نڤیسار

پدک چه‌وا ژ بن ڤی بارێ گران ده‌رکه‌ڤه‌

ئه‌نجامێن هلبژارتنا پارلامه‌نتۆیا کوردستانێ ب فه‌رمی هاتن ڕاگه‌هاندن و پارتیا ده‌مۆکراتا کوردستانێ وه‌که‌ پارتیا یه‌که‌م ل سه‌ر ئاستا باشوورێ کوردستانێ ۴۵ کورسی بده‌ست خستن و که‌ته‌ بن باره‌ک گه‌له‌ک گران.

پرس ل ڤر ئه‌ڤه؛‌ پدک دێ چاوا ژ بن ڤی بارێ گه‌له‌ک گران ده‌رکه‌ڤه‌ و بکاربه‌ ڤێ مه‌زناتی و جه‌ماوه‌رێ خوه‌ بپارێزه‌ کو پشتی چار سالێن دن ئه‌گه‌ر زێده‌تر نه‌که‌ هه‌ما بکاربه‌ کورسیێن نها هه‌نه‌ ژ ده‌ست نه‌ده‌ و سه‌نگ، گرانی و قه‌باره‌یا خوه‌ د هلبژارتنێن بێن ده‌، پشتی چار سالێن دن، بپارێزه‌.
ژ بۆنا کو پدک بکاربه‌ پشتی چار سالێن دن ده‌ما دکه‌ڤه‌ هلبژارتنێن پارلامنه‌تۆیا کوردستانێ ده‌ هژمارا کورسیێن خوه‌ کێم نه‌که‌ و به‌رگریێ ژێ بکه‌، دڤێ ڤان کارێن ل ژێر بکه‌:

۱- د پێکانینا حکومه‌تا نوو یا باشوورێ کوردستانێ ده‌، دڤێ پدک ئه‌نجاما هلبژارتنا ل به‌رچاڤان بگره‌ و ب هه‌ر پارتی و ئالیه‌کێ حكومەتێ پێ ڕه‌ ئاڤا بکه‌ دڤێ ل سه‌ر بنگه‌هێ کا هه‌ر پاتی و ئالیه‌کی چه‌ند کورسی ل پارلامه‌نتۆیا کوردستانێ هه‌نه‌، به‌. ب گۆتنه‌ک دن، چێنابه‌ پدک ده‌نگێن جه‌ماوه‌رێ خوه‌ ب هنده‌ک ئالیێن دن بده‌، دڤێ ڕێز و حوورمه‌تێ ژ ده‌نگێ ئەندام و جه‌ماوه‌رێ خوه‌ ڕه‌ بگره‌ و جه‌ماوه‌رێ خوه‌ خه‌یالشکه‌ستی نه‌که‌. ئه‌ڤ ل هه‌موو وه‌لاتێن ده‌مۆکراتیک کو هلبژارتنێ تێ ده‌ تێن کرن وسایه‌.

۲- پشتی ئاڤاکرنا حكومەتێ نه‌زێده‌تر ژ ۳ مه‌هان سیسته‌ما پاشکه‌فتیا معاشان هلوه‌شینه‌، هه‌ر مه‌ھ ب ئاوایه‌کی سیسته‌ماتیک معاشان بده‌ و ڕێیه‌کا چاره‌سه‌ریێ ژی ژ بۆ ئه‌و معاشێن لبا حکومه‌تێ هه‌نه‌ بێ دیتن. نها ل باشوورێ کوردستانێ پرس و مژارا هه‌ری گرنگ و بەربلاڤ ل با خه‌لکێ پرسا ژیانێ یه‌. دڤێ حكومەتا نوو ڤێ کارتێ د ده‌ستێ ئۆپۆزسیۆنێ ده‌ بشه‌وتینه‌. سه‌ر و بنێ گۆتن و ئاخافتنا ئالیێن خوه‌ ب ئۆپزسیۆن حسێب دکن پرسا معاش، پاشکه‌وت و ژین و ژیارا خه‌لکێ باشوورێ کوردستانێ یه كو براستی ژی ئەڤ پرسەك جەوھەری یە، ب هه‌ر ئاوایی به‌ دڤێ حكومەتا نوو ڤێ پرسا گرنگ و سه‌ره‌که‌ چاره‌سه‌ر بکه‌.

۳- هه‌ر چقاس حكومەتا نها دو کۆمپانیێن ناڤدارێن جیهانێ یێن شاره‌زا و پسپۆر د وارێ هووربینیێ ده‌ ئانینه‌ و ل سه‌ر پرۆسه‌سا نه‌فتا باشوورێ کوردستانێ هووربینیێ دکن، لێ دڤێ حكومەتا نوو هێش زێده‌تر شه‌فاف و زه‌لالتر به‌ د وارێ فرۆتن و داهاتێ نه‌فتێ ده‌. ئەڤه‌ ژی کارته‌ک گرنگه‌ دڤێ ژ ده‌ستێ ئۆپۆزسیۆنێ بھێتە دەرخستن. ئانگۆ حکومه‌ت ب ئاوایه‌کی د پرۆسه‌سا نه‌فت و گازێ ده‌ شه‌فاف و زه‌لال به‌ کو ئێدی خه‌لکێ ساده‌ ژی باوه‌ر بکه‌ و بزانه حكومەت چەوا سەرەدەریێ دگەل پرۆسەسا نەفت و گازێ دكە‌.

۴- پشتی ڤان هلبژارتنان ده‌لیڤه‌ک گه‌له‌ک باش، ده‌لیڤه‌ک زێرین د ده‌ستێ پدک دایه‌ کو ل پارلامنه‌تۆیا کوردستانێ چه‌ند یاسایێن په‌یوه‌ندیدار ب ژیانا خه‌لکێ، ب ئاساییش و ب ڕێخستن و یه‌کرنا پێشمه‌رگه‌یێ کوردستانێ ده‌ربکه‌. پدک ل پارلامه‌نتۆیا کوردستانێ پرانیه‌ دەستڤەكریە و دکاره‌ گه‌له‌ک یاسایان ده‌ربخه‌.
یاسایا هه‌ری گرنگ، یاسایا یه‌کرن و ژنووڤه‌ ڕێکخستنا پێشمه‌رگه‌یێ کوردستانێ یه‌. وه‌که‌ ئه‌م دزانن پلانه‌که‌ هێزێن هه‌ڤپه‌یمان ب تایبه‌تی، ئەمه‌ریکا، بریتانیا، فرانسا و ئەلمانیا ژ بۆ پێکانینا هێزه‌که ‌یه‌کگرتی یا پێشمه‌رگه‌یێ کوردستانێ هه‌یه‌ و د ڤی واریدە چه‌ند گاڤ ژی هاتنه‌ ئاڤێتن. ئه‌ڤ داخوازا هه‌موو ئالیێن سیاسی، ڕێخستن و کۆمه‌لیێن نەحکومی و هه‌موو خه‌لک و جه‌ماورێ باشوورێ کوردستنێ و پارچه‌یێن دن یێن کوردستانێ یه‌. فرسه‌ته‌ ژ بۆ پدک ڤێ گاڤێ پاڤێژه‌ و یاسایه‌ک مناسب ل پارلامه‌نتۆیا کوردستانێ ده‌ربکه‌ و پێشمه‌رگه‌یێ کوردستانێ بکه‌ یه‌ک هێز و د بن کۆنترۆلا وه‌زاره‌تا پێشمه‌رگه‌ ده‌ به‌ و چه‌ک و چه‌کدارێن نه‌یاسایی ل سه‌رتاسه‌ری باشوورێ کوردستانێ قه‌ده‌خه‌ بکه‌.
ئه‌ڤ یه‌ک ژ بۆ ئاساییشێ ژی ڕاسته‌.

۵- به‌ری نها سه‌رۆک مه‌سعود بارزانی ژ بۆنا بنبرکرنا گه‌نده‌لیێ پرۆژه‌ک ئاماده‌ کربوو، نها وه‌خته‌ پدک ب جدی ل سه‌ر ڤێ پرسێ ڕاوه‌سته‌ و ده‌ستپاڤێژێ و گاڤان پاڤێژه‌. بێترس، بێ دودلی و بێخاترگرتن، کی به‌ بلا ببه‌، گه‌نده‌لکاران ڕاپێچی مه‌حکه‌مان بکن و ل گۆر یاسایێ ته‌عامل پێ ڕه‌ بێ کرن.

۶- چه‌ند کار و خه‌باتێن دن ژی هه‌نه‌ کو دڤێ حكومەتا نوو ل سه‌ر ڕاوه‌سته‌ و ده‌ست ب جیبجیکرنا وان بکه‌ وه‌که‌؛ ئاڤ و که‌هره‌به‌، قه‌رزێن بچووک، قه‌رزێن ئاڤکرنا خانیان، قه‌رزێن زه‌واجێ و یێن دن. مۆنۆپۆلا بازار نه‌مینه‌، هه‌ر که‌س ئازاد به‌ ، بێی کو به‌رپرسه‌ک مایێ خوه‌ تێ بکه‌ و ببه‌ شریک، ژ خوه‌ ڕه‌ شریکه‌ت، کۆمپانی ڤه‌که‌ و تجاره‌ت و بازرگانیێ بکه‌، ئه‌گه‌ر ئه‌ڤ ببه‌ دێ ده‌رفه‌تێن کاری په‌یدا بن و بێکاری ژی، ب تاتیبه‌تی د ناڤ گێنجان ده‌، ل باشوورێ کوردستنێ کێم ببه‌.

ئه‌گه‌ر پدک ڤان خالێن ل ژۆر د ناڤا چار سالان ده‌ بجی بکه‌ دێ بکاربه‌ د هلبژارتنێن بێ ده‌، پشتی چار سالێن دن، ئه‌گه‌ر ده‌نگێن خوه‌ زێده‌ نه‌که‌ژی، ئه‌ڤ کورسیێن نها هه‌نه‌، ۴۵ کورسیێن خوه‌ بپارێزه‌، ژ بۆ پدک ئه‌ڤ پرسه‌ک چاره‌نڤیس سازه‌.

نصرت حاجی
29.10.2018

Back to top button