شرینێ شرینه‌ك هه‌بوو، لبا وێ ژ هه‌مییان شرینتر بوو، وێ ئێڤارێ ژ مه‌ره‌ما دیتنا شرینێ خۆ قه‌ستا ناڤه‌نده‌كا ره‌وشه‌نبیرى كر، چاڤێن هه‌مییان پێڤه بلۆق بوون، هه‌ر ئێكى ژ وان دڤییا شرین شرینا وى بیت، هه‌ولدان سلفیان دگه‌ل بگرن، ژمارەیا تێله‌فۆن و سناپ و ئینستگرامێ وێ بزانن، ستران ب به‌ژن و بالا وێ ڤه دگۆتن، تژى كۆشا وێ په‌سن و په‌یڤێن قه‌په دكرن .
-توزۆیێ سۆفى سمبێلێن خۆ بادان، دیاره حۆریێن بهه‌شتى جوانییا خۆ یا ژته دزى .
-حه‌جییێ كورتێ سه‌رێ تلێن خۆ گه‌هاندنه به‌رچاڤكێن خۆ جهێ وان خۆشكر، گرنژینا ته بێى ده‌ستوورى جانێ من داگیر كری یە.
-حه‌سۆیێ مستێ ده‌ستێ خۆ ب كه‌چه‌لێ خۆ دا ئینا خوار، دیاره ئه‌ز خوشتڤییەكێ خودێ مه تو ل ڤێ سات و ده‌مى دا ل دیدارا من شاد كری.
-سالۆیێ ره‌شۆ پێسیرا خۆ په‌رخاند دۆخینا خۆ بره سه‌رى، هنده سالن ئه‌ڤ گه‌ردۆنه ژ به‌ر خاترا ته یێ ژیانێ دكه‌ت .
-قه‌نجویێ سیاسى سویچێ لێكززێ دانا سه‌ر مێزێ بێى هێرڤه و وێڤه ئه‌ز دێ خۆ ل هه‌ر تشته‌كێ من هه‌ى ل ژیانێ دا بێ به‌هركه‌م ب تنێ تو ببى هه‌ڤاله‌كا ژیێ ماى .
شرینێ مێزه كره چاڤێن شرینێ خۆ ب زمانێ چاڤان یارى ب هه‌ستێن خرا كر. ژڤانه‌ك بۆ كوشتنا خه‌ریبییا خۆ دگه‌ل شرینێ خۆ دانا، ب كوته‌كى شرینێ خۆ ژ ده‌ستێن وان بێ مرازا رزگار كر، ئه‌و و شرینێ خۆ چوونه پاركا خه‌ما .
-خولى ب سه‌را چ د چاڤ برسینه .
-ڤان ده‌ڤ گلیزا خۆ ره‌فتارێن سنێلا ژى یێن ژبیركرین .
-نوزانم دێ چ بێژنه روویێن خۆ، دترسم ئه‌ڤه ژى خۆ ب زه‌لام بهه‌ژمێرن .
-باوه‌ربكه ئه‌ڤه كه‌نكه‌نێن سه‌رده‌می نه .
-ئه‌ڤ گورگێن ل چۆلى ڤه‌ره‌سیاى د نساخن، ده‌ردێ وان پێدڤى ده‌رمانه‌كی یه.
گرنژینه‌ك به‌ردا .
و الله گرنگه ئه‌ڤ توخمه مرۆڤه ببنه چام بۆ نفشێ داهاتى.
-هه‌دارا من سه‌متا خۆیێ ژ ده‌ست دایى. دڤێت ده‌رمانه‌كێ بۆ ده‌ردێ وان ببینم .
-ده‌ستێ من ژى دگه‌ل ده‌ستێ ته .
شرینێ پتر ژ جوانییا خۆ، بلندتر ژ به‌ژنا خۆ، هێمنتر ژ مه‌ژیێ خۆ و ب پلانتر ژ حه‌زێنخۆ پلانێن خۆ دارشتن .
دیتنا وه دێ بیته هێكا دیكلى، لێ ل ده‌مه‌ك نێزیك، دێ كه‌روه‌رییا وه دانمه پێش چاڤێن هه‌وه.
ب رێیا چەتى .
-توزیێ ژ قه‌سیلێ ڤه‌ره‌سیایى، ئه‌و چ زل جه‌ریفن بسه‌ر و چاڤێن ته‌ڤه نووسیای ؟
سۆز بیت بۆ ته شرینێ هادر سمبێل بێنه فرینێ .
-حه‌جى یێ جاڤ په‌نجه‌ر ئه‌و چیە د ناڤ چاڤێن ته دهێنه ده‌ر ؟
دێ هه‌مى نوژدارا شه‌قینم دا ته ب ئێك چاڤ ببینم .
-حه‌سۆیێ سه‌ر كه‌چە‌ل ئه‌و چیە ل سه‌ر مێشكێ ته دا بوویه مه‌خه‌ل؟
شرینا نازدار سۆز بیت ل ده‌مه‌ك نێزیك بهێنه سه‌ر سه‌رێ من دهھ (میدار )*
-سالۆیێ مال دوخینێ تویێ خۆشى بۆ گرێدانێ ل نیڤا جۆخینێ .
جانا من یا زانا دێ ب خۆ ڤه‌كه‌م په‌روانا، دا ته بگێرینم لده‌شت و له‌یلانا.
-قه‌نجۆیێ دلا تو دزانى بابێ منێ به‌له‌نگاز ل بن ڤى ئه‌سمانێ شین، ل سه‌ر ڤى ئه‌ردێ ره‌پ و رویت پارچه ئه‌رده‌ك ل سه‌ر ناڤێ وى نینه بۆ ببیته قویت.
بابێ ته ژ ئاڤێ حه‌قتره، داخوازا وى ژنڤێژێ ڤه‌رتره .
هه‌ر ئێكى پتر ژ حه‌زێن خۆ، گه‌نده‌لتر ژ گه‌نده‌لییا خۆ، گرنگتر ژ هه‌ناسەیا خۆ، جوان وه‌رگرتن په‌یڤێن شرینا خۆ .
چه‌ند حه‌ژ ته دكه‌م شرینێ تو ڤه‌ژه‌ن و هه‌ناسەیا ژینێ .
هه‌ر هه‌موو ب خۆ نه حه‌سیان شرینێ نه دڤیا وان پێ بحه‌سینیت، هه‌ر تشتێ وێ دخواست بێى دودلى یێ ئاماده بوو، گه‌ر گۆتبا گاز نینه دا دۆلكێن گازێ ل به‌ر ده‌رى رێز بن، گه‌ر گۆتبا غاز نینه دا قنینه ملێن خۆ ده‌نه ئێك، كارت و پاره هه‌ما چ نه .
سمبێل هاتنه تراشین، به‌رچاڤك هاتنه فراندن، سه‌ر هاته چاندن، دۆخین نه‌ما ل شه‌لوالى، پارچه ئەڕد هاتنه تاپۆكرن ..
دگۆتن شرین گه‌له‌كا شرین بوو، لێ من ب خۆ نه‌دیتبوو، شرینێ شرینێ خۆ هه‌بوو، وان ژى ژ دل و ده‌رۆنێ خۆ هزردكر شرین شرینا وانایه، خه‌ون ب دیتنا وێ ڤه دیتن هند داخوازا دیتنا وێ دكر هه‌كه شرینێ ویژدان نه‌با دا وان ب چپلاق به‌رده‌ته كۆلانا.. شرینێ بریار دابوو دیتنا وێ بۆ وان ببیته هێكا دیكلى .
ئێڤارییا رۆژا پێنچشه‌مبى، شرینێ و شرینێ خۆ ل جهێ خۆ یێ تایبه‌ت ل پاركا خه‌ما هه‌ڤرانێ عه‌شقا خۆ دهێرا وان ژى ب رێیا چەتى هزار هیڤى ژ شرینێ كرن خۆ دهاڤێتنە به‌ختێ وێ دچوونه پشت لاندكا دایكا وێ، كو شرینا خۆ د كونا ده‌رزیێ را ببینن .
شرین و شرینێ خۆ رێككەفتن دگه‌ل وان ژڤانه‌ك دانا، ل رۆژا ئه‌ینى ل ده‌مژمێر چارێ ئێڤارى ل وێ كافییا ل به‌ر ده‌رگه‌هێ پاركا خه‌ما، ل وێ ئێڤارێ ژ هه‌ر هه‌موویان ساتێن وان بوونه ده‌مژمێر، ده‌مژمێر بوونه سال كێلنجى ل ده‌مى ددان دا زوى ئه‌و ده‌م بهێت، ده‌م وه‌كى خۆ برێڤه دچیت، وان دڤیا ده‌م وه‌كى وان ب رێڤه بچیت، لێ ده‌مى نه چ هه‌دار هه‌یه نه ژى دل پێڤه‌بوون وه‌كى خۆ د هاژۆت. ده‌م كورێ سه‌رده‌مه های ژ چ تشتان نینه، وى ده‌مى كه‌سێ های ژ ده‌مى نینه ب تنێ وان ئه‌و ده‌م دڤێت ب كێر وان بهێت. وان ژى فام ل هندێ كر كو شه‌ڤ دێ بیته سال تێرا وێ سالێ وان چاڤه‌رێ بوون نینه، وه‌كى هه‌ر شه‌ڤ ل سه‌ر مێزه‌كێ مخه‌ل بوون، پتر ژ هه‌ر شه‌ڤ هه‌ڤركییا ڤه‌خوارنێ كر تیقه‌لیقا وان سه‌ر باخچه‌ى دكه‌ڤیت، كه‌س ب كه‌سێ نه دحه‌سییا ژبلى شرینێ شرینێ وى هه‌ر تشت دزانى جار و بارا دزۆخاندن، یێ ده‌زگره‌ك نه‌بیت ب ده‌زگره‌كێ نائینیت. هه‌ر هه‌مییان هایێ خۆ ژ ده‌ست دا بوونه پێترانكێن شرینێ شرینێ، ئه‌و ژى هه‌ر یێ وانا د زوخینیت قه‌نجویێ سیاسى كه‌ربگرتى بوو ژ بن كۆنترولا خۆ ده‌ركه‌ت .
-كورۆ بیژمۆلته ده‌زگرێن كچ و بیژن و ژنان ناهێنه هژمارێ نوكه هنده‌ك كوركێن دۆده‌كی هه‌نه، به‌ڵا خۆ ژ مه ڤه‌ناكه‌ن، به‌س سوباهى ئه‌ز مێڤانێ كه‌زى زه‌رێ مه، دێ سینگێ وێ كه‌مه پاوانێ لێڤێن خۆ .
كه‌نیێ هه‌مییان باخچه داگیر كر .
هه‌ر ئێكى ب خه‌مل و كاره‌كێ جوداتر به‌رى ژڤان بهێتن قه‌ستا جهێ ژڤانى كر .
قه‌نجۆیێ سیاسى ل ده‌مژمێر سێیێ ئێڤارى ل به‌ر ده‌رگه‌هێ كافییا پاركێ خه‌ما پیاسه‌كا نه‌رم كر هایێ وى دچركاندا ده‌هان پلان دارێژتن، ژ نیشكه‌كێ ڤه توزویێ سۆفى ل به‌ر سینگێ وى تشقلى .
-ها برا تو ڤێرە، ڤێرە و تو .
-قونسۆلێ ئه‌ڤ ده‌وله‌تا جیران دێ هێت، ئه‌ز ژى یێ هاتیمه پێشوازییا وى و ته خێره ؟
-شانده‌كێ ره‌وشه‌نبیرى دێ هێت، ئه‌ز ژى یێ هاتیمه به‌راهییا وان .
د وێ ناڤبه‌رێ دا حه‌جێ كورتێ سلاڤى وان كر، ل دویڤدا سالۆیێ ره‌شۆ و حه‌سۆیێ مستێ ب سه‌ر وان هه‌لبوون، هه‌ر هه‌مى مه‌نده‌هۆش بوون، هه‌ر ئێكی ژ وان به‌هانه‌یه‌ك گرت و هزار ئاواز ژه‌نین، نه دزانى دێ چه‌وا خۆ ژ یێ دى دوور كه‌ت، ژڤانه ژى نه‌شێن خۆ ل ژڤانێ خۆ بێ به‌هركه‌ن، چونكى شرینێ جودا جودا گۆتبوویى (تو ئه‌ڤرۆ ل ژڤانێ ده‌سنیشانكرى ئاماده نه‌بى ئێدى من ژ هزرا خۆ بهاڤێژه).
پشتى شرینێ و شرینێ خۆ دجامێ دا دیتى كو هه‌ر پێنج به‌رى ژڤانێ خۆ ئاماده‌نه و نێزیكى ئێكن، ده‌ستێ خۆ كره دده‌ستێ شرینێ خۆ دا ژ كافیێ ده‌ركه‌تن و هاتنه به‌رامبه‌رى وان، شرینێ مێزه‌كره سه‌روچاڤێن هه‌مییان و گۆتێ: هیڤی دكه‌م مامۆستایێن من ب سلامه‌ت بن .
ژ هینگێ وه‌ره شرینێ بێى خاترخواستن یا چوویە ژده‌رڤه‌ى وه‌لاتى و ل به‌ر نینه ڤه‌گه‌ریت، ئه‌و ژى هه‌ر یێن ل دۆر پاركا خه‌ما دزڤرن و ب شه‌رمزارییا خۆ ژى ناحه‌سن
