال، چامە و کارەساتێن هاتینە سەرێ کوردان هەمی نڤاندینە و کەسێ های ژێ نەمایە.
مالپەرێ سبەهی: ل سەر ئاستا ناڤخوەیی، ب تایبەتی ئیدارە و حکومەتێ وە چ پێشنیار هەنە؟
حسێن تەها هرۆری: هەر وەسا ل سەر ئاستێ ناڤحوەیی ژی پارتی گەلەک لاواز بوویە، گۆتن و کریارێن پارتی ژ ئەرد و ئەسمانان ژێک ددوورن، دەهـ ژ سەدێ ژی ئەو تشتێ پارتی دبێژیت ناهێتە ب جهـ ئینان. ئەڤە سیهـ سالن پارتی ل سەر دەستهەلاتێ، کانێ کارەبا بیست و چار دەمژمێری؟ کانێ گاز، غاز و پانزین یێن بەردەوام دابێنکری و ب بهایەکێ گونجیای بۆ هاوەڵاتیان؟ کانێ چاکسازی؟ کانێ ئەو بەرپرسێن دز و گەندەل یێن هاتینە سزادان؟ کانێ فڕۆکخانەیا دهۆکێ؟ کانێ زمانێ ستاندارد بۆ سەرانسەری هەرێمێ؟ کانێ هەستا نەتەوەیی؟ کانێ لەشکەرەکێ نیشتیمانی؟ کانێ دستۆر؟ کانێ ئەمن و ئاسایشەکا هەڤگرتی؟ کانێ بریارا مادێ ١٤٠ێ چ لێ هات؟
تەعریب یا بەردەوامە، ئەنفال یا بەردەوامە، کۆچبەری یا بەردەوامە، گرۆپێن ئیسلامی یێن تۆندرەو رۆژ بۆ رۆژێ ب هێزترن، د سەردابرن و گەمژەکرنا نفشێ نووی و زارۆکان ل بن دروشمین ئۆلی ڕۆژ بۆ ڕۆژێ بەربەلاڤترن، پارتی ل دژی ڤان هەمیان چ کریە؟ وەڵات ب بلندکرن و مەزنکرنا ئاڤاهیان ئاڤا نابیت، وەڵات ب ئاڤاکرنا مرۆڤان ئاڤا دبیت.
مالپەرا سبەهی: ژ بۆ گوهەرتنێن ناڤخوەیا پارتی و هەیکەلێ وێ هوون چ پێشنیار دکن؟
حسێن تەها هرۆری: سەرکردایەتییا پارتی گەلەک یا پیر و کەڤناربووی سیاسەتەکا گەلەک کلاسیک یا هەی، پارتی پێدڤی فۆرماتیرکرنێ و نووکرنێ یە، پێشنیارا من ئەوە ئەڤ بچمێن کەڤن یێن ژییێ وان ژ شیستێ و پێهەل هەمی خانەنشین ببن و ڤرێکنە مال بلا بێهنا خوە ڤەکەن و رێز لێ بهێتە گرتن، ل شوونا وان رێ بۆ خودانێن باوەرنامەیان و گەنجێن خودان شیان بهێتە دان و پارتی خوە گەنج بکەت و کادرێ خوە فێری سیاسەتێ بکەت نە فێری مەلاقییێ و دوروویاتییێ و دزی و گەندەلییێ و درەوێ بکەت.
هەکو پارتی نەشێت یان نەڤێت دز و گەندەلێن خوە سزابدەت، بلا هەمیان ژ کاری دەربێخن و ڤرێکنە مال دا سەروکانیا وان زەلال ببیت، بتنێ ب ڤی رەنگی دێ شێت ل سەر دزییێ و گەندەلییێ زالبیت.
ب گشتی گلی و گازندە و پێشنیارێن من بۆ پارتی هەمی یێن د ڤێ گۆتارێ دا.
بەرێزان: دەمێ سەروەرییا هەرێما کوردستانێ ژ لایێ وەڵاتێن جیران ڤە دهێتە بێرێزکرن و پێشێلکاری ل سەر دهێنە کرن، هینگێ مللەت هەست ب بێخودانیێ و بێسەروەریێ دکت، وەڵاتێن جیران وەکی ئیرانێ هو ب ئاشکرایی ب مووشەکان هێرشان دئینیتە سەر کوردستانێ، یان دەمێ میلیشیاتێن عێراقێ وەک حەشەدا شەعبی دیسان ب هەڤکارییا ئیرانێ بارەگایێن پارتیێن کوردان دسۆژن و هێرشان ب مووشەکان دئیننە سەر هەرێمێ، هەر وەسا وەڵاتێ ترکی بێی ترس و شەرم هیچ رێزەکێ ل سەروەریا هەرێمێ و عێراقێ ناگرت، رۆژانە بێی هیچ ئەگەرەک ب تنێ ب بەهانەیا هەبوونا پەکەکێ ل باشوور دەڤەرێن سەر سنۆری بومبەباران دکت و زیانێن گەلەک مەزن دگەهینیتە دەڤەرێ، ئەو جهێن پەکەکێ بۆ ترکیا بەرداین و هیچ پەکەکە ژی لێ نەماین بۆ نموونە وەکی وان گوندێن دەڤەرا سندییان، ئەڤ بومبەبارانکرنا گوندێ پەرەخێ و شەهیدبوونا ١٠ هاوەڵاتیان و ژ ۳۰ برینداران پتر و هەر وەسان چەندین جاران ل دەڤەرا گولییان و دەڤەرا بەرواری و نێرەوە و رێکان و گەلەک جهێن دی هێژ رۆژانە دهێنە بومبەبارانکرن و دەڤەرێن ل سەر سنۆری هەمی داگێرکرینە و ل گەلەک جهان ژ پێنجی کیلومەتران پتر هاتینە ناڤ ئاخا هەرێمێ، هەلبەت هایا دەستهلاتا هەرێمێ (پارتی) ژێ هەیە، لێ ئەم نزانن وە رێکەفتنەک ل گەل وان هەیە یان نە؟ هەکو وە چو رێکەفتن ل گەل وان نەبن، ئەرێ پا بۆچی رێ بۆ ترکیا دهێتە دان یان بۆچی هەلویستەکێ دژوار ژ لایێ وە و حوکمەتا وە ڤە ل دژی ترکیا ناهێتە وەرگرتن کو باندورێ ل کریار و پێشێلکاریێن نەرەوا یێن ترکییێ بگرن؟
هەکو هوون بێژن مە چەندین جار، داخوازی ژ ترکی و پەکەکێ کریە کو شەرێ خوە ببەن ناڤ ئاخا خوە، ئەڤە راستە ئەم هەمی دیدەڤانین، لێ ئەڤە بەس نینە و ئەڤە نەهەلویستە و چو پێڤە ناهێت و بۆچی تاکو ئەڤرۆ ژی داخوازا وە نەهاتیە بەرچاڤگرتن؟ تاکو بەرسڤا داخوازێن وە ژی نەهاتیە دان، ئەرێ چ دبێژنە ڤێ، هوون نابینن ئەڤە هەلویستەکێ گەلەک لاواز بت هەمبەری دوژمنان یان دوژمن چو هزرێ بۆ مە کوردان ناکت و هەر نزانن ئەم هەنە یان نە، یان ژی دەستپێکا تەسلیمبوونێ بت؟ شەرمزار کرن بتنێ بەس نینە، پێدڤی یە هندەک پێنگاڤێن رژد بهێنە هاڤێتن و تایبەت داگێرکرییا ترکی و هێزێن وان ژ ئاخا مە دەرکەڤن.
ژبلی بومبەبارنکرنا دەڤەرێن مە پێشێلکاریێن ترکیا ل سەر ئاخا هەرێما کوردستانێ ب گەلەک رەنگێن دی ژی یا بەردەوامە، ترکان و چەتەیێن وان چو تشت بۆ مە نەهێلان ژبلی بومبەبارانکرنا گوندان و جهێن گەشتوگۆزاری و شەهیدکرنا سڤیلان، گەلەک زێدەگاڤییێن دی ژی دکەن، چیایێن مە هەمی سۆتن، هەر دارا ناڤدار و رەسەن برین و پرتپرت کرن و برن بۆ خوە فرۆتن، ب هەمی رەنگان ژینگەهێ ژ ناڤدبن، بۆ نموونە ل چیایێن گوندێ هرۆرێ و پشتا زنارا کێستە هندەک دارێن گەلەک مەزن و کەڤن هەبوون، چەتێن ترکان هەمی برین و برن، چوونا چیای یا ل گوندییان و خەلکێ دەڤەرێ کریە هزرەت، ل هنداڤی و ل دەوروبەرێن گوندێن هرۆرێ بارەگایێن خوە یێن لەشکەری داناینە و ئالایێ خوە چکلاندیە، ئەم هەست ب داگیرکرنێ دکین و بیست و چار دەمژێران ب دێربوونان و کامیرێن چاڤدێریێ یێن گەلەک پێشکەفتی و مودێرن چاڤدێرییا کولانێن گوندان دکن و ب چاڤێن نەرەوا تەماشەی ژن و کچێن کوردان دکن و تشتەک ژ دەستێن گوندییان و خەلکێ دەڤەرێ ناهێت، جەندورمێن ترکان گەلەک دبێرەوشتن و ئەز دشێم بێژم وە پیسترین مرۆڤن ل سەر روویێ ئەردی، ب هەر رەنگێ بیت پێدڤی یە بۆ وان تخویبەک بهێتە دانان و وە هەلویستەکێ رژد و دژوار ل دژی وان هەبت. هیڤیدارین بێژنە ترکان بلا ئەڤە بەس بیت و ژ ئاخا مە دەرکەڤن.
دەستهەلاتا هەرێمێ (پارتی)، بۆ زانینا وە مللەت گەلەک بێهیڤی بوویە، پرسێن نیشتیمانی و کوردینی، شۆرەش و دیرۆک، پیرۆزیێن وەڵاتی، هەمی ژبیرکرینە و رێز لێ ناهێتە گرتن، کوردینی یا بوویە شەرم وفهێتی، هەر چەندە ناخوازم ئەڤا ل ژێری یا د ناڤبەرا دو کڤانان دا بێژم لێ بڕاستی یا بوویە کەتوار رۆژ بۆ رۆژێ د ناڤ مە دا زێدە دبت ، مە چەندین جاران ژ وەڵاتیان گوهلێ بوویە ب تۆرەی ڤە دبێژن: “ل سەر دەمێ سەدامی ترکیا نەشیا ئێک بهۆست ب ناڤ ئاخا عێراقێ ڤە بهێت، یان گولەیەکا تڤەنگێ ئاراستەی ئەسمانێ عێراقێ بکەت، دیسان خوەزی ب رژێما رۆخای دهێنە راهێلان، خوەزی ب دەستهەلاتا سەدامی دهێنە دان” ئەز پێش پارتی ڤە شەرمدکم دەمێ من گوهـ ل ڤان گۆتنان دبیت، ئەڤە نەگۆتنا منە و کەربێن من گەلەک ژ وان ڤەدبن یێن ڤێ دبێژن، ئۆ بزانن ئەنفال و چامەیێن هاتینە سەرێ کوردان هەمی هاتینە ژبیرکرن، چاڤێ خەلکێ بتنێ یێ ل مووچەیان، قەیرانێن ناڤخوەی، گرانبوونا پانزینێ، نەبوونا کارەبێ، نەبوونا مووچەیان و پێدڤیێن خزمەتگۆزاری ئەڤە هەمی ل سەر پرسێن نەتەوەی زالبووینە و مللەتی های ژ پرسێن نەتەوەی و نیشتیمانی نەمایە، هەستا نەتەوەیی یا دمریت، ئەرێ هوون ژی ژ پرسێن نەتەوەیی بێهیڤی بووینە یان هندە ژ دەستێن وە دهێت و هەوە چو پێچێنابت؟ ئەرێ هوون ڤێ چەندێ دزانن و هوون ل دووڤچوونا هۆکارێن ڤێ چەندێ دگەرن و بزانن بۆچی مللەت هولێ هاتەیە؟ هیڤیدارین ل هۆکارێن تۆرەبوونا مللەتی بزڤرن و خوە بدروستی ل مللەتی بکەنە خودان.
مخابن ئەڤە ساڵەک پترە هەر وەکی ئەم دبینین گوندێن مە بووینە مەیدانا شەرێ داگێرکەران (پەکەکێ و ترکییا) و رۆژانە توپبارانکرنا وان ل دەوروبەرێن گوندان و ل ناڤ گوندان یا بەردەوامە، زیانێن گیانی و مادی گەهاندینە گەلەک گوندان، خەلکێ هندەک گوندان خوە راگرت و گوند بۆ دوژمنان بەرنەدایە، دیارە ئەڤ داگێرکەریا ترکیا دێ گەلەک ڤەکێشیت و رۆژ بۆ رۆژێ بنگەهێن خوە موکمتر لێ دکەن و مەترسیێن مانا وان ل سەر دەڤەرێ پترن و چیایێن مە بۆ وان هاتینە بەردان، هوون دزانن گوندێن بێ چیا نەگوندن و ژیارا گوندییان ل سەر سامانێن چیانە، هەکو مە چیا نەمان هێدی هێدی گوند دێ هێنە بەردان بۆ دوژمنان، هیڤییا مە ئەوە بەری گوند ب تڤاڤی ڤالە ببن، هوون یێن بەرێز خوە ل ڤان گوندان بکەنە خودان و تخویبەکی بۆ زێدەگاڤیێن داگێرکەران دانن و ل شوونا داگیرکەرێن ترک دەڤەرێن مە و دەوروبەرێن گوندان ژ لایێ هێزێن سنۆری و پێشمەرگەی ڤە بهێنە پاراستن، پەکەکە ژی هەر نەمایە ل دەڤەرێ بلا هێزن ترکی ژی ژ گوندی بهێنە دوورکرن و رێ بۆ گوندییان بهێتە ڤەکرن و جارەکادی ب سامانێن چیایێن خوە دلخوەش ببن ڤە، ئەڤ دەڤەرێن مە ئاماژە پێ دایین ل سەردەمێ هەمی شۆرەشان دەڤەرێن ئازادکری بوون و خوونا گەلەک شەهیدان بۆ هاتییە رێژتن و گەلەک قارەمانان خوە گوری ڤی وڵاتی کریە،
هیڤییا مە ژ وە یێن بەرێز ئەوە ل سەرخاترا ڤان شەهیدێن قارەمان و دلسۆزێن کوردینیێ هوون دەڤەرێن مە پاشگوهـڤە نەهاڤێن و خوە لێ بکەنە خودان و ژ بن دەستێ داگیرکەران رزگاربکن، وەنەکەن نفشێ نوو و نەڤی و زارۆکێن وان شەهید و قارەمانان هەست ب بێخودانییا کوردستانێ بکەن و پەشێمانی وێ رێبازا کوردینیێ ببن یا بابێن وان تێ دا بووینە قوربانی، وەنەکن خەلکێ مە خوەزییان بۆ رژێما رۆخایی راهێلن.
بەرێزان ل داویێ من دڤێت بێژم، مللەتی دادوەری دڤێت، ئازادیەکا رها دڤێت، مللەتی ژیانەکا ئارام و تەنا دڤێت، مللەتی هەلویستێن نەتەوەی دڤێن ل دژی دوژمنان، مللەتی بزڤرینن سەر کوردینی و دلسۆزییا جاران یا باب و باپیران.
خودێ هاریکارێ وە بیت و هەر دسەرکەفتی و دسەرفەراز بن.
