پرسگرێكا ویلایه‌تا مووسلێ یه‌ک ژ به‌رهه‌مێن نڤیسکار، ڕۆژهلاتناس و دیپلۆماتکارێ ڕوسی ڤلادمیر مینۆرسکی یه.
بابه‌تا ڤێ پەرتووکێ ڤه‌کۆلینه‌کا مه‌یدانی، سیاسی، دیرۆکی و نه‌هێنی یا هه‌والگێریێ ئانکو سیخووریێ یه. ئه‌ڤ پەرتووک ب ڕوسی هاتیه نڤیسین و ھەتا نھا بۆ سەر چەند زمانان وەكو ئنگلیزی، فرانسی، عه‌ره‌بی و ترکی هاتە وه‌رگێران.
ئه‌ڤ پەرتووک ژ ئالیێ وه‌لات ته‌وفیق ڤه ژ بۆ سەر زمانێ کوردی هاته وه‌رگێران، پەرتووک ژ ئالیێ وه‌شانێن ناڤه‌ندا ئیسمائیل به‌شکجی یا ڤه‌کۆلینێن مرۆڤاهیێ ل زانینگه‌ها دهۆکێ هاتیه چاپکرن.
د ده‌ربارێ زانیاریێن د ناڤا ڤێ پەرتووکێ دا وه‌رگێر دبێژه: پەرتووک یا گرێدایی شیرۆڤه‌یێن وان ئه‌گه‌ر و ئه‌نجامانن یێن بونه هێڤێنێ سه‌رهلدانا ناکۆکیان ل سه‌ر ویلایه‌تا مووسلێ هه‌م ل سه‌ر ئاستا هه‌رێمی و هه‌م ژی ل سەر ئاستا ناڤده‌وله‌تی. هه‌می ڕێکه‌فتنێن ناڤبه‌را هه‌ڤپه‌یمان – ده‌وله‌تا ئۆسمانی / هه‌ڤپه‌یمان – عیراقا عه‌ره‌بی و شه‌ریف حوسه‌ینێ مه‌ککه‌یی / ترک – ڕوس/ فرانسا – بریتانیا…ھتد. بگره ژ سایکه‌س–پیكۆت، سانره‌مۆ، ئاگربه‌ستا مۆدروس، سێڤه‌ر، لۆزان، ئه‌نقه‌ره، جه‌نێڤ، بروکسه‌ل و چەوانیا کێشانا هێلا بروکسه‌لێ و چەوانیا هێلانا هێلا بروکسه‌لێ ژ هێله‌کا ده‌مکی یا هێلا هه‌تا هه‌تایی یا سینۆرێ د ناڤبه‌را عیراق – ترکیێ دا، کۆمبونێن کۆمه‌له‌یا گه‌لان یێن گرێدایی چاره‌سه‌ریا کێشه‌یا موسلێ و سه‌رژمێریێن ژ ئالیێ ترکیا، بریتانیا و عیراقێ ڤه ل موسل هاتنه کرن، هه‌لوه‌ستێن ئاشوریێن ناستوری و داخوازێن وان د کۆنگره‌یا پاریس دا و ئه‌گه‌رێن دژایه‌تی کرنا وان بو کۆمارا ترکیێ، چەوانیا ب داوی ئانینا ده‌ستهلاتا ترکیێ ل موسلێ و داگیرکرنا وێ ژ ئالیێ بریتانیا ڤه و چەوانیا دامه‌زراندنا عیراقا عه‌ره‌بی و…ھتد. بابه‌تێن ڤێ په‌رتوکێ نه.
