ما پەكەكە دكارە رێ ل پەدەكێ بگرە بچە شنگالێ
ھلبژارتنێن پەرله‌مه‌نتۆیا ئیراقێ رۆژا 2021.10.10 دێ ھێن ئەنجام دان. .
هه‌ر ئالیه‌ک سیاسی کوردستانی ل گۆرا خوه پرۆپاگانده‌یێ دکه و هه‌ولددن کو پتر پەرله‌مه‌نته‌را ده‌ستڤه بینن. بێ گومان د ده‌ما پرۆپاگانده‌یێن هلبژارتنان دا هه‌ڤ ڕه‌خنه دکن و به‌هسا پرۆژه‌یێن خوه ل به‌غدایێ دکن. گه‌له‌ک گرنگه کورد ل به‌غدایێ بکاربن ل هەمبه‌ر پەرله‌منه‌ته‌ر و ده‌ستهلاتا به‌غدایێ به‌رژه‌وه‌ندیێن کوردستانێ بپارێزن. ژ خوه ڕه‌وشا هه‌تا وه‌ک ئیرۆ گه‌له‌ک ڤه‌کری دایه خوویاکرن کو، کا کی و چه‌وا ل به‌غدایێ دژاتیا ده‌ستکه‌فتیێن کوردا دکن و عه‌کسێ وێ ژی کی و چه‌وا ژ بۆ پاراستنا ده‌ستکه‌فتیان و به‌رژه‌وه‌ندیێن کوردستانی هه‌ولددن.
ڕۆژا 2021.10.03ێ به‌ربژێرێن پەدەكەێ یێن شنگالێ هه‌ولدان کو بچن شنگالێ، لێ چه‌کدارێن پەكەكێ ڕێ ل وان گرتن و نه‌هێلان دەرباسی ناڤا باژارێ شنگالێ ببن. ژ بۆنا كو شه‌ره‌ک ده‌رنه‌که‌ڤه به‌ربژێرێن پەدەكێ پاشڤە ڤه‌گه‌ریان. لێ ئه‌و نایێ وێ واته‌یێ کو ئەو ئێدی نا‌چن شنگالێ. هه‌ر چه‌وا‌به به‌ربژێرێن پەدەكێ دێ چن ناڤا باژارێ شنگالێ و هه‌ر ده‌ڤه‌را پێویست دێ پرۆپاگانده‌یا خوه بکن. چه‌کدارێن پەكەكێ ژی ڤێ یه‌کێ باش دزانن.ئانكو ب كورتی چه‌کدارێن پەكەكێ و ملیسێن شیعه نکارن ل چو ده‌ڤه‌ره‌کا کوردستانێ ڕێ ل پەدەكێ بگرن.
لێ ژ بۆنا كو شەر نەقەومە خوین نه‌یێ ڕژاندن پەدەكە گه‌له‌ک ب حه‌ساسی و ب مه‌سئوولیه‌ت ته‌ڤدگه‌ره.
شنگال و دەڤەرێن دەردوورا وێ ھەموو ژ ئالیێ هێزا پێشمه‌رگه‌یێ کوردستانێ و د بن فه‌رمانداریا سه‌رۆک مەسعود بارزانی دا ژ ده‌ستێ داعیشێ ئازاد کرن. سەرۆك مه‌سعود بارزانی ل سه‌رێ چیایێ شنگالێ ل هەمبه‌ر مه‌دیایا جیهانی ئازادکرنا شنگالێ د کۆنفه‌رانسه‌ک رۆژنامەڤانی دا ڕاگەهاند.
پشتی ڕه‌فه‌رەندوما سه‌رخوه‌بوونا کوردستانێ، ئارتێشا ئیراقێ ل گه‌ل هێزێن حه‌شدا شه‌عبی ئێریش برن سه‌ر کوردستانێ، خیانه‌تا 16ێ ئۆکتۆبه‌رێ ژی رێ ژ وان را خوەش كر کو ھندەك دەڤەرێن كوردستانی داگیر بكن، پێشمه‌رگێ كوردستانێ خوه ژ هنده‌ک ده‌ڤه‌ران دا ئالیه‌کی و ده‌ڤه‌رێن ستراته‌ژیک یێن کوردستانێ پاراستن. چه‌کدارێن پەكەكێ مل دان ملێ ملیسێن شیعه شه‌رێ پێشمه‌رگه یێن کوردستانێ کرن.
نها ژی چه‌کدارێن پەكەكێ ل گه‌ل حه‌شدا شه‌عبی ل شنگالێ نه. د ده‌ربارێ شنگالێ دا د ناڤبه‌را حکومه‌تا به‌غدایێ و کوردستانێ دا لهه‌ڤهاتنه‌ک هاته کرن. لێ ملیس و چه‌کدارێن پەكەكێ ڕێ نادن کو ئه‌ڤ رێكەفتن ل شنگالێ بێ جهبجهکرن. پەكەكە ناخوازه شنگال بکه‌ڤه سه‌ر کوردستانێ و د بن دەستھەلاتا حکومه‌تا کوردستانێ دا‌بە. ئه‌و هه‌ولددن شنگال ببه به‌شه‌ک ژ ئیراقێ.
پەكەكە وه‌ک هه‌ر جارێ د ده‌ربارێ ڕه‌وشا شنگالێ دا زانیاری و نووچەی یێن دەرەو و شاش به‌لاڤ دکه.
د مه‌دیایا پەكەكێ دا به‌حسا بوویه‌را کو هه‌ولدان ڕێ ل به‌ربژێرن پەدەكێ گرتن دکه و ده‌ره‌وا دکه. د ئانفێ دا دبێژه:” د 3یێ جۆتمه‌هێ پەدەكێ ب هێزێن چه‌کدار خوه‌ستن ده‌رباسی شنگالێ ببن لێ گه‌لێ مه یێ کو ل چاند، ئۆل و ڕوومه‌تا خوه خوه‌دی ده‌ردکه‌ڤه ژ به‌ر ئیخانه‌تا یا کو د 3 یێ ته‌باخا 2014ێ دا ژ ئالیێ پەدەكێ ڤه ل دژی وان هاتیه کرن، نه‌هشتن ئه‌ڤ هێز ده‌رباسی سه‌ر ئاخا پیرۆز ببن. دایکێن مه، جوانێن مه و ته‌ڤاهیا گه‌لێ مه شنگال ل هه‌مبه‌ری داگیرکه‌ریا پەدەكێ پاراست و ئه‌و نه‌چار کرن کو پاشڤه ڤه‌گه‌رن. لێ پشتی ڕۆژه‌کی جاره‌کی دن دخوازن ڤێ پرۆڤۆکاسیۆنێ ببن سه‌ری و خوینا ئێزدیان برژینن.
ئه‌م ژ ڕایا گشتی ڕا ددن دیارکرن کو ئارمانجا وان نه پرۆپاگەندایا هلبژارتنێ یه، ژ خوه گه‌لێ مه ئیسپات کر کو ئه‌و ئیخانه‌تکاران قه‌بوول ناکن و ده‌نگێ خوه نادن وان.”
سیاسه‌ت و سیخووریا پەكەكێ د ده‌ربارێ کوردستانێ دا تێ زانین، لێ جاردن مه‌دیایا پەكەكێ ده‌ره‌وا دکە و هه‌ول دده کو هه‌ڤالبه‌ندیا پەكەكێ ل گه‌ل داگیرکه‌ران ڤه‌شێره. پەكەكە ل هه‌موو به‌شێن کوردستانێ دا ژ بۆ ڕێ ل ده‌ستکه‌فتیێن نه‌ته‌وی بگره ل گه‌ل حکومه‌تێن دەولەتێن كوردستان داگیر كرنە هه‌ڤکاره. ئارمانجا پەكەكێ یا سه‌ره‌کی ئه‌وه کو؛ ڕێ ل ده‌وله‌تبوونا کوردا بگره.
نابه کورد و ئالیێن سیاسی ل هەمبه‌ر سیاسه‌تا پەكەكێ بێ ده‌نگ بمینن، هه‌ر بێده‌نگی ھاریکاریا دژمنا دکه. پێویسته هه‌ر کورده‌ک ژ بۆ ده‌ستکه‌فتیێن نه‌ته‌وی ده‌نگێ خوه بلند بکه و ل هەمبه‌ر ڕێگریا ده‌وله‌تبوونا کوردا خوه‌دی هه‌لوه‌ستبه. د قۆناخا کو ته‌ڤگه‌را کوردستانی تێره ده‌رباس دبه ئه‌ڤ یه‌ک بوویه پیڤانا نشتمانپه‌روه‌ریێ.
2021.10.04
نێرین/شرۆڤه
