پشتی پشکاداریا سێ رۆژی (٢٠٢٤/٢/١٦) یا ئەکتیڤ د کۆنفه‌رانسا ئاساییشا میونشنێ ل ئەلمانیایێ دا و رۆژه‌ڤا به‌رفره یا هه‌ڤدیتنێن ب سه‌رکرده و به‌رپرسێن وه‌لاتان و ب شانده‌یێن وان را، رۆژا یه‌کشه‌مێ ٢٠٢٤/٢/١٨ێ، برێز نێچیرڤان بارزانی سه‌رۆکێ هه‌رێما کوردستانێ، دگه‌ل ب داویهاتنا کۆنفه‌ره‌نسێ، سه‌ردانا خوه یا بۆ ئەلمانیایێ ب داوی ئانی.
سه‌رۆک نێچیرڤان بارزانی دگه‌ل سه‌رکرده و به‌رپرسێن پایه‌بلند یێن وه‌لاتان جڤیا و د وان جڤینان دا ره‌وشا ئه‌منی و سیاسی یا ئیراق و هه‌رێما کوردستانێ، ئالۆزیێن ل رۆژهلاتا ناڤین، مه‌ترسی و پرسگرێکێن ل پێشیا ئاساییش و ئارامیا ناڤچه‌یێ و هه‌موو جیهانێ و هه‌روه‌سا ده‌ربارێ پێشخستنا په‌یوه‌ندیان و هه‌ڤکاریێن هه‌ڤبه‌ش د وارێ ئه‌نه‌رژی و ئاساییشا ئه‌نه‌رژیێ و باندۆرێن گوهه‌رتنێن که‌شووهه‌وایێ گۆتووبێژ کرن و نێرینێن هه‌رێما کوردستانێ ل سه‌ر ڤان مژاران پێشکێش کرن.
د رۆژه‌ڤا سێ رۆژان دا، سه‌رۆک نێچیرڤان بارزانی، د چارچۆڤه‌یا کۆنفه‌ره‌نسێ دا، دگه‌ل سه‌کره‌ته‌رێ گشتی یێ نەتەوەیێن یەکگرتی، سه‌رۆکێ ئازه‌ربایجانێ، شاهێ ئوردنێ و هه‌ر یه‌ک ژ سه‌رۆکوه‌زیرێ یونانستان، قه‌ته‌ر، ئه‌رمه‌نستان و ئه‌ستۆنیایێ و دگه‌ل جیگرێ سه‌رۆک و به‌رپرسێ پایه‌بلند یێ کارووبارێن ده‌رڤه و سیاسه‌تا ئاساییشا یەکێتییا ئەورۆپایێ، وه‌زیرێن ده‌رڤه یێن بریتانیا، فرانسا، نەمسا، ترکیێ، کوێت، ڤاتیکان، بحرەین و وه‌زیرێن به‌ره‌ڤانیێ یێن بریتانیا و ئالمانیایێ جڤیا.
هه‌روه‌سا دگه‌ل هژماره‌کا شاند و به‌رپرسێن پایەبلند یێن چه‌ند وه‌لاتێن دن، ژ وانا: شانده‌یا کۆنگره‌سا ئەمریکایێ ل هه‌ر دو جڤاتان، جڤاتا نوونه‌ران و جڤاتا سه‌ناتۆیێ، شێورمه‌ندێ بالا یێ سه‌رۆکێ ئەمریکایێ ژ بۆ کاروبارێن ئه‌نه‌رژی و سه‌رمایه‌رازاندنێ، وه‌زیرێن ده‌وله‌تا ئەلمانیایێ ژ بۆ کارووبارێن به‌ره‌ڤانی، کارووبارێن ده‌رڤه ژ بۆ هه‌ڤکاری و ئابۆری و گه‌شه‌پێدانێ، ئالیکارێ وه‌زیرێ به‌رگریێ یێ ئەمریکایێ ژ بۆ کارووبارێن ئاساییشا ناڤده‌وله‌تی، سه‌رۆکێ تیما سه‌ربخوه یا پێداچوونێن ستراته‌ژیک ب نوونه‌راتیا نه‌ته‌وه‌یێن یه‌کگرتی ل ئیراقێ ، شانده‌ک ژ پەرلامه‌نته‌رێن هه‌ر سێ پارتییێن ئس پی دی، سی دی ئو، سی ئس ئو، یێن ئەلمانیایێ و شێورمه‌ندێن سه‌رۆکۆمارێ فرانسایێ یێن ژ بۆ کارووبارێن دیپلۆماتیک جڤیا
