ل باکورێ کوردستانێ پرۆسەسا سیاسی د ناڤ تاریێ دایە و گه‌له‌ک ژ ئالیێن سیاسی و سیاسه‌تمه‌دار د ناڤ ڤێ تاریتیێ دا ل رۆناهیه‌کی دگه‌رهن. لێ مخابن سیبەرا ل سه‌ر وان هه‌یە دبه سه‌ده‌مه‌ک بنگه‌هین کو پرانیا وان وێ رۆناهیا پێویست د تاریێ دا نابینن. پرۆبله‌ما مه‌زن یا ته‌ڤگه‌را کورد ل باکورێ کوردستانێ د ڕۆژا مه دا ئه‌ڤه.
ئه‌گه‌ر ئالیه‌ک سیاسی خوه ل سه‌ر خه‌تا نه‌ته‌وی ببینه، خوه وه‌ک ته‌ڤگه‌ره‌ک کورد و کوردستانی ب ناڤ بکه دڤێ ل گۆرا وێ ژی ته‌ڤبگه‌ره. بێ گومان ئه‌ڤ یه‌ک نه ره‌خنه‌یه‌که ژ بۆ هه‌موو ئالیێن کو خوه ل سه‌ر ڤێ رێ و خەتا نەتەوەیی دبینن، لێ ئەڤە ره‌خنه‌یه‌ک مه‌زنه ژ بۆ وان یێن سیسەتا خوه ل سه‌ر خەتا نەتەوەیی ددن ناساندن و ب کاروبارێن دن ڤه مژوول دبن.
ته‌ڤگه‌را پارتیا کارکەرێن کوردستانێ (پەکەکە) و هەدەپە و ڕێخستن و پارتیێن کو ب وێ ڤه گرێدایی و هه‌روه‌ها سه‌رده‌ستیا وان ل باکورێ کوردستانێ ڕاستیه‌که. ئه‌ڤ ته‌ڤگه‌ر چ دکه و چ دخوازه گه‌له‌ک ڤه‌کری تێ دیتن. ئیرۆ د قادا له‌گال دا هەدەپە د ڕۆژه‌ڤێ دا یه. هەدەپە نێزکی % ۱۰ ده‌نگێ کوردا دگره و ل گۆرا ڤێ ژی ئەو ل باکورێ کوردستانێ دبه خوه‌دی هه‌لوه‌ست و باندۆره‌ک تایبه‌ت. لێ هەدەپە گه‌له‌ک ڤه‌کری خوه وه‌ک ته‌ڤگه‌ره‌ک کوردی ب ناڤ ناکه و ئارمانجێن خوه گه‌له‌ک ڤه‌کری دده خوویاکرن. هەدەپە د رێیا خوه دا خوه‌دی پێڤاژۆیەک سیاسیه و چو پەیوه‌ندیا سیاسه‌تا ئەو برێڤه دبه ب خه‌ته‌ک نه‌ته‌وی ڤە نینە و ئارمانجا سه‌ره‌کیا وێ حەلاندنا کوردانە دناڤ ترکیێ دا.
لێ ل ڤێ ده‌رێ پرسگرێک نه هەدەپە و سیاسه‌تا هەدەپێ یه. ئاریشا هه‌ری مه‌زن تێنه‌گهاندنا ڤێ سیاسه‌تێ یه. پارتیه‌ک یان ژی رێخستنه‌ک کو خوه ل سه‌ر خه‌تا نه‌ته‌وی ببینه و ئیدیعا بکه کو سیاسه‌ته‌ک کوردستانی برێڤه دبه، دڤێ پیڤانێن ڤێ سیاسەتێ ژی ب جهبینه.
ل گۆرا مه‌رجێن قۆناغا کو ته‌ڤگه‌را کورد تێره ده‌رباس دبه، ئاوایێ نرخاندنا هەدەپێ پیڤانه‌که. هه‌روه‌ها ئاوایێ پێکانینا تفاقه‌کێ دگه‌ل هەدەپێ جاردن پیڤانه‌که. لێ ئه‌گه‌ر هنده‌ک ئالیێن ژ ده‌رڤه‌یی هەدەپێ خوه هێشتا وەک دیلێ ئیدیۆلۆژیه‌کێ ببینن و ل گۆرا وێ ئیدۆلۆژیێ ته‌ڤبگه‌رن دێ هه‌ر بکه‌ڤن د بن چه‌نگێ هەدەپێ دا و د هلبژارتنان دا ئالایێ هەدەپێ بهه‌ژینن و ژ هه‌موو نرخێن کو خوه ل سه‌ر ددن ناساندن دوور بکه‌ڤن.
ژ ده‌رڤه‌یی هەدەپێ و تفاقا کو د بن سێوانا هەدەپێ دا پێکهاتیه، گه‌له‌ک ئالیێن بن یێن کوردی هه‌نه، لێ مخابن هه‌تا وه‌ک ڤێ گاڤێ نه‌کارینه سێوانه‌ک کوردستانی ڤه‌دن و د بن سێوانێ دا ئالیێن نه‌ته‌وی، کورد و کوردستانی کۆم بکن. به‌لکی ژی لەنگیا هه‌ری مه‌زن یا ته‌ڤگه‌را کورد د ڤێ قۆناغێ دا ئه‌ڤەیه.
به‌ری نها ب ده‌مه‌کی هه‌ر دهات دیتن کو ٥ پارتی و ئالیێن سیاسی ب هه‌ڤرا داخوویانی ڕادگەهاندن و د هنده‌ک بوویه‌ران دا دبوون خوه‌دی هه‌لوه‌ستێن هەڤبەش. لێ مخابن جاردن ئه‌ڤه ده‌مه‌که کو مرۆڤ دبینه دو رێخستنان خوه دانه ئالیه‌کی و سێ رێخستن بتەنێ مەنا و ب هەڤرا ته‌ڤدگه‌رن. بێ گومان سێ رێخستن ژی نەکێمن. لێ ئه‌گه‌ر ئه‌و ل سه‌ر رێیا نه‌ته‌وی ب ئسراربن و هنده‌ک پیڤانا و پره‌نیسپا ژ بۆ ئاڤاکرنا پلاتفۆرمه‌ک کوردستانی ب زه‌لالی ئاشکه‌ره بکن، دکارن گه‌له‌ک گاڤێن هێژا باڤێژن و ببن بنیاتا ئاڤاکرنا مالا کوردی ل سه‌ر پره‌نسیبێن کوردستانی. هه‌روه‌ها تێ زانین کو، ژ بلی ڤان ۳ ئالیان ژی پارتیێن دن یێن کوردی هه‌نه و ئه‌و ژی ل سه‌ر خه‌تا نه‌ته‌وی ب ئیسرارن، هه‌روه‌ها هنده‌ک هه‌ولدانێن وان ژی هه‌نه. پێوسته ئه‌ڤ هه‌موو پارتی و رێخستنن ل سەر خەتا نەتوی نە بگەهن هه‌ڤ و خوه ب هێزتر بکن.
مخابن، پرانیا جارا پرسا ئاڤاکرنا پلاتفۆرمان د ده‌ما هلبژارتنان دا پتر دکه‌ڤه ڕۆژه‌ڤێ. ئه‌ڤ ژی تێ وێ واته‌یێ کو پلاتفۆرمێن هلبژارتنانن تێنه ئاڤاکرن. ده‌ما پرس هلبژارتن به و ئنیەت چوویینا پەرله‌مه‌نتۆیێ و نشته‌جیبوونا ئه‌نقه‌ره بە، ڕه‌وش دگوهه‌ره.
ئیرۆ مه بڤێ نه‌ڤێ بالادەستیا هەدەپێ ل باکورێ کوردستانێ هه‌یه. لێ ئه‌ڤ نه بالادەستیا ته‌ڤگه‌ره‌ک کورد یان ژی کوردستانیه. ئه‌گه‌ر ته‌ڤگه‌را ئازادیخوازا کورد بخوازه پلاتفۆرمه‌ک کوردستانی ئاڤا بکه دڤێ خوه ژ بن بالادەستیا هەدەپێ ده‌رێخه و هنده‌ک پیڤانا د ناڤبه‌را خوه و ڤێ بالادەستیا هه‌یی دا ده‌ینه و ل گۆرا وان پیڤانان ژی ته‌ڤبگه‌ره.
ئالیێن کو هه‌ولددن پلاتفۆرمه‌ک هه‌ڤبه‌ش یا نه‌ته‌وی و کوردستانی پێکبینن و هه‌روه‌ها یێن کو به‌حسا پێوستیه‌ک پلاتفۆرمه‌ک کوردستانی دکن، دڤێ به‌ری هه‌ر تشته‌کی خوه د ڤێ ده‌ربارێ دا زه‌لال بکن و ده‌ستێ خوه ل ده‌ریێ هه‌موو ئالیان بدن و هه‌ولبدن کو، که‌ڤرێن بنیاتێ ده‌ینن و ئه‌و ب خوه ژی ببن رکنێ ڤێ ئاڤاهیێ.
پێدڤیە پلاتفۆرمه‌ک کوردستانی نه‌به جهێ مه‌شروعکرنا هنده‌ک که‌س یان ژی ئالیان. نه‌به جهێ رکبه‌ریا سیاسی و چاره‌سه‌ریا هنده‌ک پرسگرێکێن د ناڤا ڕێخستنان دا.
هه‌ر پێنگاڤا ژ بۆ ئاڤاکرنا پلاتفۆرمه‌ک کوردستانی بێ ئاڤێتن، دێ رۆژ ب رۆژ ته‌ڤگه‌را ئازادیخوازا کوردستانێ ل باکورێ وه‌لاتێ مه پێشڤه ببه و ببه جهێ باوه‌ریا گه‌لێ کوردستانێ و هێڤیێن کو چلمیسین جاردن گه‌ش بکه.
