په‌یاما سه‌رۆک نێچیرڤان بارزانی ب هەلکەفتا شۆره‌شا ئیلۆنێ
ب هه‌لکه‌فتا ٦۲ سالیا شۆره‌شا مه‌زن یا ئیلۆنێ، سلاڤ بۆ گیانێ پاکێ رێبه‌رێ شۆره‌شێ، بارزانی یێ نه‌مر و هه‌موو تێکۆشه‌ر و پێشمه‌رگه یێن قه‌هره‌مان کو، جانێ خوه ژ بۆ ئازادیا گه‌ل و وه‌لاتێ خوه دانه و د رێیا ئاسێ و دژوارا شۆره‌شێ دا ئێش و ئازار دیتنه، دبێرین. ئه‌م وان ب رێز و حورمه‌ت ب بیر تینن.
شۆره‌شا مه‌زن یا ئیلۆنێ دایکا شۆره‌شێن کوردستانێ یه کو، ببوو هلگرا نرخێن بلند یێن گه‌لێ بنده‌ست و تینیێ ئازادی و سه‌رفرازیێ. ئه‌و ببوو لهه‌ڤجڤاندن و ناسنامه‌یا نه‌ته‌وه‌یی، نشتمانی و چاندی یا هه‌موو پێکهاته‌یێن گه‌لێ کوردستانێ. بوو هێڤیه‌که مه‌زن، هشیاری و هشمه‌ندیا نه‌ته‌وی و نشتمانی زندی کر. بوو دۆز و داخوازا مافێن ره‌وا یێن گه‌لێله‌کی کو، ب یه‌کرێزی و یه‌کده‌نگیا خوه ژ بۆنا کو بگه‌هه سه‌رکه‌فتن و ئارمانجێن خوه یێن بلند ئاماده بوو هه‌ر قوربانیه‌کێ بده و ره‌واتی و ده‌نگێ خوه ب هه‌موو جیهانێ بگەهینه.
گه‌لێ کوردستانێ د شۆره‌شا مه‌زن یا ئیلۆنێ دا ب باوه‌ری، به‌رخوه‌دان، جانفیدایی، خوین و فه‌داکاریا خوه یه‌ک ژ خوینرێژترین رژێمێن هه‌رێمێ تێک بر و نه‌چار کر کو مافێن گه‌لێ کوردستانێ ناس بکه. ته‌ڤی پیلانێن نه‌یاران ل دژی شۆره‌شێ و شکه‌ستنا وێ ژی، چو جاران مه‌شخه‌له‌یا شۆره‌شێ نه‌هات ڤه‌مراندن و ده‌ستکه‌فتێن شۆره‌شێ بوون بنگه‌ها هه‌موو ده‌ستکه‌فتێن پاشتر و مافێن ده‌ستووری یێن گه‌لێ کوردستانێ.
کا چه‌وا یه‌کیتی و یه‌کرێزی هێز و بنگه‌ها شۆره‌شا ئیلۆنێ بوو، ب ڤێ مناسه‌به‌تێ ژی دا ئه‌م ته‌که‌زیێ ل سه‌ر یه‌کیتی، یه‌کرێزی، هه‌ڤپه‌ژراندن و هه‌ڤکاریا ناڤبه‌را هه‌موو هێز، پارتی و پێکهاته‌یێن گه‌لێ کوردستانێ دا دکن. ئه‌ڤ رێیا ئێکانیه ژ بۆنا ده‌رباسکرنا پرسگرێک، مه‌ترسی، ئالۆزیان و ژ بۆنا پاراستنا فه‌ده‌رالی و ماف و ده‌ستکه‌فتێن ده‌ستووری یێن هه‌رێما کوردستانێ و دابیکرنا نها و پاشه‌رۆژه‌که باشتر ژ بۆ گه‌لێ کوردستانێ.
سلاڤ ل سه‌ر گیانێ پاکێ شه‌هیدێن شۆره‌شێ و هه‌موو شه‌هیدێن رێیا ئازادیێ.
نێچیرڤان بارزانی
سه‌رۆکێ هه‌رێما کوردستانێ
٢٠٢٣/٩/١١
