ئه‌ڤه ده‌مه‌ک درێژه ل سه‌ر ره‌وشا باشوورێ کوردستانێ و شه‌رێ ئارتێشا ترک و چه‌کدارێن پەکەکێ تێ گۆتوبێژ کرن. گه‌له‌ک که‌سایه‌تێن سیاسی ڤێ پرسێ ل سه‌ر مه‌دیایا جڤاکی گۆتوبێژ دکن و هه‌رکه‌سه‌ک ل گۆرا خوه، لێ مخابن پرانی ژ راستیێ دوور هنده‌ک نرخاندنا دکن و هه‌ولددن به‌رێ ڕایا گشتی بدن بایه‌کی کو چو به‌رژه‌وه‌ندیا وێ ژ ته‌ڤگه‌را ئازادخوازا کورد را نینە.
گه‌له‌ک ب زانه‌بوون، پرانیا خه‌لکێ کو ڤێ یه‌کێ وه‌ک پرسگرێکه‌کی د ناڤبه‌را دو ئالیان دا گۆتوبێژ دکن. لێ د راستیێ دا پرسگرێک نه ناڤبه‌را دو ئالیان دا یه. یانی پرسگرێک نه ناڤبه‌را پەدەکێ و پەکەکێ دا یه. پرسگرێک ناڤبه‌را پەکەکێ و خه‌لکێ باشوورێ کوردستانێ دا یه، پرسگرێک د پاشه‌رۆژێ دا پتر بێ خوویاکرن د ناڤبه‌را پەکەکێ و حوکومه‌تا ئیراقێ دا یه هه‌تا پرسگرێک ناڤبه‌را پەکەکێ و هه‌ڤالبه‌ندێن وێ ل باشوورێ کوردستانێ دا یه، پرسگرێک ناڤبه‌را پەکەکێ و یەنەکێ دا یه.
ل باشوورێ کوردستانێ ده‌ستهلاته‌ک هه‌یه، حکومه‌ته‌ک و سه‌رۆکاتیا هه‌رێمێ و پەرله‌مه‌نتۆیه‌ک هه‌یه.
پرسگرێک د ناڤبه‌را پەکەکێ و ده‌ستهلاتا کوردستانێ دا یه. ژ به‌ر کو، پەکەکە ده‌ستهلاتا کوردستانێ ناس ناکه و رێزێ ل قانوون و بریارێن حکومه‌تا کوردستانێ را ناگره. پەکەکە هه‌ول دده کو پرسگرێکا هەیە وەک پرسگریکا ناڤبەرا خوه و پەدەکێ دا بده نیشاندان، دا کو سه‌ده‌مه‌کی ژ تێکچوونا خوه را ببینه.
نها ل ڤێ ده‌رێ پرسه‌ک ده‌ردکه‌ڤه هۆلێ:
گه‌لۆ ئه‌و که‌سایه‌ت، ئالیێن سیاسی یان ژی هه‌ر کی به کو، پەدەکێ د ڤێ ده‌ربارێ دا تاوانبار دکن دێ ب جه‌ساره‌ت و وێره‌کی بکاربن به‌رسڤا ڤان پرسان بدن؟
پەیوه‌ندیا پەکەکێ ب ئاوایه‌کی ب ده‌زگه‌هێن ده‌وله‌تا ترک یا کوور را هه‌یه یان نینە؟
پەیوه‌ندیێن پەکەکێ ل گه‌ل حوکومه‌تا ئیراقێ و ملیسێن حه‌شدا شه‌عبی را هه‌یه یان نا؟
پەیوه‌ندیێن پەکەکێ ل گه‌ل رژێما ئیرانێ و ده‌زگه‌هێن وێ یێن ئیستخباراتێ هه‌یه یان نا؟
پەیوه‌ندیێن پەکەکێ ل گه‌ل رژێما سوری هه‌یه یان نا؟
پەکەکە ڕێخستیه‌ک کوردستانیە یان نا؟
پەکەکە دگه‌ل چه‌پێن که‌مالستێن ترک د ناڤ کۆئالسیۆنه‌کی دا یه یان نا؟
ئه‌گه‌ر هه‌ر که‌سه‌ک خوه ب راستی نشتمانپه‌روه‌ر دبینه ب ئاوایه‌ک زه‌لال به‌رسڤا ڤان پرسا بده، دێ راستیا هه‌یی ژی ببینه.
د ڤێ ده‌مێ ده، هه‌ر که‌س دزانه کو، ده‌وله‌تا ترک و پەکەکە گه‌له‌ک ب زانه‌بوون بئارمانجا داگیرکرنا کوردستانێ شه‌رێ خوه یێ قرێژ برنه باشوورێ کوردستانێ. ژ بۆ رێخستنه‌کا کو وه‌ک پەکەکێ ب ده‌ستێ خوه ب گۆتنا ئۆجالان ”۱٥ هه‌زار جوان ” د ناڤ خوه دا تەسفیە کرنە” فه‌داکرنا ب ده‌هان جوانێن کورد ژ بۆ وان نه گرینگه. پەکەکە جوانێن کورد ب ده‌ستێ ئارته‌شا ترک ژ هۆلێ رادکه.
پەکەکە ب هه‌موو هێزا خوه یا مه‌دیایێ، ب هه‌موو دام و ده‌زگه‌هێن خوه شه‌رێ پەدەکێ دکه. رۆژانه مه‌دیایا پەکەکێ ب زمانێ به‌رپرسێن پەکەکێ، پەدەکێ و بارزانیان ب خیانه‌تێ ئتیهام دکن. گه‌له‌ک پرۆپاگانده‌یه‌ک ده‌ره‌و دکن و نووچەیێن شاش به‌لاڤ دکن. باشه پەدەکە ل همبه‌ر ڤێ یه‌کێ چ دکه. ده‌نگ ناکه و پەکەکێ د ڤێ ده‌ربارێ دا موخاتەب ژی ناگره. پەکەکە ژ بلی شه‌رێ مه‌دیاتیک، ل باشوورێ کوردستانێ ده‌ست ب چالاکیێن ته‌رۆرستی دکه. ئێریشێ ده‌زگه‌هان دکه، گه‌له‌ک ده‌ڤه‌ران دشه‌وتینه و ل گۆرا ئاقلێ خوه دێ پەدەکێ ب ڤان کریاران ئالۆز بکه.
ل ڤێ ده‌رێ پرس نه هه‌لوه‌ستا پەکەکێ یه. هه‌لوه‌ستا وان ئا دژبه‌ریا ده‌وله‌تبوونا کوردا ئاشکه‌ره‌یه و ڤه‌کری دبێژن “ئه‌م ڕێ نادن کو ل باشوورێ کوردستانێ ده‌وله‌ته‌کا نه‌ته‌وی یا کوردا بێ ئاڤاکرن”.
گه‌ره‌ک هه‌ر که‌سایه‌ته‌ک نشتمانپه‌روه‌ر ل ڤێ ده‌رێ نقته‌یه‌کی ده‌ینە و راستیا هه‌یی و له‌یزتکا ب ده‌ستێ پەکەکێ تێ له‌یزتن ببینه. هه‌تا وه‌ک ڤێ گاڤێ هنده‌ک ئاقلمه‌ند(!) کو، ب ته‌مامی ژ راستیا کوردستانێ دوورن به‌حسا وێ یه‌کێ دکن کو بلا پەدەکە و پەکەکە ل هه‌ڤ بجن و ل هه‌ڤوه‌رن دا پرسگرێکا هه‌یی چاره‌سه‌ر بکن. ئه‌و مه‌ژیێ کو ئیرۆ د ڤێ پێڤاژۆیێ دا به‌حسا ڤێ دکه، ئه‌گه‌ر پیچه‌کێ درووتس بن، بلا ئه‌ولی به‌حسا هه‌لوه‌ستا دژمناتی یا پەکەکێ بکن، به‌حسا ڕاستیا هه‌یی بکن، پشترا به‌حسا ل هه‌ڤروونشتنا بکن. هه‌روه‌ها هنده‌ک ده‌زگه‌هێن گرێدایی پەکەکێ و دیلێن سیاسه‌تا پەکەکێ ژی وه‌ک کەنەکێ و ده‌م پارتیێ دبێژن: “ئه‌م دخوازن ب پەدەکێ را بجڤن لێ به‌رسڤا مه نادن”. تو رۆژانه که‌سه‌کی ب خیانه‌تێ ئتیهام بکی و سیاسه‌تا پەکەکێ بڕێڤه ببی و ڕۆژانه د مه‌دیایا پەکەکێ دا به‌حسا خیانه‌تا بارزانیان و پەدەکێ بکی ب چ ڕوویی تو دۆزا هه‌ڤدیتنا ل پەدەکێ دکی؟ بچه‌کی خوه ژ دیلیتیا سیاسه‌تا پەکەکێ بدن ئالیه‌کی و ل هەمبه‌ر پەدەکێ بێئه‌خلاقیێ نه‌کن کادێ پەدەکە ل گه‌ل وه بجڤە یان نا؟ نابە هوون ل سه‌ر ڕانێ خه‌له‌کێ ڕونن و تلیا بێخن د چاڤێن وان دا.
گه‌لۆ ل ڕۆژاڤایێ کوردستانێ پەدەکە هه‌بوو کو، ده‌ڤه‌رێن وه‌ک عه‌فرن، سه‌رێکانیێ و گرێ سپی ڕاده‌ستی ئارته‌شا ترک کرن؟ ئه‌ڤ یه‌ک ژ مسیۆنا پەکەکێ یه.
تایبه‌تی هنده‌ک ڕه‌وشه‌نبر و سیاسه‌تمه‌دارێن باکورێ کوردستانێ، ناخوازن خوه نێزکی پرسگرێکا پەکەکێ بکن و ناخوازن پەکەکێ ڕه‌خنه بکن. هه‌تا وه‌ک ڤێ گاڤێ باوه‌ریا هنده‌ک ئالیان هه‌یه کو ل گه‌ل پەکەکێ د هنده‌ک قادان دا هه‌ڤکاریێ ژی بکن.
ئیرۆ ئارمانجا پەکەکێ ئالۆزکرنا پەدەکێ یه. پەدەکە خوه‌دێ نه‌که تێکبچەە، هه‌رێما کوردستانا باشوور تێک دچه، پەدەکە تێکبچە ده‌ستکه‌فتیێن نه‌ته‌وی کوردستانی تێکدچن، پەدەکە تێکبچە خه‌ونا سه‌رخوه‌بوونا کوردستانێ تێکدچه.
جاردن ڕه‌خنه‌کرنا هنده‌ک کێماسیێن پەدەکێ تشته‌که، لێ پشتا خوه بدی سیاسه‌تا پەکەکێ و پەدەکێ ڕه‌خنه بکی دبه تشته‌ک دن. ئه‌گه‌ر سیاسه‌تمه‌دار ڤێ یه‌کێ نه‌بینن دێ بکه‌ڤن کورتاله‌ک خراب و له‌وتی دا کو چو جارا ژێ نه‌یێن پاقژ کرن.
ل قادا ناڤنه‌ته‌وی بنێرن، سه‌رۆکێ هه‌رێما کوردستانێ ل هه‌ر وه‌لاته‌کی وه‌ک سه‌رۆکێ ده‌وله‌ته‌کی تێ پێشوازی کرن، ئالا کوردستانێ ل پایته‌ختێ گه‌له‌ک وه‌لاتان تێ بلندکرن. کورد ژ ڤێ سایێ ژ ئتیهامێن ته‌رۆرێ تێنه شووشتن و دۆزا وان یا ڕه‌وا دکه‌ڤە ڕۆژه‌ڤا جیهانێ دا. هه‌ر جارێ ده‌ما وێنه‌یێ نێچیرڤان بارزانی ل ته‌نشتا سه‌رۆکێ وه‌لاته‌کی ده‌ردکه‌ڤه وه‌ک کورد مرۆڤ پێ سه‌ربلنده. گه‌ره‌ک ئه‌م وه‌ک کورد ڤێ ڕاستیێ ببینن و ل گۆرا وێ ژی ته‌ڤبگه‌رن.
د بنگه‌هێ خوه دا پەکەک شه‌رێ ڤێ مەزنانتی و سه‌ربلندیا کوردان دکه. ڤێجا ئه‌گه‌ر ئه‌ڤ ڕاستی تێگهاندن،گه‌له‌ک زه‌حمه‌تی د تێگهاندنا که‌سایه‌تان یا ڕاستیێ دا هه‌یه.
٢٠٢٤/٨/١
نێرین/شرۆڤه
ن. فرات
