نوێنه‌را تایبه‌ت یا نه‌ته‌وه‌یێن یه‌کبوویی یا ل ئیراقێ جنین پلاسخارت رۆژا پێنجشه‌مێ ٢ێ سباتا ٢٠٢٣ێ د جڤینا ئه‌نجوومه‌نا ئاسایشا ناڤده‌وله‌تی یا سه‌ر ب نه‌ته‌وه‌یێن یه‌کبوویی دا ئاخڤی و گۆت: “جوداهی و دوبه‌ندیا د ناڤبه‌را ئالیێن سیاسی یێن هه‌رێما کوردستانێ دا به‌رده‌وامن.”
پلاسخارت د ئاخاڤتنا خوه دا بال کشاند سه‌ر بۆمبه‌بارانێن ل دژی سینۆرێن هه‌رێما کوردستانێ و ئیراقێ و گۆت:”سه‌روه‌ریا ئیراقێ هێشتا ژی دهێتە بنپێکرن، بۆمبه‌باران و تۆپباران زێده‌تر دبه ئەگەرێ ته‌ڤلهه‌ڤی، ئالۆزی و مرنا سڤیلان.”
پلاسخارت ئاماژه ب ناکۆکیێن د ناڤبه‌را ئالیێن سیاسی یێن هه‌رێما کوردستانێ ژی کر و ئگۆت: “مخابن، جوداهی و دوبه‌ندیا د ناڤبه‌را پارتیێن سیاسی یێن هه‌رێما کوردستانێ دا به‌رده‌وامن. دڤێ د مژارێن جوربه‌جور یێن دارایی، ئیداری، ئه‌وله‌هی و هلبژارتنێ دا هنده‌ک تەنازەل بێن دایین و د ڤێ مژارێ دا ده‌م ژ ده‌ست نه‌یێ دایین.”
پلاسخارت دا خویاکرن کو جڤینا د ناڤبه‌را پارتیا ده‌مۆکراتا کوردستانێ (پدک) و یه‌کیتیا نیشتمانیا کوردستانێ (ینک) دا هنده‌کی هێڤیەک ژح بۆ خەلکی چێکر، لێ ره‌وش “هێشتا ئالۆزه”.
ل سه‌ر پرسگرێکێن هه‌ولێر-به‌غدایێ ژی دیار کر کو ژ بۆ لهه‌ڤکرنێن کو د ناڤبه‌را ئالیان دا هاتنه کرن، ب تایبه‌تی بوودجه‌یا سالا ٢٠٢٣ ئه‌نجامێن به‌ربچاڤ ده‌رکه‌ڤن، دڤێ دانووستاندنا نێرینان د ناڤبه‌را ئالیان دا به‌رده‌وام بکه.
پلاسخارت ل سه‌ر پرسگرێکێن ئیراقێ ده‌ستنیشان کر کو ئاریشەیێن ئیراقێ دکەڤنن و خوه‌دی دیرۆکه‌کێ یه، چو حکومه‌ته‌ک ب ته‌نا سه‌رێ خوه نکاره ڤان پرسگرێکان چاره‌سه‌ر بکه و ژ بۆ چاره‌سه‌رکرنا ڤان پرسگرێکان پێویستی ب ده‌مێ هه‌یه.
پلاسخارت د ئاخاڤتنا خوه دا هه‌ر وەسا بال کشاند سه‌ر وێ یه‌کێ کو ئه‌و پشتگریێ ددن حکومه‌تا نوو یا ل ئیراقێ هاتیه ئاڤاکرن و گۆت: “دڤێ حکومه‌ت گوهێ خوە بده داخوازێن گه‌ل.”
وێ گۆت: “پێدڤیا ئیراقێ ب چاکسازیێن ئابۆری و دارایی یێن راستەقینە هه‌یه” وها به‌رده‌وام کر، “د ڤان سێ مه‌هێن کو حکومه‌تا نوو ل ئیراقێ ده‌ست ب کار کریه، مه ئیراده‌یه‌که راست دیت ژ بۆ شه‌رێ ل دژی گه‌نده‌لی، چاکسازی، خزمه‌تگوزاری و بێکاریێ.”
پلاسخارت ئاماژه ب وێ یه‌کێ کر کو دڤێ بودجه‌یا سالا ٢٠٢٣ێ ده‌ملده‌ست بێ ئه‌رێکرن و گۆت: “دڤێ یاسایا بودجه‌یا گشتی د ده‌مه‌که کورت دا وه‌ره ده‌رخستن، ئه‌گه‌ر ئەڤ یەک نه‌به دێ ره‌وش خرابتر ببه.”
وێ بانگ ل حکومه‌تا ئیراقێ کر کو ئابۆریێ جهێره‌نگ بکه و گۆت کو دڤێ ئیراق “ته‌نێ خوه نه‌سپێره داهاتیێن په‌ترۆلێ.”
وێ دیار کر کو دڤێ ئیراق ژ بۆ ده‌وامکرنا هه‌ڤدیتنێن که‌رکووکێ بخه‌بته و دڤێ رێکه‌فتنا شنگالێ ژی وه‌ره جبجیکرن.
پلاسخارت دا زانین کو سه‌روه‌ریا ئیراقێ هاتیه بنپێکرن و گۆت: “سه‌روه‌ریا ئیراقێ هێشتا ژی تێ بنپێکرن، بۆمبه‌باران و تۆپباران زێده‌تر دبه ئەگەرێ ته‌ڤلهه‌ڤی، ئالۆزی و مرنا سڤیلان.”
