گه‌له‌ک جارا ل هەمبه‌ر ده‌ره‌و و ڤرێن پەکەکێ و هه‌موو دام و ده‌زگه‌هێن وێ د ڤان ڕووپه‌لان دا نڤیس هاتنه وه‌شاندن و به‌حسا ڕاستیا پەکەکێ هاتیه کرن و سیاسەتا وان ھاتیە شەرمەزار كرن. لێ وەسا دیارە هنده‌ک تشت تێرا ناکه‌ن، ده‌ما مرۆڤ سنۆرێ ئه‌خلاقی ده‌رباس بکه و حه‌یا و شەرم د ڕوویێ وان دا نه‌مینه، به‌رسڤێن ژ وان ڕا بێن دایین ژی جهێ خوه ناگره و هه‌ر هه‌لوه‌ستا بێ دایین ژی ده‌رباس دبه دچه. ژ بۆ ڤێ دڤێ چ بێ کرن کو ڕێ ل ده‌ره‌و، زانیاریێن شاش و بێئەخلاقیێ بێ گرتن. ڕێیه‌ک هه‌یه کو دڤێ سیاسه‌تا پەکەکێ و هاڤالبه‌ندێن پەکەکێ بێن هه‌رماندن.
ژ ئالیه‌ک دن ئه‌و که‌سێن دبن پیۆنێ سیاسه‌تا پەکەکێ دڤێ باش بھێنه ناسکرن و بھێنه ته‌شهیر کرن. ئه‌وێن به‌حسا یه‌کێتیا کورد ب ده‌ڤێ پەکەکێ دکن، ئه‌ون ب ئۆرگانیزه‌کرنا پەکەکێ به‌حسا “شه‌رێ براکوژی” دکن دڤێ باش بھێنه ناسکرن ڕێ ل ده‌ره‌و و هه‌لوه‌ستێن وان یێن دوروو بێته گرتن. ئه‌گه‌ر ئالیه‌ک سیاسی یان ژی د ناڤا ئالیێن سیاسی دا هنده‌ک ڤێ یه‌کێ نه‌کن دبن دارکێ ته‌ڤدانێ د ده‌ستێ پەکەکێ دا و بڤێ نه‌ڤێ دکه‌ڤن د بن خزمه‌تا سیاسه‌تا قرێژ یا كو پەكەكە بریڤە دبە.
به‌ری چه‌ند ڕۆژه‌کان، ل ڕۆژاڤایێ کوردستانێ، ده‌ڤه‌رێن د بن ده‌ستهلاتداریا پەکەکێ دا خوه‌پێشاندانه‌ک چێبوو. قاشۆ ئێریشا ترکیێ یا سه‌ر شنگالێ دهات شه‌رمه‌زار کرن. د ده‌ستێ خوه‌پێشه‌نداران دا ئالایێن پەکەکێ، پەیەدێ وهەسەدێ و وێنه‌یێن ئۆجەلان هه‌بوون. پانکاراته‌ک (لافیتەك) د پێشیا خوه‌پێشانده‌ران دا هه‌بوو کو، مرۆڤ شه‌رم دکه به‌حسا وێ بکه. د وێ پانکراتێ دا هاتبوو نڤیساندن: ” دۆھ داعیش شنگال قه‌تل کر ئیرۆ ژی ئه‌ڤن” ل سه‌ر ڤێ نڤیسێ و لافیتەیێ وێنه‌یێ مه‌سعود بارزانی، تەیب ئه‌ردۆگان و سه‌رۆکوه‌زیرێ ئیراقێ کازمی هه‌بوو.
گه‌لۆ ئه‌و شاندەیا ژ ھونەرمەندان پێك دھات و سەردانا بشوورێ كوردستانێ كربوو ل هەمبه‌ر ڤێ هه‌لوه‌ستا پەککەێ چ دبێژن؟ ژ بۆ چ داخوویانیه‌کێ به‌لاڤ ناکن و ده‌رناکه‌ڤن ل سه‌ر ته‌له‌ڤزیۆنا ڤێ کرێتیا ئه‌و ب خوه شریکن شه‌رمه‌زار ناکن؟ لێ ل ڤێ ده‌رێ کێماسیه‌ک دن هه‌یه کو دڤێت بەحسا وێ بھێتە كرن، ئه‌و سیاسه‌تمه‌دار و ھونەرمەندێن ڤێ یه‌کێ دکن پێدڤیە پەدكە رێ نەدا وان. پێدڤیە رایەدارێن پەدەكێ گازی وان بكە ژ وان را بێژە كا وەرن ھوون چما بێدەنگن؟ ھوون بانگا دیالۆگ و یەكێتیێ د ناڤا كوردان دكن، لێ ھوون چما ل هەمبه‌ر کرێتیا پەكەكە دكە بێ ده‌نگن ل ڕوویێ وان بدە و وان ب خوه ژی شەھمەزار بكە. ل باکورێ کوردستانێ، هەدەپێ، پەهەدێ و کەجەدێ د ده‌ربارێ بارزانی دا گه‌له‌ک جارا پانکارتێن (لافیتە) خراب نڤیساندنه، ئه‌گه‌ر د ده‌ما خوه دا هه‌لوه‌سته‌ک ب بریار ل ھەمبەر وان هه‌بوویا، به‌لکی ئیرۆ ڕێ ل ڤێ کرێتیا پەکەکە دکه بهاتا گرتن.
گه‌له‌ک بالکێشە کو، پەکەکە و مەهەپە، پارتیا نەژادبەرستا ترك، ب هه‌مان زمانی ئێریشێ بارزانی و پەدەکێ دکن.
پەکەکە قاتلا سیاسه‌تا یه‌کێتیا کوردستانێ یه، پەکەکە هه‌ڤالبه‌ندا ده‌وله‌تێن داگیرکه‌ر ل هه‌رێمێ یه، پەکەکە ناسنامه‌یا “شه‌رێ براکوژیێ” یە، تشتا کو ده‌وله‌تێن داگیرکه‌ر ب سه‌دان سالانە نکاریە بکه ئیرۆ ب دەستێ پەكەكێ ل ڕۆژاڤایێ کوردستانێ دكە. پەکەکە ناڤێ کوردستانێ وندا دکه، پەکەکە سه‌مبۆلا نه‌ته‌وی یا کوردا قه‌ده‌خه دکه، ئه‌گه‌ر هه‌تا نها کورد د ڤێ یەكێ نەگەھشتبن و فام نه‌کربن، ڕاستی ڕه‌وشا کوردا گه‌له‌ک خرابه.
هه‌تا ڤێ گاڤێ چه‌کدارێن پەکەکێ ل شنگالێ مووچه‌یێن خوه ژ حه‌شدا شه‌عبی وه‌ردگرن و ڕێ ل حوکومه‌تا هه‌رێما کوردستانێ دگرن کو بکه‌ڤه شنگالێ دا و ببه خوه‌دی ده‌ستهلات. چه‌کدارێن پەکەکێ ل شنگالێ هێزه‌که د بن باندۆرا حه‌شدا شه‌عبی دایە.
پەکەکە کیه و ب چ خه‌لکه‌کی دخاپینه؟ گه‌ره‌ک ئه‌ڤ بێ دیتن. پەکەکە، پەیەدە یه، هەدەپە یه، هەسەدە یه، کەنەکە یه، کەجەدە یه، یەپەگە و هەپەگە یه..هه‌لوه‌ستا ل هەمبه‌ر پەکەکێ دڤێ ل هەمبه‌ر ڤان هه‌موویا بن. پەکەکە ب ڤان ناڤا ئالیێن سیاسی و کوردا دخاپینه، لێ دڤێ ڤێجا مرۆڤ خوه ب خوه نه‌خاپینه.
ل هەبه‌ر زانیاریێن شاش و ده‌ره‌وێن پەکەکێ، تو چ بێژی فایده ناکه، دڤێت مرۆڤ خوه‌دی هه‌لوه‌ست به. دبێژه یه‌کی تف کر ڕوویێ به‌قێ. به‌ق لێ نھێری و که‌نی و گۆت: “ئاڤا ڤێ دنیایێ ڕوویێ من شل ناکە ما تفا ته شل دکه؟”
2021.08.22
