ل ترکیێ و باکورێ کوردستانێ به‌حسا پێڤاژۆیه‌ک نوو یا چاره‌سه‌ریێ تێ کرن. د ڤێ ده‌ربارێ ده گاڤا هه‌ری ڕادیکال سه‌رۆکێ مەهەپێ ده‌ڤله‌ت باخچه‌لی ئاڤێت. باخچه‌لی ب ناڤێ تفاقا جومهور داخوویانیه‌ک دا و ئه‌ردۆگان ژی ب هه‌موو ئاوایی پشگریا خوه د ڤێ ده‌ربارێ دا نیشان دا.
باخچه‌لی گۆت: بلا ئۆجەلان وه‌رە پارله‌مه‌نتۆیێ و د گوروپا ده‌م پارتییێ دا داخوویانیه‌کی بده و ده‌ستژبەردانا چه‌کان و هلوەشاندنا پەکەکێ ڕاگەهینه. د ڤێ ده‌ربارێ دا گه‌له‌ک نرخاندنێن جودا هاتن کرن. ژ خوه پشتی ڤێ داخوویانیێ قه‌ندیل ب ئێریشا ئنتحاری یا ئه‌نقه‌ره‌یێ به‌رسڤا داخوویانیا باخچه‌لی دا. لێ نها ژی، دێ جاردن ل سه‌ر داخوازیا باخچه‌لی هه‌ڤسه‌رۆکێن ده‌م پارتییێ بچن ئیمرالی و ل گه‌ل ئۆجەلان هه‌ڤدیتنێ بکن.
ده‌زگه‌هێن ده‌وله‌تێ ئه‌ڤه ده‌مه‌که ل گه‌ل ئۆجەلان هه‌ڤدیتنا دکن. ده‌وله‌ت دخوازه گرێدانا ناڤا ده‌م پارتییێ و پەکەکێ دا قوت بکه و هه‌ولدده کو ده‌مپارتی ل گه‌ل ئۆجەلان ته‌ڤبگه‌ره. ژ دامەزراندنا قایوومان بگرن هه‌تا ئێریشێن توند یێن ترکیێ ل باشوور و ڕۆژاڤایێ کوردستانێ ل دژی چه‌کدارێن پەكەكێ د چارچۆڤەیا هه‌ڤدیتنێن ب ئۆجەلان را یه.
سه‌ده‌مێ ڤێ هه‌لوه‌ستا ترکیێ ژ ئالیێ ئه‌ردۆگان ڤه ب ڤه‌کری هاته دیارکرن. ئه‌ردۆگان داخوویاکرن کو، ل هه‌رێمێ گوهه‌رتنێن مه‌زن ڕووددن، ئیسرائیل دکاره ئێریشێ ترکیێ ژی بکه. ژ بۆ ڤێ یه‌کێ دڤێ ئه‌م پرسگرێکێن د ناڤا خوه دا ژ هۆلێ ڕاکن و ئه‌نیه‌ک ناڤخوه‌یی ب هێز ئاڤابکن داکو، ئه‌م بکاربن ل هەمبه‌ر ئێریشێن ده‌رڤه یه‌کتیا خاکا خوه بپارێزن.
پشتی ڕوودانێن ترکیێ و گۆتوبێژن ژ بۆ ده‌ستژێبه‌ردان و ته‌سڤیه‌کرنا پەكەكێ تێنه کرن، د جارکێ دا ب ئێریشا هێز و گوروبێن ئۆپۆزسیۆنا سوری ل دژی رژێما ئه‌سەد ڕۆژه‌ڤ هاته گوهه‌رتن. لێ د ڕاستیێ دا دخوه‌یێ هه‌ردو پێشکه‌ڤتن ب هه‌ڤرا گرێداینه. ئه‌ڤه ده‌مه‌ک بوو ترکیێ داخوازا ل هه‌ڤهاتنه‌کێ ل گه‌ل ئه‌سەد دكر، د ئاستا وه‌زاره‌تێن به‌رگری و ده‌زگه‌هێن ئیستخباراتان دا ترکیه و سوریه د ناڤا هه‌ڤدیتنا دا بوون. لێ ئه‌سەد هه‌ڤدیتن ل گه‌ل ئه‌ردۆگان قه‌بول نه‌کر و مه‌رجێ کو ترکیێ ژ ئاخا سوریێ ڤه‌کشه ددا پێشیا ئه‌ردۆگان. ڕوسیا ژی پشتگریا ڤێ هه‌لوه‌ستا ئه‌سەد دکر.
لێ نها ل ئدلبێ و حه‌له‌بێ ئێریشا ژ نشکاڤه هاتی کرن، دخوه‌یێ ب پشتگریا ترکیێ یه. تایبه‌تی پشتی ئیسرائیل ل لبنانێ حزبولا تێکبر و ل سوریێ ژی گه‌له‌ک جارا ئێریش برن سه‌ر بنگه‌هێن له‌شکه‌ری یێن ملیسێن ئیرانێ، ته‌ڤگه‌را کو ب وه‌کاله‌تا ئیرانێ پشتگریا ئه‌سەد دکران گه‌له‌ک زه‌عیف بوون. ئیسرائیلێ پشتیگرێن رژێما سوریێ هزبولا و ملیسێن ئیرانێ ب ئاوایه‌کی ژ هۆلێ ڕاکرن. موخالفه‌تا سوریێ ب پشتگریا ترکیێ ئه‌ڤ یه‌ک وه‌ک فره‌سه‌نده‌کێ زانین و ئێریشا خوه ده‌ستپێکرن. ل ڤێ ده‌رێ ئیران ئاشکه‌را ترکیێ تاوانبار دکه. هه‌تا وه‌ک نها ترکیێ د ده‌ربارێ داخوویانیێن ئیرانێ دا چو به‌رسڤ نه‌دایه و پلان. و به‌رنامەیا خوه بێده‌نگی ب ناڤێ پاراستنا سنۆرێن خوه ڕێڤه دبه.
نها هێزێن موخالفه‌تێ که‌تن ناڤا باژارێ حه‌له‌بێ دا. ئه‌ڤ یه‌ک دبه سه‌ده‌م کو هێزا پەكەكێ ل تل ڕفه‌تێ تێ دۆرپێچکرن و ل تاخێن حه‌له‌بێ ژی ڕه‌وشا هێزێن پەكەكێ دکاره بێ گوهه‌رتن. ئارمانجا ترکیێ یا سه‌ره‌که ژی ئه‌وه کو، ل گۆرا پێڤەژۆیا کو ڕێڤه دبه، پەكەكێ ب ئاوایه‌کی مه‌جبور بکه ده‌ست ژ چه‌کان به‌رده. ترکیێ دزانه کو، ب داخوازیا ئۆجەلان پەكەكە دەست ژ چه‌کان به‌رناده.
ب ڤێ ئێریشا هتش و گوروبێن ئۆپۆزسیۆنا سوریێ ل دژی رژێما ئه‌سەد ته‌وس‌زن ل سوریێ تێ گوهه‌رتن و ڕۆلێ ترکیێ د ڤێ مژارێ دا خۆرتر دبه. دێ ڕۆژێن ل پێشیا مه ڤێ مژارێ زه‌لالتر بکه…
٢٠٢٤/١١/٣٠
نێرین/شرۆڤه
