پشتی بانگا سه‌رۆکێ مەهەپێ ده‌ڤله‌ت باخچه‌لی د ده‌ربارێ پێڤاژۆیا نوو دا، ل ترکیێ و باکورێ کوردستانێ ڕۆژه‌ڤا سیاسی هاته گوهه‌رتن. هه‌تا ڤێ یه‌کێ باندۆرا خوه ڕاسته ڕاست ل باشوورێ کوردستانێ و ڕۆژاڤایێ کوردستانێ ژی کر. لێ هێشتا نه قه‌ندیل و نه ژی ده‌م پارتییێ ب زه‌لالی نزانن دێ چ بکن. ئه‌ڤ یه‌ک ژی دبه ئەگەرێ گه‌له‌ک گۆتوبێژ و نرخاندنێن جودا.
بانگا باخچه‌لی گه‌له‌کی زه‌لاله، دبێژه: بلا پەکەکە دەست ژ چه‌کان به‌رده و خوه هلوەشینە. ئه‌ردۆگان ب هه‌موو ئاوایی پشگریا بانگا باخچه‌لی دکه. ئه‌ڤ بانگ پرۆژه‌یه‌کا ده‌وله‌تا ترکیێ یه. ئه‌ردۆگان د داخوویانیێن خوه دا ڤه‌کری دبێژه کو، ئه‌و ترکیه‌ک یا بێ ته‌رۆر دخوازن.
سه‌رۆکێ پەکەکێ ئۆجەلان ژی به‌رسڤا بانگا باخچه‌لی دا و ئه‌و داخوازیا باخچه‌لی پێکانی و بانگ ل پەکەکێ کر. ئۆجەلان دە بانگا خوه دا ڤه‌کری ژ پکەکێ را دبێژه: دەست ژ چه‌کان به‌ردن، ڕۆژه‌ک زووتر کۆنگره‌یا خوه بکن و بریارا هلوەشاندنا پەکەکێ بدن، د خالا سێیه‌م دا ئۆجەلان دبێژه کو، هێدی به‌حسا سه‌رخوه‌بوون، فه‌ده‌راسیۆن، ئۆتۆنۆمی و خوه‌سه‌ری و چو ستاتوویه‌کی نه‌کن، سیاسه‌تا ده‌مۆکراتیک بکن. بێ گومان ئه‌ڤ خال گه‌له‌کی گرنگه و پێدڤیە چو که‌س چو واتەیەن جودا نه‌دن ڤێ خالێ. یانی ئۆجەلان گەلەک ب زەلالی و ڤه‌کری داخوازا تشته‌ک نه‌ته‌وی ناکە.
هه‌ر تشت ب زه‌لالی به‌ر چاڤایه. لێ پەکەکە و گه‌له‌ک ئالیێن د ناڤا پەکەکێ دا، ئەگەر ن ب دلێ وان بە ژی، بانگا ئۆجەلان ب ئه‌رێنی دنرخینن و ددن خوویاکرن کو، دێ گوه بدن داخوازیا ئۆجەلان. لێ قه‌ندیل دبێژه کو، دڤێ مه‌رجێن پێکانینا کۆنگره‌یه‌کی پێکوه‌رن، بلا ده‌وله‌ت ژ دەست ژ ئۆپه‌راسیۆنا به‌ردە کو، دا ئه‌و بکاربن د رەوشەک ئه‌وله‌هیێ دا کۆنگره‌یا خوه کۆم بکن. باخچه‌لی ئه‌ڤ یه‌ک ژی سه‌راست کر و گۆت: بلا وه‌رن ل مالازگرتێ کۆنگره‌یا خوه بکن.
بێ گومان ده‌سژێبه‌ردانا چه‌کان گاڤه‌ک گه‌له‌ک ئه‌رێنیه و دێ ئه‌ڤ یه‌ک ب سه‌رێ خوه ڕێیا سیاسه‌ته‌ک له‌گال و یاسایی و هه‌تا ڕاده‌یه‌کی ده‌مۆکراتیک ژ ته‌ڤگه‌را کورد را ڤه‌که. دێ ئه‌ڤ یه‌ک ژ هه‌موویێ گرنگتر د جڤاکێ دا ئارامیه‌کی په‌یدا بکه. هه‌روه‌ها هلوەشاندنا پەکەکێ ژی د به‌رژه‌وه‌ندیا کوردان دا یه. به‌لکی ب ڤێ یه‌کێ هێدی هێزێن هه‌رێمی پەکەکێ ل همبه‌ر ته‌ڤگه‌را ئازادخواز یا کوردستانێ ب کار نه‌ینن. یانی ئه‌ڤ کا‌رت ژ ده‌ستێ ده‌وله‌تێن هه‌رێمێ ده‌رکه‌ڤه.
لێ مخابن هێژا بریارا قه‌ندیل نه زه‌لاله و ب هنده‌ک حێجه‌تێن ڤالا قه‌ندیل هه‌ولدده پێڤاژۆیێ ئاسته‌نگ بکه. گه‌له‌ک ئاشکه‌ره‌یه کو، چه‌پێن ترک و که‌مالیستێن ل گه‌ل پەکەکێ د ناڤا هه‌ڤکاریه‌کی دا نه، ناخوازن پەکەکە/ده‌م پارتی به‌ر ب ئاکەپێ و تفاقا جومهور ڤە هەرە. لێ ده‌م پارتی ب ناڤێ پەکەکێ ژی دێ د پاشه‌رۆژێ دا ببه به‌شه‌ک ژ تفاقا ئه‌ردۆگان و باخچه‌لی. چه‌پێن ترک یێن د ناڤا ده‌مێ پاتییێ دا ڤێ یه‌کێ ناخوازن، تایبه‌تی که‌مالیست و چه‌پێن نه‌ته‌وییێن ترک کو، ب ڕێیا ده‌م پاتییێ ب ده‌نگێ کوردا دبن پەرله‌مه‌نته‌ر، ناخوازن ڤێ به‌رژه‌وه‌ندیا خوه ژ ده‌ست بدن.
ژ ئالیه‌ک دن ڤە جەهەپە ناخوازه هەڤالبەندەک وه‌ک ده‌م پارتییێ وندا بکه و ب دەست ئاکپێ ڤه به‌ردە. لێ ئه‌ڤ تشت گاڤ ب گاڤ پێکتێ. جەهەپێ ب هه‌ڤکاریا ده‌م پارتییێ د سه‌ری دا شارهداریا ستانبولێ و گه‌له‌ک باژارێن ترکیێ ب دەست ڤە ئانین. جەهەپێ ڤه‌کری ل گه‌ل قه‌ندیل هه‌ڤکاری کر و وه‌ک پارتیا یه‌که‌م هاته ده‌ستنیشانکرن.
ئەگەرەک ژی کو سه‌رۆکێ شارهداریا ستانبولێ ئیمامۆگلو تێ زیندانیکرن، هه‌ڤکاریا نه‌ڤبه‌را جەهەپێ و قه‌ندیله. د خوه‌پێشاندانێن ژ بۆ پشتگریا ئیمامۆگلو هاتین کرن دا، ده‌م پارتییێ هه‌ولدا دوئالی بله‌یزه. سه‌رۆکێن ده‌م پارتییێ ئه‌ولی دانخوویاکرن کو ئه‌و ل ته‌نشتا ئیمامۆگلونه، پشترا ژی ئه‌ڤ یه‌ک ئینکار کرن.
سه‌رۆکێ شارهداریا ئه‌نقه‌ره‌یێ د خوه‌پێشاندانا پشتگریا ئیمامۆگلو دا ئاخاڤتنه‌ک توند نژادپه‌ره‌ستی کر و سڤکاتی ب ئالایێ کوردستانێ کر. گه‌له‌ک ئالیێن کورد هه‌لوه‌ستا یاشار شه‌رمه‌زار کرن . بارۆیا وانێ د ده‌ربارێ یاڤاش دا دۆز ڤه‌کر. ده‌ما پیرۆزباهیا نه‌ورۆزا ستەنبولێ دا هه‌ڤسه‌رۆکێ ده‌م پارتییێ خوه‌ست داخوویانیا سه‌رۆکێ جەهەپێ بخوینه، ئه‌و هاته پرۆته‌ستۆکرن.
پێدڤیە کورد ڤان بوویه‌رێن کو ڕووددن باش بخوینن و ل گۆرا به‌رژه‌وه‌ندیێن نه‌ته‌وی ته‌ڤبگه‌رن. پێویسته هه‌لوه‌ستا سیاسه‌تا کورد ل گۆری به‌رژه‌وه‌ندیێن نه‌ته‌وی بێ دیارکرن.
د ڤێ پێڤاژۆیا بێ ناڤ دا، ڕۆژانه هه‌لوه‌ست تێنه گوهه‌رتن. هه‌ر گوهه‌رتن و بوویەرەک د به‌رژه‌وه‌ندیێن ده‌ستکه‌فتیێن نه‌ته‌وی دا به، پێدڤیە پشتگری لێ بێ کرن و هه‌لوه‌ستێن زه‌ره‌رێ بدن ده‌ستکه‌فتیێن نه‌ته‌وی ژی لازمە ب یه‌ک ده‌نگی بێن شه‌رمه‌زارکرن.
بلا ڤێجا ته‌ڤگه‌ر و پارتیێن کوردا نه ته‌نێ ژ بۆ هنده‌ک ئیدیۆلۆژیان کار بکن، بلا ژ بۆ به‌رژه‌وه‌ندیێن خوه یێن نه‌ته‌وی ته‌ڤبگه‌رن. بێ گومان هه‌ر ئالیه‌ک خوه‌دیێ ئیدیۆلۆژیەکێ یه، ئه‌ڤ یه‌ک نایێ ڕه‌خنه‌کرن، لێ پێدڤیە ده‌ستکه‌فتیێن نه‌ته‌وی ل سه‌ر هه‌ر تشته‌کیرس بێن گرتن و د سیاسه‌تێ دا ئه‌ڤ یه‌ک پیڤان به.
2025.04.01
/شرۆڤه
