ده‌سته‌یا سه‌رۆکایه‌تیا ئه‌نجوومه‌نا نشتمانیا کورد ل سووریێ (ئه‌نەکەسە) ب فه‌رماندارێ گشتی یێ هێزێن سووریا ده‌مۆکراتیک (هەسەدە) مەزلووم کۆبانی ڕا جڤیا.
ل گۆر ئاگاهیێن ڕووداوێ، ڕۆژا یه‌کشه‌مێ شانده‌کا کۆنسه‌یا
سه‌رۆکاتیا ئه‌نەکەسێ ل ڕۆژاڤایێ کوردستانێ ب فه‌رماندارێ گشتی یێ هەسەدێ، گه‌نه‌رال
مەزلووم کۆبانی ڕا هه‌ڤدیتن پێک ئانیه.
ئه‌ندامێ ده‌سته‌یا سه‌رۆکایه‌تیا ئه‌نەکەسێ، تاهر هه‌ساف، ژ ڕووداوێ ڕا ڕاگەهاند کو جڤینا وان ب مەزلووم کۆبانی ڕا ئه‌رێنی بوویه و تێ دا ل سه‌ر خەباتێن نێزیککرن و لهه‌ڤکرنا ئالیێن سیاسی یێن ڕۆژاڤایێ کوردستانێ ئاخڤینه.
هه‌ساف ژ ڕووداوێ ڕا گۆت کو سه‌رۆکایه‌تیا ئه‌نەکەسێ تێبینیێن خوه پێشکەێشی مەزلووم کۆبانی کرن ژ بۆ کو پەیەدە، ڕێڤه‌به‌ریا خوه‌سه‌ر و ئه‌نەکەسە لهه‌ڤ بکن.
به‌ری چه‌ند ڕۆژان ژی سه‌رۆکێ هه‌رێما کوردستانێ نێچیرڤان بارزانی گۆتبوو کو ژ به‌ر ڕه‌وشا نها یا ڕۆژاڤایێ کوردستانێ، ئه‌و ب به‌رده‌وامی د گه‌ل گه‌نه‌رال مه‌زلووم کۆبانی د پێونه‌دیێ دا یه و چه‌ند جاران ب هه‌ڤ ڕا جڤیانه و ژ پەیەدێ و ئه‌نەکەسێ خوه‌ستبوو کو لهه‌ڤ بکن.
سه‌رۆکوه‌زیرێ کوردستانێ مه‌سوور بارزانی د سه‌ردانا خوه یا بۆ کامپا به‌رده‌ره‌ش یا کۆچبه‌رێن ڕۆژاڤایێ کوردستانێ سۆز دابوو کۆچبه‌رێن ڕۆژاڤایێ کوردستانێ کو ئه‌و دێ هه‌ول بدن چاره‌سه‌ره‌کا سیاسی بۆ ڕۆژاڤایێ کوردستانێ ببینن.
هه‌تا نها ت هوورگلیێن زێده‌تر ده‌ربارێ جڤینا ناڤبه‌را شاندا پله‌بلند یا ئه‌نەکەسێ و فه‌رماندارێ گشتی یێ هەسەدێ دا نه‌هاتیه زانین.
تێکلداری ڤێ هه‌ڤدیتنێ، نه هەسەدێ و نه ژی مەزلووم کۆبانی چ داخویانی یان زه‌لالکرنه‌ک نه‌دانه.
