پێكڤەژيان بەردەوامە
هەرێما كوردستانێ دهێتە هژمارتن نمونەيا بەرچاڤ يا پێكڤەژيانا سەرجەم ئۆل و ئاين و نەتەوەيێن جودا جودا و شيايە هەتا نوكە ب بەردەوامى پارێزگاريێ ل ئەڤى پرەنسيپێ جوان و شارستانى بكە. هەر دەم سەرجەم ئاين و ئۆل و نەتەوە ل هەرێما كوردستانێ ب ئێك هەست و سوز پێكڤە ژياينە و بوينە سیمبولا پێكڤەژيانێ ل سەر ئاستێ وەلاتێ عيراقێ ب گشتى و هەرێما كوردستانێ ب تايبەتى.
پشتى هاتنا رێكخراوا تيرورستى يا ب ناڤێ دەولەتا ئيسلامى ل عيراق و شام (داعش) بو وەلاتێ عيراقێ ل سالا 2014 ێ و پشتى وێ رێكخراوا تيرورستى سەمتا ئێریشێن خوە بەرەڤ وارێن ئاكنجینشينێن كوردێن ئێزدى گوھارتی، كارەساتێن مەزن لدووڤ خوە ڤە هێلان.
ئەڤێ رێكخراوا تيرورستى ب ئالاڤێن درندانە كومەلكوژيێن مەزن ئەنجام دان، ب ھەزاران كەچ و ژنێن كوردێن ئێزدى رەڤاندن و مال و سەروەت و جهێن وان وێران و تالان كرن و ب سەد ھەزاران كەس كۆچبەر بوون. د ئەڤێ كارەسات و جينوسايدا ب سەرێ كوردێن ئێزدى دا هاتى، هەر زوو حكومەتا هەرێما كوردستانێ پێشوازى ل كۆچبەرێن كوردێن ئێزدى كر و ل گشت مال و قوتابخانە و جهێن گشتى پێشوازى لێ هاتەكرن و رێزەكا تايبەت پێ هاتە دان، سەرجەم هاولاتيێن هەرێما كوردستانێ ب هاريكارىكرن و ڤەحەواندنا ل مالێن خوە خزمەتا برايێن خوە يێن ئێزدى كر. د ئەڤێ هێرشا رێكخراوا تيرورستى يا داعش دا كوردێن ئێزدى زيان لێكەفتيێن هەرە مەزن بوونە، رولێ حكومەتا هەرێما كوردستانێ رولەكێ هەرە باش بوويە د خزمەتكرتا هژمارەيا هەرە مەزنا كۆچبەران دگەل دابينكرنا سەرجەم پێدڤێن ژيانێ، زێدەبارى رزگاركرنا هزارەهان كوردێن ئێزدى يێن ل ژێر دەستێ رێكخراوا تيرورستى يا داعش و دووبارە ڤەگەراندن بو باوەشا ئاخا پيروزا هەرێما كوردستانێ.
پشتى مرنا مير تەحسين بەگ، حازم تحسين بەگ وەكە میرێ ئێزدیێن جیھانێ ھات ھلبژارتن. سەروكێ هەرێما كوردستانێ، ب مەرەما پيروزباهیكرنێ ل ميرێ نوو، سەرەدانا مالا ميرى كر و دوپاتيا پشتەڤانيێ بو سەرجەم ئێزديان دياركر.
رولێ رێزدار نێچيرڤان بارزانى، هەر ژ دەما ئەو سەرۆكوەزير بوو و هەتا نوكە وەك سەرۆكێ هەرێما كوردستانێ د پاراستنا مافێن سەرجەم ئۆل و ئاين و نەتەوەيێن جودا جودا ل سەر ئاستێ هەرێما كوردستانێ رولەكێ ئێكجار مەزن گێرايە و دگێرە.
ئاشتى فەتحى بێسفكى
2019.08.05
