په‌یاما سه‌رۆک مەسعود بارزانی:
ب ناڤێ خوه‌دایێ مه‌زن و دلۆڤان
ب هه‌لکه‌فتا حه‌فتێ و پێنجه‌مین سالڤه‌گه‌را دامه‌زراندنا پارتیا ده‌مۆکراتا کوردستانێ، گه‌رمترین پیرۆزباهیێن خوه پێشکێشی هه‌موو کادر، ئه‌ندام و ئالیگرێن پارتی دکم. پیرۆزباهیێ ل مالباتێن سه‌ربلندێن شه‌هیدان و پێشمه‌رگه یێن قه‌هره‌مان و هه‌موو چین و پێکهاتەیێن کوردستانێ دکم و هێڤیا سه‌ربلندی و خوه‌شیێ ژ بۆ وان دخوازم.
د دەمەكێ دا كو نه‌یار و داگیرکه‌رێن کوردستانێ ب هه‌موو هێز و شیانێن خوه هه‌ولا نه‌هشتنا شۆره‌ش و سه‌رهلدانا گه‌لێ کورد ددان، د وێ دەمێ دا، ژ بۆ به‌رده‌وامیا خه‌بات و به‌رخوه‌دانا گه‌لێ کورد، دامه‌زراندنا پارتی د شانزده‌هێ ته‌باخا 1946ێ دا پێدڤیەكا دیرۆکی بوو. پارتی هه‌ر ژ ده‌ستپێکا دامه‌زراندنێ هه‌تا نها ئامرازه‌ک بویه ژ بۆ پێکانینا ئارمانجا ده‌مۆکراتی، نشتیمانی و نه‌ته‌وه‌یی یێن گه‌لێ کوردستانێ و د هه‌مان ده‌مێ دا ژی مل ب مل د گه‌ل هێزێن تێکۆشه‌ر و نشتمانپه‌روه‌رێن دن یێن کوردستانێ، د ھوموو قۆناغان دا، ئامرازێن به‌رگریکرنێ بویه ژ ماف و ناسنامه‌یا گه‌لێ کوردستانێ.
خه‌باتا پارتی فاکته‌رێ گرنگ و ب باندۆر د دیرۆکا خه‌بات و به‌رخوه‌دانا گه‌لێ کوردستانێ دا پره ژ ئه‌ڤراز و نشێڤیان و پارتی د سه‌رکه‌فتن و ده‌ستکه‌فتان دا به‌شداره‌کا سه‌ره‌کی بویه و د قۆناغێن دژوار دا هه‌رده‌م خوه ب به‌رپرس زانیه. د هه‌موو قۆناغان دا پارتی وه‌کی ئامرازه‌ک بویه د ده‌ستێ گه‌لێ کوردستانێ دا ژ بۆ میسۆگه‌رکرنا ماف و ده‌ستکه‌فتان و کوورترکرنا فره‌ئالی و برایه‌تی و پێکڤه‌ژیانێ و ڕۆلا خوه یا پێشه‌نگ د هه‌موو وارێن ژیانا سیاسیا کوردستانێ دا پاراستیه.
دامه‌زراندنا پارتیا ده‌مۆکراتا کوردستانێ ژ بۆ پا‌رچه‌یێن دن یێن کوردستانێ ژی جهێ هێڤی و سه‌رهلدانێ بوو و ژدایکبوونا پارتی ژ بۆ تێکۆشین و خوه‌ڕاده‌ستنه‌کرن و نه‌هشتنا بێهێڤیێ ده‌ستپێکه‌کا نوو بوو. جهێ شانازیێ یه پارتیا ده‌مۆکراتا کوردستانێ خوه ب چو ئیدیۆلۆژیه‌کا ته‌نگ و هزری یا شۆڤه‌نی و توندیێ ڤه گرێنه‌دایه و بویه سێوانه‌ک ژ بۆ وێ یه‌کێ کو هه‌موو پێکهاتەیێن نه‌ته‌وه‌یی و ئۆلی یێن کوردستانێ ل بن دا کۆمببن و ئه‌ڤه ب خوه ده‌ستکه‌فته‌ک بێوێنه و سه‌رده‌میانه بوو د پێشکه‌تنا هزرا سیاسی ل کوردستانێ. پارتی هه‌رده‌م هلگرا په‌یاما ئاشتیێ بوویه و به‌رده‌وام ژی ئاماده بوویه ژ بۆ به‌ره‌ڤانیکرنا کورد و کوردستانێ.
د ده‌ما نها دا ئارامی و پاراستنا کوردستانێ و بهێزکرنا پێکڤه‌ژیان و ئارامی و برایه‌تی و ته‌بایی یا د ناڤبه‌را هه‌موو پێکهات و ئالیێن سیاسی و بهێزکرنا دام و ده‌زگه‌هێن هه‌رێما کوردستانێ ئه‌وله‌ویه‌تا سه‌ره‌کیا سیاسه‌تا پارتی یه.
هه‌ر وها پارتی ته‌که‌ز ل وێ یه‌کێ دکه کو دۆزا ڕه‌وایا گه‌لێ کوردستانێ پێویسته ب ڕێیا ئاشتی و هه‌ڤدوو تێگەهشتنێ، دوور ژ زمانێ ئینکار و خوه‌سه‌پاندنێ، بێ چاره‌سه‌ر کرن. د ده‌ربارێ ڕه‌وشا ئیراقێ ژی دا، مخابن ئه‌و سه‌ده‌مێن کو بوونه هۆکارێن سه‌رهلدانا ته‌رۆر و نه‌ئارامیێ هێشتا ژی مانه. هه‌ر د ڤی واری دا ئه‌ز باوه‌رم هلبژارتنێن پاشه‌رۆژێ ل ئیراقێ دکارە ببه ده‌رگه‌هه‌ک باش ژ بۆ نووبوونا پرۆسه‌یا سیاسی و چه‌سپاندنا ئیراده‌یا وه‌لاتیان یا ژ بۆ گووهه‌رتن و گەهشتنا ب ئارامیێ.
د ڤێ سالڤه‌گه‌را پیرۆز دا پێویسته هه‌موو پارتی ل ئاستا مه‌زناهیا دیرۆکێ و قوربانیدانا پارتیا خوه بن و چو ده‌مه‌کێ ژ بیرا وان نه‌چە کو پارتی(پدک) پارتیه‌کە خوه‌دیا دۆزه‌کێ یه و خوه‌دیا ڕێبازا بارزانی یه و ژ بۆنا ڕزگاری و خزمه‌تا کوردستانێ هاتیه دامه‌زراندن. پێویسته ژ به‌رێ بهێزتر ڕووبروویێ گه‌فان ببه و ده‌رفه‌تان ژی ژ بۆ بهێزتربوونا کوردستانێ بکاربینن و ئه‌رکێ خوه یا ژ بۆ پێشخستنا ئاڤادانی و پێکڤه‌ژیان و ته‌بایی یا کوردستانێ، ب باشترین ئاوایی ئه‌نجام بدن.
مه‌سعود بارزانی
2021.08.16
