ل ترکیێ و باکورێ کوردستانێ ڕۆژه‌ڤا سیاسی، دارایی و جڤاکی د ناڤا گۆتوبێژه‌ک به‌رفره‌ه دا یه. گه‌له‌ک جارا مرۆڤ دبینه کو ئاکتۆرێن ڕۆژه‌ڤێ ددن خویا کرن کو د چارچۆڤه‌یه‌ک تایبه‌ت دا به‌حسا هنده‌ک پرسگرێکان دکن. ده‌ستهلات ل گۆرا خوه هنده‌ک گاڤان دئاڤێژه و موخاله‌فه‌ت ژی ڕه‌خنه دکه . لێ هه‌ر ئالی ل گۆرا خوه هنده‌ک پرسگرێکان گۆتوبێژ دکه . لێ کورد ب خوه چەوا ڤان بوویه‌رێن ڕۆژانه دنێرن و گۆتوبێژ دکن گه‌له‌کی گرنگه.
به‌ری هه‌ر تشته‌کی پێدڤیە پیڤانه‌ک ژ بۆ ته‌ڤگه‌را سیاسی یا کوردستانی هه‌به. ئه‌و ژی ئه‌ڤه کو، دڤێ کورد د پەنجەرا کوردستانی ڕا بوویه‌ران بنرخینن و ل گۆرا وێ ببن خوه‌دی هه‌لوه‌ست و پەیوه‌ندیێن خوه ب ئالیێن دن یێن سیاسی ڕا دیزاین بکن.
ژ بلی هەدەپێ چو ئالیه‌ک دن نه د وێ هێزێ دایه کو پرسا کورد بێخه ڕۆژه‌ڤێ و گۆتوبووژ بکه. بەلکی ژی ئه‌ڤ یه‌ک پرسگرێکا هه‌ری مه‌زن و سه‌ره‌که یا ته‌ڤگه‌را کورد ل باکورێ کوردستانێ یە. هەدەپە ب خوه ل باکورێ کوردستانێ پرسا کورد وەکە پرسەک نەتەوەیی نابینە و پرسگرێکا کورد ل سه‌ر خه‌ته‌ک نه‌ته‌وەیی نابینه و چو جارا ب ئاوایەک پێویست پرسا کورد ناخن د د ڕۆژه‌ڤا ترکیێ دا. د پەرله‌مه‌نتۆیێ ترکیێ دا، زدەتر پەیوه‌ندیێن پەکەکێ و هەدەپێ دکه‌ڤن ڕۆژه‌ڤێ و ب ڕۆژان ئه‌ڤ یه‌ک تێ گۆتوبووژ کرن و ئالیێن نژادپه‌ره‌ستێن ترک د ڤێ زاویێ را ئێریشێ کوردان دکن.
د ڤان ده‌مێن داوی دا هه‌ڤسه‌رۆکێن هەدەپێ هنده‌ک ئالیێن سیاسی یێن ترکی دبینن و داخوویانیا به‌لاڤ دکن، لێ چو جارا پرسا کورد ناینن ڕۆژه‌ڤێ و د پەیوه‌ندیێن خوه دا ناکن پیڤانه‌ک. ئه‌گه‌ر هه‌رکه‌سه‌ک باش بالا خوه بده داخوویانیێن هەدەپێ ڤێ یه‌کێ ب زه‌لالی دبینه. ئانکو ب ئاوایه‌ک دن هەدەپە ده‌نگێ کوردان وه‌ردگرە و دچه پەرله‌مه‌نتۆیێ ،لێ وه‌ک کو ئه‌و ب خوه دبێژن، ئەو نه پارتیه‌ک کوردی یه و پارتیه‌ک ترکی یه. د ڤی واری دا چو فەرقا د ناڤبه‌را وان و پارتیێن چه‌پێن ترک نینە. هه‌تا ئیرۆ چه‌پێن ترک د ناڤ هەدەپێ دا بالادەستن، د ناڤا هەدەپێ دا هنده‌ک کورد کو جار-جار به‌حسا پرسگرێکێن کوردان دکن لێ حەو بێ ده‌ستهلاتن و چو باندۆرا وان د ناڤ هەدەپێ دا نینە.
ئه‌گه‌ر هه‌ر کورده‌ک پرۆسه‌سا ڤه‌قه‌تاندنا سه‌رۆکێ شه‌ره‌داریا قه‌رسێ یێ به‌رێ ئایهان بلگه‌ن باش بنرخینه، دێ بکاربه ب ساناهی ڕاستیا هەدەپێ تێبگەهه.
ئیرۆ وه‌ک هه‌ر ده‌می دەرفەتەک ل پێشییا هنده‌ک پارتی و ئالیێن کوردستانی هه‌یه کو دکارن پلاتفۆرمه‌ک کوردستانی نه‌ته‌وەیی ئاڤا بکن و ل گۆرا وێ ژی ته‌ڤبگه‌رن. ئه‌گه‌ر ئه‌ڤ یه‌ک نه‌یێ کرن، دێ جاردن د ده‌ما هلبژارتنان دا هنده‌ک ئالی ژ بۆ ته‌نێ ببن پەرله‌مه‌نته‌ر دێ خوە نێزکی هەدەپێ بکن و دەست ژ هه‌موو نرخێن خوه و سیاسه‌تا نه‌ته‌وەیی به‌ردن.
هەدەپێ د بن باندۆرا خوه دا پلاتفۆرمه‌ک ئاڤا کریه، هه‌رکه‌سه‌ک دزانه کا چ پلاتفۆرمه، ژ بلی هەدەپێ ئالیێن کو سیاسه‌تا پەکەکێ دپه‌ژرینن د ناڤ دا نه و وه‌ک دن، دو سێ ئالیێن دن ل گه‌ل وانه و ئه‌و ب ته‌نێ ناڤ مانه. ژ خوه هەدەپە ژی ل گۆرا وێ ل گه‌ل وان دده و دستینه.
ژ بۆ پاراستنا نرخێن نه‌ته‌وەیی پێوسته پلاتفۆرمه‌ک کوردستانی ل سه‌ر پره‌نسیبێن نه‌ته‌وەیی بێ ئاڤاکرن. ئیرۆ ئه‌ڤ مه‌رج هه‌نه کو ئالیێن ژ ده‌رڤه‌یێ پلاتفۆرما هەدەپێ ئاڤا کری مایین، ڤێ یه‌کێ پێکبینن. ئه‌ڤ یه‌ک دکاره ژ بۆ پاشه‌رۆژێ ببه شانسه‌ک ژ بۆ کو کورد ب یه‌کده‌نگی بکاربن ته‌ڤبگه‌رن و ڕێ ل وان ئالیێن پرسا کورد ژ بۆ به‌رژه‌وه‌ندیێن که‌سایه‌تی ژ خوه ڕا دکن زه‌مینێ سیاسه‌تێ، بگره.
٢٠٢٢.١.١٤
