په‌یاما نێچیرڤان بارزانی ب هه‌لکه‌فتا ۱٦ێ ته‌باخێ
ب هه‌لکه‌فتا ۷۸ئه‌مین سالڤه‌گه‌را دامه‌زراندنا پارتیا ده‌مۆکراتا کوردستانێ (پدک) ئه‌م به‌ژنا خوه ل به‌ر گیانێ پاکێ شه‌هیدێن کوردستانێ دچەمینن و سلاڤێن خوه پێشکێشی مالباتێن سه‌ربلندێن وان دکن. ئه‌م ڕێبه‌رێ گه‌لێ کوردستانێ و دامه‌زرینه‌رێ پەدەکێ نه‌مر بارزانی، هه‌موو ڕێهه‌ڤالێن وی و هه‌موو قه‌هره‌مان و شۆره‌شگه‌رێن کو د ته‌کۆشینا پەدەکێ و ته‌ڤگه‌را ڕزگاریخوازا کوردستانێ دا تێکۆشیانه و فه‌داکاری کرنه ب حورمه‌ت و ب ڕێزداری ب بیر تینن.
ب گه‌رمی پیرۆزباهیێ ل سه‌رۆک مه‌سعود بارزانی، سه‌رکردایه‌تی، هه‌موو ئۆرگان، ئه‌ندام، ئالیگر، جه‌ماوه‌رێ پەدەکێ, پێشمەرگە یێن مێرخاس و ب گشتی گه‌لێ کوردستانێ دکم. د کاروانێ به‌رده‌وامێ خه‌بات و ته‌کۆشینێ دا، ژ پارتیا مه و هه‌موو دلسۆزێن کوردستانێ ڕا سه‌رکه‌فتنێ دخوازم.
ب ڤێ مناسبه‌تا پیرۆز ئه‌م ته‌کیدێ ل سه‌ر نرخ و پره‌نسیپێن نه‌گوهه‌ربار و وان ئارمانجێن نه‌ته‌وی و نشتمانی یێن بلند دکن یێن کو پەدەکێ ژ بۆ وان هاتیه دامه‌زراندن و پێشه‌نگیا ته‌ڤگه‌را ڕزگاریا کوردستانێ کریه. جهێ شانازیه‌ک مه‌زنه کو پەدەکە ژ ده‌ستپێکا دامه‌زراندنا خوه هه‌تا نها پێشه‌نگیا ته‌ڤگه‌را کورداتیێ ژ بۆنا بده‌ستخستنا ئازادی و سه‌ربلندیا کوردستانێ دکه و هه‌تا سه‌رکه‌فتنا داویێ ژی ب باوه‌ری به‌رده‌وام دبه.
ئه‌م ۱٦ێ ته‌باخێ د ده‌مه‌کێ دا ببیر تینن کو، هه‌رێما کوردستانێ، ئیراق و ناڤچه ڕووبروویێ ئاسته‌نگی و پێشهاتێن مه‌زن دبه. پەدەکە کا چاوا د تێکۆشین، شۆره‌ش و ده‌ستکه‌فتیێن گه‌لێ کوردستانێ دا ڕۆل و به‌رپرسیاریا سه‌ره‌که هه‌بوویه، نوها و هه‌رتمی دێ پێشه‌نگیا خورتکرنا براتی، یه‌کرێزی و پاراستنا پێکڤه‌ژیان و قه‌بوولکرن، تۆله‌رانس و مافێن ده‌ستووری یێن گه‌لێ کوردستان بکه و ب هه‌موو هێز و ئیمکانێن خوه د ڤی واری دا ده‌ستپێشخه‌ر و به‌رده‌وام دبه.
پەدەکە هه‌ر تم ب دیرۆکا تێکۆشینا خوه، ب فه‌ده‌کاری و ب ده‌ستکه‌فتیێن خوه سه‌ربلنده و ب باوه‌ری و باوه‌ریا گه‌لێ کوردستانێ ژ بۆ پاشه‌رۆژه‌کا گه‌شتر دخه‌بته. ژ به‌ر ڤێ یه‌کێ، دڤێ هه‌ر تم ب پێشکه‌فتنێن سه‌رده‌مێ ڕا، د هه‌ر واری دا، خوه نووژه‌ن بکه و ئه‌زموونا ڕێڤه‌به‌ریێ، خورتکرنا سازیان و ڕوحێ نه‌ته‌وه‌یی پێش بخه و ل سه‌ر تێکۆشینێ ئسرار بکه هه‌تا ئازادی، سه‌رفه‌رازی و هه‌موو مافێن گه‌لێ کوردستانێ مسۆگه‌ر بکه.
سلاڤ ل سه‌ر گیانێ شه‌هیدان به
۱٦ێ ته‌باخێ پیرۆز به
نێچیرڤان بارزانی
٢٠٢٤/٨/١٦
