ئه‌ڤه ده‌مه‌که گه‌له‌ک ب زانه‌بوون پارتیا كاركەرێن كوردستانێ (پەکەکە) و هه‌ڤالبه‌ندێن وێ ئێریشی سەر پارتیا دەمۆكراتا كوردستانێ (پەدەکە) دکن. ژ مه‌خموور ده‌ستپێکرن، هه‌تا هاتن پرسا زینا وه‌رتێ. مەدیا پەکەکێ گه‌له‌ک ب بێ ئوسوولی ئێریشێ سەر پەدەکێ کرن، تشتێن نه‌راست به‌لاڤ کرن ده‌زئینفارماسیۆنه‌ک به‌رفه‌رەھ د ده‌ربارێ هنده‌ک بوویه‌ران دا راگەهاندن.
پەکەکێ هه‌وله‌ک مه‌زن دا کو د ناڤبه‌را پەدەکێ و یەكێتیا نشتمانیا كوردستانێ (یەنەکە) یێ دا خراب بکه و باشوورێ کوردستانێ به‌ر ب ئالۆزی و شەرەكی ڤه ببه. رۆژانه هه‌لوه‌ستا پەکەکێ هاته گۆتوبێژ کرن، ده‌سته‌یا سه‌رۆکاتیا یەنەکێ د سیاسه‌تا خوه دا نه ب ئیستیقرار حه‌ره‌که‌ت کر. یانی ب ئاوایه‌ک دن پەکەکە و یەنەکە ل دژی پەدەکێ که‌تن د ناڤا ته‌ڤگه‌ره‌کێ دا. تایبه‌تی د ڤێ ده‌ما کو حوکومه‌تا کوردستانێ ل دژی ڤیروسا كۆرۆنایێ پارستنا ته‌ندورستیا هه‌موه‌لاتیان دکه و د ڤێ بابه‌تێ دا د ناڤا له‌پته‌ک مه‌زن دا یه، د ڤێ دەمێ دا ئه‌ڤ هه‌لوه‌ستا یەنەکێ و پەکەکێ گه‌له‌ک بالکێشه.
ژ به‌ری هه‌ر تشته‌کی، وه‌ک سه‌د جارا هاتی گۆتن، جهێ خه‌باتا پەکەکێ نه باشوورێ کوردستانێ یه و ته‌ڤگه‌را پەکەکێ ل باشوور نه یاسایی یه. چ مافەکێ پەکەکێ نینە کو مداخه‌له‌یێ کارێ ناڤخوه‌یێ باشوورێ کوردستانێ بکه.
ژ ئالیه‌ک دن دڤێ هه‌رکه‌سه‌ک تێ بگهه کو، یەنەک نه ئه‌و یەنەک ئا ده‌مێ جه‌لال تەلابانی یه. ده‌سته‌یا بریارا بوویه‌را خیانه‌تێ یا 16ێ ئۆکتۆبه‌رێ دایی ، ئیرۆ سه‌رۆکاتیا یەنەکێ دکه. گه‌لۆ ژ 16ێ ئۆکتۆبه‌رێ هه‌تا نها چ هاتیه گوهه‌رتن؟ خوه‌فرۆشێن وه‌لات چەوا د ناڤبەرا شەڤ و رۆژەكێ دا دبن نشتمانپه‌روه‌ر؟
پێدڤیە باش بھێتە زانین كو ل کوردستانێ حوکومه‌ته‌ک هه‌ڤبه‌ش هه‌یه و یەنەک ژی شریکێ ڤێ حوکومه‌تێ یە. وەسا دیار دبە كو هه‌ماهه‌نگیا د ناڤا پارتیێن کوردستانا باشوور دا پەکەکێ گه‌له‌کی ئاجز دکه و مەیدانا پیلانگێریێن وێ ل هەمبه‌ر ده‌ستکه‌ڤتیێن نه‌ته‌وی ته‌نگ دکه.
ب كورتی هه‌لوه‌ستا پەکەکێ ل هەمبه‌ر پەدەکێ گه‌له‌ک ڤه‌کری تێ زانین، ژ ئالیه‌کی تو دژمناتیا سیه‌سه‌ته‌کێ بکی و ژ ئالیه‌ک دن ڤه تو بھێی به‌حسا “یه‌کێتیه‌ک نه‌ته‌وی“ بکی، ئه‌ڤ دبه خاپاندن و دورووتیه‌ک به‌ر ب چاڤ.
ژ بۆ زه‌لالکرنا ره‌وشا هه‌یی و پرسگرێکێن هاتین چێکرن، رۆژا 2020.04.20 ێ سه‌رۆکێ کوردستانێ نێچیرڤان بارزانی جڤینه‌ک به‌رفره‌ھ د گه‌ل ده‌سته‌یا سه‌رۆکاتیا هه‌رێما کوردستانێ کر و پشت را ده‌رکه‌ت پێشبەری مه‌دیایێ و ئاگاهداریێن به‌رفره‌ھ دان و به‌رسڤا پرسێن رۆژنه‌مه‌ڤان یێن ده‌ربارێ رۆژه‌ڤێ دان.
سه‌رۆک نێچیرڤان بارزانی د ئاخاڤتنا خوه دا به‌حسا ره‌وشا کوردستانێ ب ته‌ڤاهی کر. دو پرسێن گه‌له‌ک گرنگ زەلال كرن. یه‌ک ژێ به‌حسا هه‌ماهه‌نگیا د ناڤبه‌را ئالیێن سیاسیێن کوردستانا باشووردا کر و ئه‌و په‌یام راگەهاند. دویه‌م ژی هه‌لوه‌ستا ده‌ستهلاتداریا کوردستانا باشوور د ده‌ربارێ کریارێن پەکەکێ دا ئاشکه‌ره کر.
نێچیرڤان بارزانی د به‌شه‌ک ئاخاڤتنا خوه دا گۆت كو هنده‌ک ئالۆزی ل زینا وه‌رتێ چێبوونە و خەلكێ كوردستانێ پشتراست كر كو ئەو پرسگرێكەكا وەسا مه‌زن نینه کو نه‌ھێتە چاره‌سه‌ر کرن و ئەو نھا به‌ره‌ڤ چاره‌سه‌ریا وان ئالۆزیان ڤه دچن. بارزانی گۆت كو پێویسته ل سه‌ر هه‌موو هێزێن سیاسیێن هه‌رێمێ ب تایبه‌تی د ڤێ ده‌مێ دا کو کێشه‌یا کۆرۆنایێ و ره‌وشا ئابۆریی ل هه‌رێما کوردستانێ و عیراقێ هه‌یه گرنگه نها یه‌کرێزیا خوه بپارێزن و ب ھەڤ را دگەل یەكێتیێ ھەموو پرسگرێكان چارەسەر بكن. نێچیرڤان بارزانی بەحسا وان هێزان ژی كر کو چوونه زینا وه‌رتێ ئه‌و هێزێن سه‌ر ب وه‌زاره‌تا پێشمه‌رگه‌نه و وه‌زاره‌تا پێشمه‌رگه ژی وه‌زاره‌تا هه‌موو کوردستانێ یه و هیچ هێزه‌کا بیانی نه‌چوویه وێ دەرێ و ژ بۆ ره‌وشه‌کا ده‌مکی چوونه. ئه‌گه‌ر پێویست نه‌بە ئه‌و هێز ل ور بمینن، وێ ده‌مێ ل ور نامینن. گه‌له‌ک نرخاندنێن بالکێش و خه‌ریب و نامۆ ل سه‌ر ڤێ مەسەلێ ھاتن کرن وه‌کی وێ یه‌کێ کو قاشۆ زینا وه‌رتێ جهه‌که کو پرۆژه‌یا ئەتۆمی لێ تێ دروست کرن. یا کو هاتیه کرن ته‌نێ ژ بۆ پاراستنا وه‌لاتیان بویه ل هاتن و چوونێ و ده‌مکیه و رێکارێن هه‌موویان ئاسایی دبن.
به‌رده‌وامیا ئاخاڤتنا خوە دا بەحسا ھەبوونا پەكەكێ ل باشووری كوردستانێ كر و گۆت كو پەكەكە نە ھێزەكا ھەرێما كوردستانێ یە كو مافێ و ھەبە داخویانیا بدە كا ئەو ھێز ل زینا وەرتێ بمینە یان ڤەكشە، پەكەكێ نە ئەو شەرعیەت ھەیە و نە ژی ھەرێما كوردستانێ وێ شەرعیەتێ ب وێ ددە. دڤێ هه‌رێما کوردستانێ چۆل بکه و هه‌رێما کوردستانێ جهێ کارکرنا پەكەكێ نینه. یا كو نھا پەكەك دكە قه‌ت یارمه‌تیدانا هه‌رێما کوردستانێ نینه. به‌ره‌ڤاژی تەڤگەرێن وێ دروستکرنا کێشه‌یایە ژ بۆ هه‌رێما کوردستانێ د ڤی ده‌م و وه‌ختی دا.
سەرۆكێ كورستانێ گۆت كو ھەرێما كوردستانێ دخوازە فاکته‌رێ ئارامیێ بە ل ناڤچه‌یێ و د گه‌ل جیرانێن خوه و ل ناڤخوه ژی.
پشتی ڤان په‌یامێن سه‌رۆکێ کوردستانێ، شوورکێشێن پەکەکێ و که‌مالیستێن نژادپه‌ره‌ست ده‌ستپێکرن ئێریشێ ناڤه‌رۆکا ئاخاڤتنێن نێچیرڤان بارزانی کرن، داخوویانی ده‌رخستن و ره‌خنه کرن. وه‌ک هه‌ر ده‌می ئه‌و ب ئاوایه‌کی ب ترکیێڤه‌گرێدان و ئێریشێ ناڤه‌رۆکا داخوویانیێ کرن.
هه‌ر کورده‌ک دزانە کو، نێچیرڤان بارزانی که‌سایه‌تیه‌ک کوردستانیه ود خەباتا خوە یا سیاسی دا چ جارا به‌رژه‌وه‌ندیێن نه‌ته‌وی نه‌داینه ئالیه‌کی. ژ بۆ وی پرسا نەتەوی پرسا پێشینە. بارزانی راستیا کو رۆژەڤ تێره ده‌رباس دبە دده خوویاکرن. هه‌رکه‌س دزانه کو ئه‌و ئالیێن ئیرۆ هه‌لوه‌ستا نێچیرڤان بارزانێ ره‌خنه دکن، ده‌ما ئالیكاریاا مرۆڤاتی ژ بۆ رۆژاڤایێ کوردستانێ ژی رێ کر ب ئاوایه‌کی دلقو‌رمجی بوون.
ئه‌و ناوه‌ندا عه‌فرن راده‌ستی ترکیێ کری ئیرۆ هه‌مان هه‌ولدانێ دکە کو زینا وه‌رتێ و به‌شه‌ک ژ باشوورێ کوردستانێ ژی راده‌ستی ترکیێ بکە. هه‌ول ددن کو حكومەت و ده‌تهلاتداریا کوردستانا باشوور تێک بدن.
لێ پێدڤیە باش بھێتە زانبن کو، ده‌ما ل هه‌ولێر كۆنگرەیا نەتەویا كوردستانێ (کەنەکە) و پارتیا جڤاكا دەمۆكراتیك (هەدەپە) ناوه‌ندا مه‌زۆپۆتامیا ئۆفیسا ڤه‌دکن، جاردن ب ئزنا حکومه‌تا هه‌رێما کوردستانێ یه. گه‌له‌ک جارا ره‌خنه ل هه‌لوه‌ستا حوکومه‌تێ و تایبه‌تی ل پەدەکێ تێ گرتن کو، گه‌له‌ک رێ و مه‌جالی دده ته‌ڤگه‌را پەکەکێ ل باشوورێ کوردستانێ. ئه‌گه‌ر مرۆڤ ژ سالا 1991ێ هه‌تا ئیرۆ سیاسه‌ت و ته‌ڤگه‌را پەکەکێ ل باشوورێ کوردستانێ باش بنرخینه دێ راستیا پەکەکێ و مسیۆنا وێ ژی ل باشوورێ کوردستانێ باش بێ دیتن. لێ مخابن سیاسیێن چاڤکور ناخوازن ڤێ راستیێ ببینن.
ژ ئالیه‌ک دن هنده‌ک که‌س و ئالی ل کوردستانا باکور، ناخوازن هه‌لوه‌سته‌ک راسته راست نیشاندان بدن. ئه‌و د گه‌ل پەدەکێ و پەکەکێ ژی خوه‌دی به‌رژه‌وه‌ندینه. نیڤا وەریسی دگرن. دوئالی دله‌یزن . ئه‌ڤ جوره‌یێ سیاسه‌تمه‌دار، ره‌وشه‌نبیر و که‌سایه‌تیا ل سه‌ر پاشه‌رۆژا کوردستانێ خه‌ته‌را هه‌ری مه‌زنن.
گه‌له‌ک ڤه‌کری ئاخاڤتنا سه‌رۆکێ کوردستانێ نێچیرڤان بارزانی ژ بۆ هه‌لوه‌ستێن هنده‌ک ئالیان بوویه وه‌ک پیڤانه‌کێ. ئه‌و که‌سایه‌تی و ئالیێن پشتگریا ڤان داخوویانیا بکن ئاشکه‌ره ل سه‌ر خه‌ته‌ک نه‌ته‌وی سیاسه‌تێ دکن و ژ بۆ پاشه‌رۆژا کوردستانه‌ک سه‌ربخوه ل سه‌ر رێیه‌ک راستن. ئالیێن کو نێچیرڤان بارزانی ژ بۆ گۆتنێن وی تاوانبار دکن ته‌نێ خزمه‌تا دژمنێن کوردستانێ دکن.
ل ڤێ ده‌رێ دڤێت مرۆڤ ره‌خنه‌یان و تاوانباریێ ژ هه‌ڤ جودا بکه.
بانگه‌ک ژ بۆ هه‌موو سیاسه‌تمه‌دار، ره‌وشه‌نبیر و که‌سایه‌تێن کورد : بلا د هه‌موو هه‌لوه‌ستان دا به‌رژه‌وه‌ندیێن نه‌ته‌وی پیڤان به. به‌رژه‌وه‌ندیێن نه‌ته‌وی د سه‌ر هەرتشته‌کی را بگرن. ئێریشی ناوه‌ندێن گەرانتیا کوردستانه‌ک سه‌ربخوه نه‌کن و وان بپارێزن. ده‌ما کێماسیه‌ک هه‌بە به‌حس بکن و ره‌خنه‌یێن دۆستانه بگرن. لێ چ جارا نه‌که‌ڤن دووڤ به‌رژه‌وه‌ندیێن که‌سایه‌تی و رۆژانه سیاسه‌تێ نه‌کن. هه‌ر رۆژ نه ب ئاوایه‌کی بن. بلا ئیستقراره‌ک د بیر و باوه‌ریێن وه دا هه‌بە و ل گۆر وێ ژی خوه‌دی هه‌لوه‌ستبن.
دارا بیلەك
2020.04.22
