ل ترکیێ و باکورێ کوردستانێ هلبژارتنێن پەرله‌مه‌نتۆیا ترکیێ و سه‌رۆککۆماریا ترکیێ د رۆژه‌ڤێ دانه و هەر ژ نها ڤه پارتیێن سیاسی ده‌ست ب پرۆپاگانده‌یان کرنه.
بێ گومان ده‌ما مرۆڤ مژاره‌کی گۆتوبێژ بکه و هه‌روه‌ها دیتنێن خوه بەرچاڤ بکە یا هه‌ری گرینگ ئه‌وه کو، گه‌لۆ مرۆڤ د چ پەنچەرێ را ل مژارێ دنێرە. ژ بۆ گه‌له‌ک کەس و رێکخستنان ره‌وشا ئابۆری پیڤانه، ژ بۆ هنده‌کا ره‌وشا سیاسی و پرسگرێکێن جڤاکی پیڤانه و ژ بۆ هنده‌کان ژی پرسێن سیاسی پیڤانه. ل ڤێ ده‌رێ پرس ئه‌وه کا ئه‌م وه‌ک کورد پێدڤیە چ بکن پیڤان و ڤان هلبژارتنان بنرخینن و ببن خوه‌دی هه‌لوه‌سته‌کی. وه‌ک کورد هێڤیا مه ژ ڤان هلبژارتنان چییه؟
هه‌تا وه‌ک ڤێ گاڤێ، هەر کەس دیتیە و دزانە کو، که‌سێن ل سه‌ر ناڤێ کوردان و ب ده‌نگێن کوردان چوویین پەرله‌مه‌نتۆیا ترکیێ ژ بۆ مافێ نه‌ته‌وی یێ کوردا چو گاڤه‌ک نه‌ئاڤێتنه. بێ گومان ئه‌ڤ نایێ وێ واته‌یێ کو، سبه‌هی که‌سه‌ک ژ بۆ مافێ کوردان نه‌به خوه‌دی هه‌لوه‌ست. لێ ب ڤێ زهنیه‌تا ئیرۆ هه‌یی و ب ڤان پارتیێن سیاسی یێن د قادا سیاسی دا، چو جارا د بن بانێ پەرله‌مه‌تۆیا ترکیێ دا ژ بۆ چاره‌سه‌ریا پرسا کورد نه ممکنه گاڤه‌ک ئه‌رێنی بێ ئاڤێتن.
هەدەپە ژی د ناڤ دا، هەموو ئالیێن ئۆپۆزسیۆنێ، ته‌نێ چووینا ئاکەپێ و ئه‌ردۆگان ژ خوه‌ره کرنه ئارمانج و ژ بۆ ڤێ ئارمانجێ تێنه باهه‌ڤ و تفاقا چێدکن. باشه ئەگەر ئاکەپ و ئه‌ردۆگان ڤێ جارێ وندا کرن و چوون، هوونێ چ بکن؟ گه‌لۆ ژ بۆ پرسا کورد پرۆژه‌یێن وه چنه؟ د راستیێ دا د ره‌وشا ئیرۆ دا پرۆژه‌یێن چو ئالیێن سیاسی ژ بۆ چارەسەریا پرسا کورد نینن. ئه‌گه‌ر هه‌بن بلا هنده‌ک ب خێرا خوه ژ مە را بێژن کا چیه و ئاشکه‌ره بکن.
ئه‌م وه‌ک کورد پێدڤیە د پەنجەرا کوردستانی را ل ڤان هلبژارتنا بنێرن، بنرخینن و ببن خوه‌دی هه‌لوه‌ست. دڤێ ئه‌م دیتن و گۆتنێن پارتیێن هه‌یین د ده‌ربارێ پرسا کورد دا ل بێژنگێ بکن، ل موخلێ بکن و ژ بۆ هه‌لوه‌ستا خوه بکن پیڤان و ل گۆرا وێ ژی ته‌ڤبگه‌رن.
وه‌ک دن هه‌موو خاپاندنه و له‌یزتکێن سیاسییه‌نه کو ل سه‌ر ڤی مله‌تی تێنه کرن.
هه‌تا وه‌ک ڤێ گاڤێ ژی ژ بۆ هلبژارتنان تفاقه‌کا ئالیێن سیاسی یێن کوردستانی نینە. لێ هه‌لوه‌ستا هنده‌ک پارتیان هه‌یه. هەدەپێ ل گۆر خوه ب ناڤێ “تفاقا کوردستانی” تفاقه‌ک چێکریە کو، چو پەیوه‌ندیا وێ ب کوردستانێ را نینە و داخوازێن وان ژ بۆ کوردستانێ و ده‌ستختنا مافێن نه‌ته‌وی نینە. ته‌نێ ناڤێ کوردستانێ بکارانینه. ژ خوه هەدەپێ تفاقا بنگه‌هین دگه‌ل ئالیێن چه‌پێن ترک یا ب ناڤێ “تفاقا که‌د و ئازادیێ” ئاڤا کریه و ئه‌ڤ تفاق ژ بۆ وان کارێ بنگەهینە، ژ به‌ر کو ئه‌ندامێن گه‌له‌ک ژ ڤان پارتیێن چه‌پ د ناڤا هەدەپێ دا بوونه پەرله‌مه‌نته‌ر ژی.
ژ ئالیه‌ک دن ڤه، به‌رپرسێن هەدەپێ دبێژن کو، وان دگه‌ل ئالیێن کورد پەیوه‌ندی کریە و دێ تفاقا هه‌یی به‌رفره‌هتر بکن. د راستیا خوه دا پێدڤیە هێدی ب زه‌لالی ناڤه‌ک ل ڤان تفاقان بێ کرن. ئه‌گه‌ر ئه‌ڤ تفاق ل سه‌ر بده‌ستخستنا چه‌ند پەرله‌مه‌نته‌ران بێ کرن و ئه‌ڤ ببه بازارا هه‌ڤدیتنا ،دێ خرابیه‌ک گەلەک مه‌زن ل ڤی مله‌تی بێ کرن.
پرسگرێکا کوردان نه چووینا ئاکەپێ و هاتنا جەهەپێ یه. یان ژی نه ونداکرنا ڤێ ده‌ستهلاتێ و هاتنا ده‌ستهلاته‌ک دنه. پرسا کوردان پێدڤیە ئه‌و بە کا کی ژ بۆ کوردان خوه‌دی پرۆژه‌کی یه کو کورد بکاربن نه‌فه‌سه‌ک ئازاد بگرن و د واره‌ک ده‌مۆکراتیک دا دۆزا مافێن خوه یێن نه‌ته‌وی بکن.
دارا بیلەک
باکورێ کوردستانێ
