پرۆڤۆکاسیۆنێن پككێ، نرخێن نەتەوەیی و نێچیرڤان بارزانی
پشتی کو ل ناحیا شێلادزێ یا سه‌ر ب قه‌زا ئامێدیێ ڤه خوه‌پێشاندانه‌ک ژ بۆ شه‌رمه‌زارکرنا کوشتنا وه‌لاتیێن سڤیل و داخوازکرن ژ سووپایێ ترکیه و هێزێن پکک، کو ژ ناڤچه‌یێن وان دوورکه‌ڤن و شه‌رێ خوه ببن ده‌رڤه‌یی ناڤچه‌یێن وان و ئێدی خه‌لکێ سڤیل یێ ناڤچه‌یێ نه‌به قوربانی، هاتبوو ڕێکخستن. هه‌ژماره‌ک ژ خوه‌پێشانده‌ران ئاراسته‌یا خوه‌پیشاندانێ گوهه‌رت و چونه سه‌ر بنکه‌یه‌ک سه‌ربازی یا سووپایێ ترکیه و هن ئۆتۆمبێلێن سه‌ربازی شه‌وتاندن.
خه‌لکێ ناڤچه‌یێ ل ده‌ما خوه‌پێشاندانێ داخواز ژ سووپایێ ترکیه و هێزێن پکک کر، ناڤچه‌یێن وان ڤالا بکن و مه‌یدانا شه‌رێ خوه ژ خه‌لکێ سڤیل دوور بکن و ئێدی خه‌لکێ ناڤچه‌یێ نه‌که‌نه قوربانی وان هه‌ڤرکیان.
چه‌ندین سالن خه‌لکێ ناڤچه‌یێن سینۆری یێن ده‌ڤه‌را ئامێدیێ ب سه‌ده‌ما بۆمبه‌بارانا باله‌فرێن شه‌ر یێن ترکیێ و هه‌بوونا پکک ڕاستی ڕه‌وشه‌که خه‌راب بوونه. ئه‌و ژی ب سه‌ده‌ما شه‌هید بوون و برینداربوونا وه‌لاتیێن سڤیل ب سه‌ده‌ما تۆپباران و بۆمبه‌بارانێن ترکیێ و شه‌وتاندنا ڕه‌ز و باخێن وان. هه‌روه‌ها گرتن و ڕه‌ڤاندنا ڕونشتڤانێن گوندێن ناڤچه‌یێ ژ ئالیێ هێزێن پکک و بێ به‌هرکرنا وان، ژ ژیان و داهاتێ ناڤچه‌یێن خوه.” ک۲۴
پککێ ئه‌شکه‌ره بانگا پرۆڤۆکاسیۆنان کر!
پکک د مه‌دیا خوه ده ئه‌شکه‌ره بانگ ل کوردان کر کو پرۆڤۆکاسیۆنا ل هه‌مبه‌ر پارتیا دەمۆكراتا كوردستانێ (پدکێ) و تركیێ پێک بینن. ڕۆژه‌ک ته‌نێ، پشتی ڤان بانگان سێ که‌سێن کو ژ ناسنامه‌یێن وان دیاره و زەلامێن پكکێ نه، ب ئێرشه‌که پلانکری ئالایا کوردستانێ یا ل به‌ر نوونه‌راتیا حكومەتا كوردستانێ یا بروکسه‌لێ ئانین خوار.
https://anfturkce.com/kurdistan/milkp-kurdistan-seladze-serhldan-her-yere-yaylmal-119547
https://rojnews.news/ku/kurdistan/kck-dive-serhldana-seladze-l-hemu-basure-kurdistane-belav-bibe-28453
نه‌زانێن کوردستانی داخستنا ئالایێ وه‌کی بێحورمه‌تییێ نابینن!
ڕایا گشتی یا کوردستانی ل سه‌ر ڤێ بوویه‌رێ، شرۆڤه‌یێن خوه ب دو شکلێن جودا نیشان دان کو گوایە یێن کو ئالایا کوردستانێ ئانین خوار چ بێ ئه‌ده‌بیه‌ک ل هه‌مبه‌ر وێ نه‌کربون و ڤێ وه‌که خوه‌په‌شاندانه‌ک ده‌مۆکراتیک ددیتن. یا بالکێش، ئه‌ڤ که‌س هنده‌ک ناڤێن پۆپووله‌رن, ناسكرینە کو د مه‌دیا جڤاکی ده ۲۴ ساعه‌تان کوردستانیبوونێ دپارێزن و گوایە خوه‌دی ئاقل و ئیزانن.
ل گۆر پیڤانێن حقوقا ناڤنه‌ته‌وی حه‌قێ چ که‌سی نینە کو بێی مووساعه‌ده‌یا به‌رپرسێن ئه‌وله‌هییا وێ جڤاکێ بکاربن ب ناڤێ خوه‌پێشادانان ئێرشێن فیزکی پرۆڤۆکاسیۆنان بکن و وێ ب ناڤێ خوه‌په‌شاندانێن ده‌مۆکراتیک بلێڤ بکن. ڕێ یا خوه‌ستنێن ده‌مۆکراتیک و نه‌رازیبوونان نه ئه‌وه کو تو ئالایا وه‌لاتێ خوه بینی خوارێ.
ئەگەر قه‌ستا وه دژمناهیا پارتیا دەمۆكراتیا كوردستانل (پدک) و مالباتا بارزانی یه، هه‌رن بێی پرۆڤۆکاسیۆنان، ل هه‌مبه‌ر پارلامانا کوردستانێ، ل به‌ر ناڤه‌ندێن پدکێ خوه‌پێشاندانێن خوه یێن ده‌مۆکراتیک بکن!
ب ده‌هان تی ڤی، ڕادیۆ و مالپه‌رێن پکک، گۆران و ینکێ ژ خوه ۲۴ ساعه‌تان هه‌مان تشتان دوه‌شینن و ئه‌ڤ سێ که‌سێن کو ڤێ هه‌لوه‌ستا کرێت یا ئالایا کوردستانێ ئانینه خوار، د وه‌شانێن وان ده ب ده‌هان جاران هاتنه بکارانین. زه‌لاله کو مه‌به‌ستا وان نه ڕاگه‌هاندنا ئاگاهدارییێ یه، نه ژی ده‌مۆکراسی یه و ئه‌شکه‌ره‌یه کو وان خوه‌ستنه ل سه‌ر بانگا پککێ پرۆڤۆکاسیۆنان بکن و رەوشێ بئازرینن.
چ خێر د داخستنا ئالایا کوردستانێ ده نینە!
چ پارتی و ده‌زگه‌ھ دڤێ نه‌کاربه ب بنپێکرنا نرخێن کوردستانیان سییاسه‌تێ بکه.
هێشتا د مه‌ژییێ هندەك ته‌ره‌فان ده مانه‌یا ئالایا کوردستانێ نه زه‌لاله! ئه‌و که‌سێن کو دفکرن کو ئالا داخستن نه بێحورمه‌تی یه هێشتا فێمنه‌کرنه کا داخستنا ژێر یا ئالایا مله‌ته‌کی تێ چ واته‌یێ.
ئالا مالێ شه‌خسان و ڕێخستنان نینه!
ئالا سه‌مبۆلا نه‌ته‌وە و ده‌وله‌تێ یه!
هه‌قێ چ ڕێخستن و پارتی و شه‌خسان نینە کو وێ ئالایێ دایێخه !
به‌لێ، ل کوردستانا باشورکاروبارێن ده‌وله‌تێ نه ل گۆر دلێ مه یه، به‌لێ گه‌له‌ک کێماسی هه‌نه، به‌لێ گه‌نده‌لی، نه‌زانی، ئاماتۆری، ئیسراف و گه‌له‌ک تشتێن نه‌یینی ھەنه کو ل به‌ندا چاره‌سه‌رکرنێ نه. خاینێن ۱۶ ئۆکتۆبه‌رێ ناهێلن حکومه‌ته‌ک چێببه، پارلامانا کوردستانا باشوور بێ ئه‌رکه، خه‌لک پشتی ئێریشێن داعشێ وه‌ستایی یه، برینداره، بێ کاره، خه‌مگینه!
دژمنێن ئازادیا کوردستانێ ل هه‌مبه‌ر ڕه‌فه‌راندوومێ ده ژی خوه‌دیێ هه‌مان هه‌لوه‌ستێ بوون!
هه‌ر چه‌ند، کوردستان ژ ڕۆژێن دژوار و زەحمەت ده‌رباس ببه ژی، کوردستانییێن باشوور ب ئیراده‌یا خوه یا %۹۲،۷۳ ێ تاپویا کوردستانێ کرنه د به‌ریکا خوه دا. ئه‌ڤه ۲۰۰ سالن کو کورد یه‌که‌م جاره ل قادا ناڤنه‌ته‌وه‌یی ده مافێ خوه یێ ئازادییا کوردستانێ ب یه‌کده‌نگی ئیلان دکن.
ڤێ گاڤا پیرۆز د تاریخا جیهانێ ده جهێ خوه گرتی یه و ئێدی ژ ڤێ گاڤێ ڤه‌گه‌ر نینە!
کورد هه‌لوه‌ستا خوه یا ئازادییا کوردستانێ ب ئه‌شکه‌ره رادگەھینە
لێ خێرنه‌خوازێن کوردستانێ، داگیرکه‌رێن وێ و ڕێخستنێن وه‌ک پککێ ب به‌یانێن خوه یێن ئه‌شکه‌ره ل دژی ڤێ ڕه‌فه‌راندومێ ده‌رکه‌تن.
به‌رژه‌وه‌ندییێن پارتییێن وان ل پێشیا ڕوومه‌تا ئازادییا کوردستانێ یه!
ئیرۆژی خه‌ته‌را هه‌ری مه‌زن ئه‌وه کو، حزب و ئیده‌ئۆلۆژییێن وان یێن خورفی بوویه به‌لایا سه‌رێ کوردستانێ و سیاسه‌تێ ژی ختماندی یه و ئه‌ڤ یه‌ک ژ بۆ کوردستانییان بێهێڤیه‌ک مه‌زنه کو ڕێ ل به‌ر هه‌ڤگرتنا پێشڤه‌چونا نه‌ته‌وه‌یی دگرە.
مه‌دیا یا کوردی، ب ده‌ستێ خوه باشور و ده‌ستکه‌فتییێن وێ ل به‌ر چاڤێن باکورییان ڕه‌ش دکه!
ل سه‌ر ناڤێ سیاسه‌تێ د ناڤبه‌را هه‌ر چار پارچه‌یێن کوردستانێ ده ب پرۆپاگاندایه‌که قرێژ و ڕه‌زیلانه و ب مانیپولاسیۆنان دژمنیه‌ک ب زانه‌بوون تێ ئاڤاکرن.
عه‌جێبه‌ک مه‌زن و ژ ئاقلان گه‌له‌ک دووره کو وه‌ک نمونه ڕووداو و دووڤکێن وێ د وه‌شانێن خوه ده ژ بۆ ڤێ دژمناهییێ خه‌باته‌ک ب زانه‌بوون دکن! کوردێن باکوری، ژ ڤان وه‌شانان گه‌له‌ک عاجزن و ئه‌ڤ عاجزی ل کوردستانیان ته‌سیره‌که خراب دکه.
باشوور ب ڤێ سیاسه‌تا شاش یێن وه‌ک وه‌شانێن ڕووداوێ ژ خوه ڕه ل باکور دژمنان چێدکه!
د ده‌زگه‌هێن ڕاگهاندنێ ده تێکلییێن خال و خوارزیتیێ ب ته‌سیرا خوه یا نه‌ینییێ ڕاگهاندنێ ختماندییه.
مه‌دیا کوردی، ژ شووره‌ک نه‌ته‌وه‌یی دووره و ڕۆژ ب ڕۆژ زه‌ره‌ره‌ک مه‌زن دده پاشه‌رۆژا کوردستانێ.
د وه‌شانێن خوه ده، ژ خه‌ینی خزمه‌تا کوردستانێ خزمه‌تا داگیرکه‌رێن خوه دکن.
بالکێشه کو ژێبه‌رماییێن ترت۶ ێ و ده‌زگه‌هێن پککێ ل باشور مه‌دیا یا کوردی باش مانیپووله دکن.
“ره‌فۆرمێن ئینفراستروکتورا ده‌وله‌تێ” کارێ زانیارانه و جددی یه و ژێ ڕه ئاقله‌ک هه‌ڤبه‌ش و ستراته‌ژییێن ده‌مکورت و ده‌مدرێژ پێویستن.
کادرێن باشوور یێن کو سیاسه‌تا باکور دیار دکن، ژ ڕاستییا باکور دوورن و سیاسه‌ته‌که ستابیل نامه‌شینن، سه‌رکێشێن کو پشتگریا وان تێن کرن، ژ خه‌ینی ده‌سئینفۆرماسیۆن و تراڤمایان چ کارێن دن ناکن. ئه‌ڤ کریار ژی یه‌ک ژ مه‌زنترین سه‌به‌بێن لاوازییا هه‌ڤگرتنا باکور و باشووره. سه‌رکێشێن نه‌زان، بێڤیزیۆن و بێوه‌سف ل سه‌ر ناڤێ کوردایه‌تییێ به‌رێ کوردێن باکور ددن شکه‌فتێن گوران.
مالپه‌رێن وه‌زاره‌تێن حكومەتێ بێ فۆنکسییۆنن و ناڤه‌رۆکا وان ڤرت و ڤالا یه!
ل هه‌مبه‌ر چاڤێن جیهانێ وێنه‌یه‌ک ئاماتۆر، بێوه‌سف، کێرنه‌هاتی و ژ ڕاگه‌هاندنێ ژی پڕ دوورن.
ده‌زگه‌ھ کارێ خوه یێ ئه‌سلی پێکناینن، ئینفراستورکتورا حكومەتێ ب ڤی شکلی نامه‌شه و ئیرۆژ مه‌جبووریه‌ته‌که کو ژ بنی ڕه‌فۆرمێن پلانکری بێن گوهه‌رتن. ده‌وله‌ت مه‌جبوره کو پاشه‌رۆژا خوه باش پلان بکه و گاڤێن زه‌راڤ ژی باڤێژه!
ئاخافتنێن سه‌رۆکوه‌زیران و دیپلۆماسییا پراگماتیک
کارێ سه‌رۆکوه‌زیرێ کوردستانێ نه ئه‌وه کو پشتگرییا پرۆڤۆکاسیۆنان بکه! ئه‌و مه‌جبوره کو ل ئه‌وله‌هییا هه‌موه‌لاتییێن خوه بفکره، هه‌ر وه‌ها مه‌جبوره کو ل سه‌ر ژییانا سڤیل یا ڕۆژانه بفکره؛
ئه‌وله‌هی، تجاره‌ت، ته‌ندوورستی، په‌روه‌ده‌هی، تێکلییێن ناڤده‌وله‌تی و ناڤخوه‌یی، پاشه‌رۆژا ۶ ملیۆن ئنسانان ته‌نێ ب ته‌قاندنا کلاشنیکۆفان و شه‌رێ پێشمه‌رگه‌تییێ نامه‌شه. ل گه‌ل ئاقلێ عه‌سکه‌ری ئاقله‌ک دیپلۆماتیک یا ده‌وله‌تێ ژی پێویستیه‌که.
سه‌رۆکوه‌زیر مه‌جبوره دیپلۆماسییێ بکه و په‌ترۆلا وه‌لاتێ خوه بفرۆشه و ژ بۆ ڤێ هه‌لبه‌ت دێ د گۆتنێن خوه دا سیاسه‌ته‌ک پراگماتیک ژی ب کار بینه. ئه‌ز نه ل به‌ندێ مه کو نێچیرڤان بارزانی د جڤینا چاپه‌مه‌نییێ ده به‌س دلێ من خوه‌ش بکه. چ ئه‌جێبییا ڤێ نینە و ڕێ ل به‌ر من ژی ناگره کو ئه‌ز ژ خه‌لکێ شێلادزێ ڕه ژ بۆ شه‌وتاندنا مه‌قه‌رێ داگیرکه‌ران ده‌ستخوه‌شیێ ژی بکم. هه‌لوه‌ستێن دیپلۆماتیک یێن ده‌وله‌تان و هێڤییێن شه‌خسان/پارتیان دوو تشتێن جوودا نه.
لێ ئه‌ڤ نایێ وێ مانه‌یێ کو نه‌یارێن ده‌سکه‌فتییێن باشوور، دێ ب ده‌ستێ ن ر ت و پکک ڤێ بوویه‌رێ ژ بۆ پرۆڤۆکاسیۆنان ب کار بینن. دیرۆکا براکوژیێ هێژا د بیرا مه ده یه و ئه‌م باش زانن کو هه‌که فرسه‌ند بکه‌ڤه ده‌ستێن وان دێ قه‌ده‌را هه‌ولێرێ ژ یا فرۆتنا که‌رکووکێ نه جووداتر به. و هه‌لبه‌ت دیپلۆماسییا پراگماتیک نه ئه‌وه کو نێچرڤان بارزانی ژی وه‌کی هنده‌کان بێژه دێیا من تورکۆمانه و ترک مالخالانێن منن و ئه‌ز دێ د خزمه‌تا ده‌وله‌تا تورکیێ ده بم کا فرسه‌ندێ بدن من کو ئه‌ز به‌رێ کوردان بدم تورکیه‌ییبوونێ.
پکک و نرخێن نه‌ته‌وه‌یی ژ هه‌ڤ دوورن!
بلا سبه جه‌میل بایک ل هه‌مبه‌ر ده‌وله‌تا ئیرانێ و سوریێ دو گۆتنێن ته‌فشۆ مه‌فشۆ بکه کو، ئه‌م ببینن کا سییاسه‌ت چاوانه!
بلا پژاکێ ڕێبکن سه‌ر دو مه‌قه‌رێن پاسدارێن ئیرانێ یان ژی یپگ بلا سبه ئێرشی ڕژێما ئه‌سه‌دی بکه…
خویا یە هشتا ژی سیاسه‌تا خه‌نده‌کان یا کو ژ هه‌زاران کورد ڕه بوو ترب، هشێن وان نه ئانییه سه‌رێ وان و ئه‌و دێ هه‌ر ل دووڤ پرۆڤۆکاسیۆنان ته‌ڤبگه‌رن.
ئه‌رێ ئیرۆژ جهان د سیاسه‌تێ ده دووالی یه، لێ پکک ل گۆر کێفا دلێ خوه ب ڕوسیا، ئیران، سورییێ و یدا یێ ڕه ته‌ڤدگه‌ره، د هه‌مان ده‌مێ ده ژی ب ڕێ یا ئۆجالانی د بن کۆنترۆلا ترکیێ ده سییاسه‌تا تورکیه‌ییبونێ دمه‌شینه و ئه‌ڤ ژێ ڕه عاده‌ته، لێ حكومەتا كوردستانێ ب ڕێیا ترکیێ وه‌کی ده‌وله‌ته‌ک فه‌ده‌ره‌ل ته‌ڤبگه‌ره و تجاره‌تێ بکه قه‌بحه‌ته ؟
یێن کو تێگه‌هێن نه‌ته‌وه‌یی بکارتینن، پێویسته سییاسه‌ت و نرخێن خوه ژی ل گۆر پیڤان و نرخێن نه‌ته‌وه‌ییبوونێ ئاڤا بکن.
ب ته‌ڤلیهه‌ڤکرنا مه‌ژییان، ڤاله‌کرنا ناڤه‌رۆکا تێگه‌هان و مانیپوولاسیۆنان ئه‌نجه‌خ دکارن وه‌ختێ خوه ده‌رباس بکن، ئاسیمیلاسیۆنا ل باکور خورت بکن و ب نرخێن کوردێن باکور یێن نه‌ته‌وه‌په‌ره‌ستییێ بێخن خزمه‌تا چه‌پگرییێ و که‌مالیزمێ ده کو نه سه‌رێ وێ زه‌لاله نه ژی بنێ وێ. ژ ڕۆژا کو سه‌رۆکێ پکک هاتیه گرتن و هه‌تا ئیرۆژ؛ ئه‌و پکک یا کو ئازادییا نه‌ته‌وه‌یا کوردستانێ دپاراست ژ خه‌تا خوه ب ته‌مامی ده‌رکه‌تییه و ژ خه‌ینی داخوازا زمانێ کوردی چ نرخێن کورده‌واری و نه‌ته‌وه‌یی نه‌هشتنه کو بنپێ نه‌کربه دا کو بکاربه ل سه‌ر سییاسه‌تێ بمه‌شینه. ژ خوه هه‌رکه‌س باش پێ دزانە کو کا پکک و ده‌زگه‌هێن وێ ب چ قاسی ئاشق و دلخوازێ زمانێ کوردی نه.
ژ بۆ کو سامیمییه‌تا خوه نیشان بدن دکارن ئالایا کوردستانێ وه‌ک شه‌رتێ یه‌که‌مین قه‌بول بکن. ئالایا کوردستانێ پارچه‌یه‌ک قوماشه و چ نرخێ وێ ژی نینە، ئێ دێ کا وه‌رن پێشی ڤێ تشتا بێ نرخ قه‌بول بکن کو ئه‌م ببینن هوون ل سه‌ر گۆتنا هه‌ڤگرتنێ چقاسی جددی نه ؟
لێ نا هه‌که ده‌ردێن وه تشته‌ک دنه، و هوون دخوازن هه‌می نرخێن کو کوردستانی نه ژ هۆلێ ڕابکن و ل سه‌ر نەھێلانا ناسنامه‌یا کوردایه‌تییێ ئه‌جێبه‌ک ل گۆر دلێ خوه ئاڤابکن کو ته‌نێ ل سه‌ر نرخێن ئیده‌ئۆلۆژییا وه ڤه تێبکۆشه، ئه‌و یا دووری ئاقل و مانتقێ یه و هه‌ر نه ممکنه!
کورد و کوردستان ژ سییاسه‌تا شه‌ر وه‌ستا یه، ئه‌ڤ سییاسه‌تا گه‌مار یا کو ل سه‌ر ڕژاندنا خوینا کوردان تێ مه‌شاندن، مه‌جبوره کو ڕاوه‌سته.
کورد لایقێ ژییانه‌ک سڤیلن، د سه‌دسالا ۲۱ئان ده کورد نه ته‌نێ ل چییایان و گوندان لێ ل مه‌ترۆپۆلان دژین.
هه‌بوونا وان زمانێ کوردی یه، کولتورا وانه، ئالایا وانه، ته‌ڤاهیا نرخێن نه‌ته‌وه‌یا وانه.
مه‌به‌ستا کوردان ژ ئازادیێ نه نیژادپه‌ره‌ستی یه و نه ژی بنده‌ستی یه…
ب کورت و کورمانجی ده‌وله‌ته ده‌وله‌ت !
“کورمانج نه پر د بێ که‌مالن
ئه‌مما یه‌تیم و بێ مه‌جالن،
فیلجمله نه جاهل و نه‌زانن
به‌لکی سه‌فیل و بێ خودانن.”
خانی
ژیندار ئه‌ردال تۆپراک
Stockholm 04-02-2019
[email protected]
@jndrtprk twitter
@ejindar facebook
