رۆژا یەکشەمێ، ١٨\٥\٢٠٢٥ێ ل ته‌هرانێ، نێچیرڤان بارزانی، سه‌رۆکێ هه‌رێما کوردستانێ، ب دگەل مه‌سعوود پزشکیان، سه‌رۆکێ کۆمارا ئیسلامی یا ئیرانێ جڤیا.
د جڤینێ دا، هەر دو ئالیان کێفخوه‌شیا خوه ب ئاستا په‌یوه‌ندیێن ناڤبه‌را تەهران و هەولێرێ دیارکرن و بارزانی و پزیشکیان ته‌که‌ز ل سەر زێده‌تر پێشڤه‌برنا هه‌ڤکاریا هه‌ڤبه‌ش، ب تایبه‌تی د وارێن بازرگانی و ئابۆری دا کرن.
سه‌رۆک نێچیرڤان بارزانی پێگیریا هه‌رێما کوردستانێ ب سیاسه‌تا جیرانتیا باش ل سه‌ر بنگه‌ها رێزگرتن و به‌رژه‌وه‌ندیا هه‌ڤبه‌ش دوباره کر، هه‌روها بال کشانده سه‌ر هه‌ڤبه‌شی و په‌یوه‌ندیێن دێرین و که‌ڤنار یێن د ناڤبەرا هه‌رێما کوردستانێ و ئیرانێ دا.
هه‌ر دو ئالیان پێشهاتێن داوین یێن هه‌رێمی نرخاندن و ل سه‌ر گرنگیا پاراستنا ئەلەهییێ و چاره‌سه‌رکرنا ئاشتیانه یا پرسگرێکان هه‌ڤرا بوون.
هه‌ر ل ته‌هرانێ و د هەمان رۆژ دا، نێچیرڤان بارزانی سه‌رۆکێ هه‌رێما کوردستانێ، د جڤینەکێ دا ب عه‌باس ئیراقچی وه‌زیرێ ده‌رڤه یێ کۆمارا ئیسلامی یا ئیرانێ را، په‌یوه‌ندیێن تێکەلییێن ناڤبەرا هەولێر و تەهرانێ و چاوانیا پێشخستنا هه‌ڤکاریێن هه‌ڤبه‌ش د وارێن جوودا دا، گۆتووبێژ کرن.
هه‌ر دو ئالیان په‌سنێ په‌یوه‌ندیێن که‌ڤنار یێن د ناڤبه‌را ئیرانێ و هه‌رێما کوردستانێ دان و ته‌که‌ز ل سه‌ر خوه‌سته‌کا هەر دو ئالیان یا ژ بۆ پێشڤه‌برنا په‌یوه‌ندیان کو ب ئاوایه‌کێ خزمه‌تێ ژ ئارامی و به‌رژه‌وه‌ندیێن هه‌ڤبه‌ش یێن ئیران و ئیراقێ و هه‌رێما کوردستانێ بکن.
د به‌رده‌وامیا سه‌ردانا خوه یا بۆ ته‌هرانێ دا، ئێڤاریا رۆژا یه‌کشه‌مێ ١٨\٥\٢٠٢٥ێ نێچیرڤان بارزانی سه‌رۆکێ هه‌رێما کوردستانێ، دگەل محه‌مه‌د باقر قالیباف، سه‌رۆکێ ئه‌نجوومه‌نا شوورا یا ئیسلامی یا کۆمارا ئیسلامی یا ئیرانێ جڤیا و تەئکید ل سەر پێشڤه‌برنا تێکلیێن ئیرانێ ب ئیراق و هه‌رێما کوردستانێ را کرن.
د ڤی واری ده سه‌رۆک نێچیرڤان بارزانی، سپاسییا پشتگری و ئالیکاریێن کۆمارا ئیسلامی یا ئیرانێ بۆ ئیراق و هه‌رێما کوردستانێ دوباره کر.
هه‌ر دو ئالیان داویترین پێشهات و ڕه‌وشا هه‌رێمێ و ئاسته‌نگیێن وێ نرخاندن و ل سه‌ر پێویستیا هه‌ڤاهه‌نگیا ئالیێن په‌یوه‌ندیدار و ژ بۆ پاراستنا ئارامی و ئه‌وله‌هیێ هه‌ڤرا بوون، هه‌ر وها ته‌که‌ز ل سه‌ر هه‌ڤکاریا به‌رفره یا ل سه‌ر بنگه‌ها به‌رژه‌وه‌ندیێن هه‌ڤبه‌ش کرن
