ھەژدە ھزار سەرێن ئەتۆمی یێن ئێکەتیا سۆڤیێت نەشیان خۆ لبەر ھێزا ئابۆرى يا ئەمریکا بگرن.
ئێکەتیا سۆڤیێت، ئەو زل ھێزا پشتی شۆڕەشا ئۆکتۆبەرێ لساڵا ١٩١٧ ھاتیە دامەزراندن، لسەر ڕۆبەرێ ٢٢ملیون کم٢ کۆ سەرژمێریا وێ پتر ژ ٣٠٠ ملیۆن کەسان پێک دھات و سەرەرای ھەبوونا مەزنترین ھێزا ئەتۆمی ، بەژایی، دەریایی، تەکنۆلژیا پێشکەفتی ل ڤالاھیا ئەسمانی، ھەڤپەیمانیا وارشۆ یا لەشکەری و بلۆکێ ڕۆژھەلاتا ئەورۆپا و چەندین ڕژێمێن ھەڤپەیمان ل ئاسیا، ئەورۆپا و ئەمریکا لاتینی نەشیا پاراستنێ ژ مانا خۆ بکە و بێی ڕوودانا چ جەنگێن گەرم دگەل ڕکابەر و نەیارێن وێ ،دچاڤ نقاندنەکێ دا، ھەلوەشیا.
ھەلبەت ئارمانجا من ژ ڤی نئڤیسێ نە ئەوە كو ئەز سەدەمێن ھەلوەشاندنا ڤێ زل ھێزێ بدەم دیار کرن، ژبەر کۆ لگۆر ھەموو خاندن و ڤەکۆلینێن لسەر ڤێ پرسێ ھاتنە ئەنجامدان، فاکتەرێ ئابۆری دكن ئەگەرێ سەرەکیێ ژناڤچوونا وەكێتیا سۆڤیەتا بەرێ .
واتە سۆڤیەت ژ ئەگەرێ لاوازیا ئابۆرێ وێ و ژ دەست کورتی و ھەژاریا ھەڤوەڵاتیێن وێ ھەلوەشیا.
وێ شیانێن ئابۆری زێدەتر نەمان کۆ بكارە دڕێژیێ بھەڤڕکی وشەرێ سار بدە بەرامبەر ئابۆرێ ئەمریکا یێ یێ گەلەك بھێز و بێ رکابەر.
دیسان دیوارێ بەڕلینێ ژی نەشیا ڕێ لھەمبەر ھزاران ئەڵمانێن ڕۆژھەلات بگیرە ئەوێن ژھەژاریێ دڕەڤیان وقەستا بەھەشتا ئەلمانیا ڕۆژئاڤا دکرن دا ژیانەکا باشتر بخۆ وزاڕۆکێن خۆ لوێرێ دابین بکەن.
ئەڤ ھەردوو میناکە گرنگیا فاکتەر و ڕەھەندێ ئابۆری د پاراستن و بھێزکرنا سێستەمێ سیاسی یێ ھەر وەڵاتەکی ددەن دیارکرن.
یا ئەز دخوازم لڤێرە بێژم ئەڤە: پارتیا دەمۆکراتا کوردستانێ کو ئیرۆ ھێزا ژمارە یەکە ل باشۆرێ کوردستانێ و دڤان ھەلبژاردنان دا پڕانیا خەلکێ ب تایبەتی ل ھەولێر و دھۆکێ باوەریا خۆ ژێ را نوو کر و ژ بۆ چار سالێن دن پارتی خستن بن ئیمتیحانا داویێ،.
ڤێجا ئەگەر پارتی بڤێت ژ ڤێ ئیمتیحانێ و ئەزمونێ بسەرکەفتی دەرکەڤە و دەنگێن نەرازی ژی رازی بکە و دھلبژارتنێن پشتی چار سالێن دن ل سلێمانیێ ژی ببە جھێ باوەریا خەلکێ وێ دەڤەرێ، پێدڤیە پارتی لسەر سەکتۆرێ ئابۆری بجدی کار بکە و گاڤێن جدی پاڤێژە.
پارتی دەست پێ بكە ب دانانا پڵانەکا ئابووری یا ستراتیژی و دۆم درێژ، زانستی وشەفاف ل سەر بنگەھێ دادپەروەری و نەھێلانا پاوانخازیێ و بەرقرارکرنا یەکسانیێ دبازاریدا و بنبڕکرنا گەندەلیێ و ئەنجامدانا چاکسازیێ و ڕێکخستنا کەرتێن پەروەردێ و تەندرۆستیێ
لگۆر واقعێ ل باشورێ كوردستانێ ھەیە، پارتی نكارە ل دەڤەرا سلێمانیێ دەستڤەكری بە، پارتی دكارە سلێمانیێ د وارێ ئابووری دەپشتگوھ بخە، چونکو لگۆر واقعێ ھەیە، نە ممکنە ڕێ بھێتە دان پارتی کارەکێ ھۆسا لوێرێ ئەنجام بدە، لەوما پێڤیە پارتی گرانیا خوە لسەر دەڤەرێن دن دەینە..
دڤێت تەرکیزا پارتی بپلا ئێک لسەر (بەنکا پارتی) بە ل دھۆکێ وپاشی ژی ل ھەولێرێ، ئەوژی ژبۆ نەھێلانا وێ جودایا ئیرۆ دناڤ بەرا ھەردوو باژێرا دا ھەیە.
کو ئەڤ پڵانا گەشەکرنا ئابووری سەقایەکێ وەسا بەرقرار بكە، نەبتنێ مۆچە و خزمەتگۆزاری پێ بھێن دابین کرن بەلکۆ دھۆک و ھەولێر ببنە پەناگەھێ ڕاکێشانا كاركەر و سەرمایەداران، بتایبەتی ژ سلێمانیێ و رەوشا ئابووری ل دەڤەرێن بن دەستھلاتا پارتیێ وسا خوەش و گەش ببە ئێدی خەلكێ دەڤەرا سلێمانیێ بخوە داخوازا پارتی بكن و د ھلبژارتنێن بێن دا ئەو ژی دەنگ ب پارتی بدن..
ئەگەر دوارێ ئابووری دا پارتی ڤان گاڤێن مە دیاركرین پاڤێژە كو شیانێن ھاڤێتنا وان گاڤان لبەردەستن ، دێ دیوارێ (دێگەلە) زووتر ژیێ بەڕلینێ بھەڕفە.
وحکومەتا (گردی زەرگەتە) و (قەڵاچۆلان) ژی دێ بساناھی تر ژیا ئێکەتیا سۆڤیەت ھێنە ھەلوەشاندن.
لێ ئەگەر پارتی دوارێ ئابووری دا چاكسازیێن بنگەھین نەكە و گاڤێن جدی نەھاڤێژە، دوماھی دەرفەتا مانا خۆ دێ ژدەست دە.
ادریس اسماعیل تروانشی
18.11.2018
