سیاسی

پلان (بێ) یا ئاڤاكرنا حكومەتا كوردستانێ

سەد رۆژ ب سەر ھلبژارتنا پارلامەنتۆیا كوردستانێ را دەرباس بوون و ھەر چ قاس خەباتێن پێكانینا حكومەتێ، جڤینێن ناڤبەرا ئالیێن سیاسی دا، ب تایبەتی د ناڤبەرا یەكێتیا نشتمانیا كوردستان، تەڤگەرا گۆران و پارتیا دەمۆكراتا كوردستانێ ، بەردەوامن  ژی لێ ھەتا نھا چ رۆناھی ل داویا تۆنێلا تاری دیار ناكە.

 پارتی وەكە سەركەفتیا یەكەم د ھلبژارتنا دا كو خوەدیا 45 كورسیانە، دەست ب دانوستاندنێن پێكانینا حكومەتێ كر و دگەل یەكێتی و تەڤگەرا گوران جڤیا و ل سەر چەند خالان ل ھەڤ كر. ل گور زانیاریێن ل بە دەست ھەنە پارتی و گۆران د وارێ ئاڤاكرنا كابینەیا نوو یا حكومەتا كوردستانێ دا نێزیكی ھەڤن.

ئاستەنگا مەزن ل پێشیا پێكانینا حكومەتێ دیارە یەكێتی یە و ب ھێجەتێن جودا دخوازە پرۆسەسا ئاڤاكرنا حكومەتێ گیرۆ بكە داكو ھندەك شەرتێن خوە ب سەر پارتی دا فەرز بكە.

یەكێتی نكارە د ناڤ خوە دا ل سەر پێكانینا شاندەیا دانوستاندنان ل ھەڤ بكە، ژبۆ ھەر پۆستەكێ یەكێتیێ ب كێماسی سێ بەربژێر ھەنە. ھەر باسكەك یان ھەر گرۆپەك ناڤا یەكێتیێ بەربژێرێ خوە ھەیە. وەكە میناك ژبۆ سەرۆكاتیا پارلامەنتۆیێ ھەر یەك ژ رێواز فایق، بێگەر تالەبانی و قوباد تالەبانی بەربژێرن.  ھەكە جیگرێ سەرۆكێ پارلامەنتۆیێ  ژبۆ یەكێتیێ بە رێواز فایق و بێگەرد تالەبانی بەربێژێرن.  ژ بۆ ھەر وەزارەتەكێ یەكێتیێ سێ بەربژێر ھەنە، ب ڤی ئاوایی دێ چەوا یەكێتی بكاربە لەزێ ل پێكانینا حكومەتێ بكە.

سەرۆك بارزانی ھەول دا دگەل مەكتەباسیاسیا پارتی و یەكێتیێ بجڤە و ئاستەنگ و پرسگرێكێن ھەنە چارەسەر بكە، لێ یەكێتیێ ئەو جڤین پاش خست و نەدیارە دێ كەنگی ژ بۆ جڤینێ ئامادە بن.

بڤی ئاوایی پلانا (ئا) یا پارتی سەرناگرە و دڤێ دەست ب پلانا (بێ) بكە:

پارتی و گوران بجڤن و ل سەر ئاڤاكرنا حكومەتێ ل ھەڤ بكن و ئەو پۆست و وەزارەتێن پشكا یەكێتیێ نە ڤالا بھێلن، بلا حكومەت دەست ب كارێ خوە بكە، خزمەتا خەلكێ كوردستانێ بكە، كەنگی یەكێتی د ناڤ خوە دا سافی بوو و بەربژێرێن خوە دەستنیشان كرن، ھینگێ دكارە بكەڤە ناڤ حكومەتێ و پۆست و وەزارەتێن خوە وەربگرە.

ژبۆ سەرۆكاتیا پارلامەنتۆیێ ژی، كا كیژان پۆست، سەرۆك یان جیگرێ سەرۆكێ پارلامەنتۆیێ پشكا یەكێتیێ یە، بلا ڤالا بمینە و پارلامەنتۆ دەست ب كارێ خوە بكە و كاندیدێ سەرۆكوەزیرتیێ ب پێكانینا حكومەتێ تەكلیف بكە.

خەلكێ كوردستانێ دەنگ دایە و ل بەندا حكومەتەكێ یە كو خزمەتا وان بكە و رەوشا وان یا ئابۆری باشتر بكە. دڤێ ئێدی بەس یاری ب دەنگ و ھەستا خەلكی بێ كرن.

Back to top button