د سیاسه‌تا کوردان دا گه‌له‌ک جارا هه‌ڤالینی، به‌رژه‌وه‌ندیێن که‌سایه‌تی و پێوه‌ندیێن ڕۆژانه یێن جڤاکی دکه‌ڤنه پێشییا بیروباوه‌ریان و پرەنسیپان و ڕێ ل پێشداچوونا سیاسەتێ دگره. یەك ژ پرسگرێكێن مه‌زن یێن ته‌ڤگه‌را کوردستانی ئه‌ڤەیە. گه‌له‌ک جارا هنده‌ک كەس ژبەر ھندەك ئەگەران ژ پارتیه‌کێ عاجز دبن، ھەر زوو دێ خوە نێزیكی پارتیا دئژبەر بكن و دێ ھەولدن پەیوەندیان دگەل دەینن و دێ دەست پێ كن هه‌موو بێبەختینا ل پارتیا خوه یا به‌رێ بكن. ھەلبەت ئەو كەس ڤێ یەكێ ژ بۆ به‌ژه‌وه‌ندیێن خوەیێن که‌سایه‌تی دكن.
شاشیەك مەز یا دن یا پەرتیێن سسیاسی ل كوردستانێ ئەوە كو، ده‌ما ژ ئالیه‌ک دژبه‌ر که‌سه‌ک خوه نێزک وان دکه، د جھ دا پێشه‌وازیه‌کا گه‌رم لێ دکن و هه‌تا هنده‌ک بەرپرسیاری و پۆستێن گرنگ ژی پێشکێشێ وان دکن. ئه‌ڤ هه‌لوه‌ستێن دوئالی ڕێ ل که‌سایه‌تێن باش و به‌رهه‌مدار دگره.
ده‌ما ئه‌م ئیرۆ قۆناغا کو ته‌ڤگه‌را کورد تێرا ده‌رباس دبه باش بنرخینن دبینن کو، گه‌له‌ک که‌سایه‌تیێن سیاسی، بێ پیڤان، دکارن ڕۆژانه هه‌لوه‌ستا خوه یا سیاسی بگوھ‌رن. هنده‌ک ڤێ ب زانه‌بوون دکن، پێشیێ جهێ لنگێ خوه خوه‌ش دکن و پشترا گاڤا خوه دھاڤێژن. هنده‌ک ژی ب نه‌زانین ڤێ یه‌کێ دکن و د جھ دا پارتیا خوه دگوهرە و تشتێن کو دوهی دپاراستن ئیرۆ دژاتیا وان دکه.
د هه‌موو جڤاتان ده که‌سایه‌تیێن بێ ئیستقرار و بەرژەوەندیپەرست گه‌له‌کن. به‌رژه‌وه‌ندیا وان ل کوو ده‌رێ بە ئه‌و ل وێ ده‌رێنه. به‌رێ ل گوندان ژی ب ڤی ئاوایی بوو. گه‌له‌ک جارا هنده‌ک مرۆڤان د گونده‌کی دا چ که‌سایه‌تیا وان نه‌بوو. لێ ده‌ما ل گوند دوبه‌ندیه‌ک په‌یدا ببایە، رۆژ ڕۆژا وان بوو. ئه‌و ب قیمه‌ت دبوون و ل سەر وێ دوبه‌ندیێ نانێ خوه دخوارن.
مخابن ئیرۆ د سیاسه‌تا ته‌ڤگه‌را کوردان دا ژی ئه‌ڤ یه‌ک هه‌یه و د ڤێ قۆناغێ دا هێژمارا که‌سایه‌تیێن بەرژەوەندیپەرست گه‌له‌ک زێده بوویه.
هه‌ر تشته‌ک ئوسه‌له‌کا خوه هه‌یه. دبە كو مرۆڤەكی باوه‌ری ب به‌رنامه‌یا پارتیه‌کێ یان ژی ئالیه‌ک سیاسی ئانیبه و وێ سیاسه‌تێ نێزکی خوه ببینه و ل گۆرا وێ ژی ته‌ڤ بگه‌ره. هه‌تا د جڤاتان دا پرۆپاگانده‌یا سیاسه‌تا ژێ باوه‌ر بکه و ل گه‌ل وان ب چالاکی خه‌باتێ ژی بکه. ڕۆژه‌کی دبە كو باوه‌ریێن وی/وێ بێ گوهه‌رتن و خوه نێزکی ئالیه‌ک دن یێ سیاسی بکه. لێ ده‌ما دژتیا سیاسه‌تا خوه و بیروباوه‌ریێن خوه یێن به‌رێ بکه و ڕامانێن جودا کو دژبه‌ریا ڕامانێن خوه یێ به‌رێ ڕا بپارێزه، دڤێ به‌ری هه‌ر تشته‌کی بکاربه بێژه من دوھی من خه‌له‌تی کر ئیرۆ یا ڕاست دبینم و ڤان ڕامانێن نوو دپارێزم. ئانكو دڤێ، پێشیێ، ب دلفره‌هی خوە رەخنە بكە و پاشی ل گۆرا سیاسه‌تا نوو ته‌ڤ بگه‌ره. لێ هه‌ما وه‌ک چووچكەكێ ژ ڤی چقی خوه باڤێژه چقەك دن، ئه‌ڤ یه‌ک نابه و پێدڤیە د جڤاتا سیاسی دا ،ئه‌ڤ که‌سایه‌تیێن بێ ئیستقرار بھێنه دوورخستن. ژ بەر كو مرۆڤێن وسا دێ پارتی و ئالیێن سیاسی ژی بێ قیمەت بكن.
پێدڤیە که‌سایه‌تیه‌ک سیاسی دیتن و باوەریلن خوه ڤه‌کری بێژه. پێدڤیە چاڤێ خوه ل شاشیان نه‌گره و ب دروستی ڕه‌خنه‌یێن خوه بکه. پێدڤیە نه به‌رژه‌وه‌ندیێن که‌سایه‌تی لێ به‌رژه‌وه‌ندیێن گشتی و نه‌ته‌وەییی وه‌ک پیڤان ل بەر چاڤان بگره. ئه‌ڤ یه‌ک دێ ئیستقراره‌ک سیاسی ژی په‌یدا بکه و ناهێله قادا سیاسی ببه جهێ بازدانا که‌سایه‌تیێن بەرژەوەندیپەرست.
گه‌له‌ک جارا مرۆڤ دبینه کو هنده‌ک مرۆڤێن که‌یسپه‌رست چقاس زه‌ره‌رێ ددن پارتیێن خوه و چقاس دبن ئەگەرێ ناکۆکیێن مه‌زن د ناڤا ئالیێن سیاسی ژی دا. بوویه‌رێن ئیرۆ ل كوردستانێ د ناڤبەرا پارتیان ڕووددن ڕاستیا ڤان مرۆڤان ده‌رتێخن هۆلێ، لێ مخابن پرانیا جاران موحاسه‌به ل گه‌ل وان ناھێت کرن.
ژ بۆ سیاسه‌ته‌ک ب ئستقرار و ژ بۆ پاقژیا سیاسی و هه‌روه‌ها ژ بۆ پیڤانێن سیاسه‌تێ بێنه گوهه‌رتن، دڤێ پارتیێن سیاسی ژ مه‌لاقا بھێن پاقژکرن. دێ هینگێ ڕه‌ش و سپی پتر ل گۆرا ڕه‌نگێ خوه بێن خوویاکرن.
2020.01.05
